Dual PanelDibata ngkernepken Moap
1Enda me berita kerna Moap. Kota Ar ras Kir ikernepken i bas sada berngi saja, janah i bas berngi e ka me Moap iradasken.
2Kalak Dibon nangkih ku das uruk lako tangis i bas ingan sembah-sembahen. Kota Nebo ras Medeba ingandungi kalak Moap; buk takalna ras janggutna nggo icukurna tanda atena ceda.
3Kalak si erdalan-dalan i pasar make uis guni, i tiga ras i datas tarum rumah, tangis ngandung kerina.
4Kalak Hesbon ras Eleale nderkuh, janah sorana nderkuh terbegi seh ku Jahas. Serdadu-serdaduna pe nggirgir, janah nggo bene ukurna.
5Megogo kal ateku ngenehen Moap. Rayatna nggo kiam ku kuta Soar, bage pe ku Eglat-Selisia. Janahna tangis deba nangkeng arah dalan si ku Luhit. Deba ka kiam ku Horonaim, iherna tangis belin.
6Lau Nimrim nggo kerah, dukut-dukut i duruna melus, lanai lit tading bulung-bulung si meratah.
7Jelma sienterem lawes ngepari Baluren Tusam, atena gelah banci pulah rikut ras erta-ertana.
8I bas kerina perbalengen Moap terbegi sora nderkuh. Sora nderkuh e terbegi ka pe i kuta Eglaim ras Beerelim.
9I kuta Dibon lau belin nggo megara erkiteken dareh. Janah si terkeleken asa si e tole ibahan Dibata man kalak si ringan denga i je. IsuruhNa ku je singa ngerigep kerina kalak Moap si tading denga.