Alkitab Mobile SABDA
[VER] : [KARO]     [PL]  [PB] 
 <<  Yehezkiel 18 >> 

1Ngerana TUHAN man bangku,

2nina, "Ngkai maka kuan-kuan enda lalap ibelasken i negeri Israel? 'Orang tua man buah anggur si macem nanamna, tapi anak-anak kap si ngilu ipenna.'

3Erkiteken Aku, Dibata si nggeluh, TUHAN si Erdolat, enda lanai banci ibelasken i negeri Israel.

4Kesah tep-tep jelma, Aku empuna, subuk orang tua bage pe danak-danak. Ise erdosa, ia nge mate.

5Umpamakenlah lit sekalak jelma si tuhu-tuhu mehuli, benar dingen bujur.

6La isembahna berhala-berhala kalak Israel, la ipanna persembahen si ipersembahken i bas ingan persembahen man begu-begu. La pernah igodana ndehara temanna, la ipedemina diberu si sangana nguda bulanna.

7La pernah ise pe itipuna tah pe irampasna. Barang-barang jaminen kalak si rutang bana tetap iulihkenna; si kelihen iberena man, kalak si manjang-anjang iuisina.

8Adi kalak minjam duit man bana la pernah ibahanna erbunga. La ia nggit erbahan jahat, janah i bas tep-tep perubaten ibelaskenna keputusen si bujur.

9Kalak si bage patuh kap man perentahKu, janah alu metenget ipakena Undang-undangKu. Ia kalak benar, emaka nggeluh me ia." Bage nina TUHAN si Erdolat.

10"Jenari umpamaken dilaki enda ndai lit sekalak anakna si rusur ngerampuk dingen munuh, si ngelakoken erbage-bage perbahanen,

11si la pernah ilakoken bapana. Ipanna persembahen si ipersembahken i bas ingan persembahen man begu-begu, ndehara kalak igodana.

12Kalak musil itipuna, irampasina kalak, barang-barang jaminen kalak si minjam la iulihkenna. Idahina ingan-ingan ersembah kalak perbegu, gana-gana si nggesuh isembahna,

13janah ipebungakenna duitna. Banci kin kalak si bage nggeluh? Uga pe lang! Kerina perbahanen si melket e nggo ilakokenna, emaka ugapa pe mate ia. Ia mate erkiteken kesalahenna jine.

14Genduari umpamaken ka lit anakna. Idahna kerina dosa si ibahan bapana, tapi la iusihna.

15La isembahna berhala-berhala kalak Israel, la ipanna persembahen si ipersembahken man begu-begu. La igodana ndehara kalak,

16La ise pe itindasna, la ise pe irampasina. Barang jaminen kalak si ngeraih iulihkenna. Kalak si kelihen iberena man, janah kalak si manjang-anjang iberena uis.

17La ia nggit erbahan jahat, janah duit si ipinjamkenna la ibahanna erbunga. Ipakena Undang-undangKu, janah ipatuhina perentahKu. Kalak si bage la kap mate erkiteken dosa bapana, tapi ugapa pe nggeluh ia.

18Sebalikna, bapana nipu ras ngerampasi, janah lalap ibahanna si jahat man kerina kalak, emaka mate ia erkiteken dosa si ibahanna jine.

19Tapi nungkun kam. Ngkai maka anakna la ngenanami kiniseran erkiteken dosa bapana? Jabapna eme erkiteken anakna e ngelakoken si benar ras mehuli. Ipakena Undang-undangKu, iikutkenna alu tutus, emaka erkiteken si e tentu ia nggeluh.

20Ise erdosa ia nge mate. Sekalak anak labo ngenanami kiniseran erkiteken dosa bapana, bage pe bapa la ngenanami kiniseran erkiteken dosa anakna. Kalak si mehuli ndat upah erkiteken perbahanenna si mehuli, janah kalak jahat ngenanami kiniseran erkiteken kejahaten si ilakokenna.

21Adi kalak jahat jera, jenari ipakena Undang-undangKu, adi ilakokenna kai si benar dingen bujur, la ia mate; ia tentu nggeluh.

22Kerina dosa-dosana ialemi, janah nggeluh ia, erkiteken ilakokenna kai si benar.

23Akapndu kin meriah Kuakap ngidah kalak jahat mate?" nina TUHAN si Erdolat. "Lang, madin Kuakap ngidah ia jera, gelah ia nggeluh.

24Tapi adi kalak bujur lanai erbahan si mehuli, jenari ibenakenna ngelakoken kasa kai si jahat dingen nggesuh bagi si nilakoken kalak jahat, banci kin ia terus nggeluh? Lang! Kerina si mehuli si pernah ilakokenna sada pe lanai iinget. Mate me ia erkiteken la ia patuh, dingen erkiteken dosana.

25Tapi nindu, 'Kai si ilakoken Tuhan la kap payo. Begikenlah o kalak Israel. Akapndu kin perbahanenKu la payo? Perbahanenndu nge si la payo.

26Adi kalak benar lanai ngaloken si mehuli, jenari ibenakenna ngelakoken si jahat kenca bage mate ia, ia mate erkiteken kejahaten si ilakokenna.

27Adi kalak jahat jera, jenari ilakokenna kai si benar dingen mehuli, ikelinina kap kesahna.

28Ngerti ia kerna kai si ilakokenna jenari jera ia, emaka la ia mate, tapi nggeluh.'

29Jenari nindu, 'Kai si ibahan Tuhan la kap payo.' Akapndu kin perbahanenKu la payo? Perbahanenndu nge si la payo.

30O kalak Israel, genduari Aku, TUHAN si Erdolat, ngataken man bandu maka, sekalak-sekalak kam Kuadili rikutken perbahanenna. Jeralah i bas kerina kejahatenndu nari, janah ula pelepas dosandu ngkernepken kam.

31Ulanai lakoken kejahaten si nggo biasa ibahanndu, tapi pebaruilah ukur ras pusuhndu. O kalak Israel; man kadendu kin mate?

32La sekalak pe ateKu kam mate." Bage nina TUHAN si Erdolat. "Erkiteken si e, jeralah maka kam nggeluh."


  Share Facebook  |  Share Twitter

 <<  Yehezkiel 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran