Dual PanelDibata ngukum Siria ras Israel
1Nina TUHAN, "Damaskus lanai bo pagi sada kota, tapi batu si ergun-gun nari nge ngenca.
2Kota-kota i Siria jadi melungun seh rasa lalap. Kota-kota e salih pagi jadi mbalmbal man penggagaten biri-biri ras lembu, janah la lit ise pe si nggerasa.
3Israel lanai lit pertahanenna janah Damaskus ijajah kalak. Kalak Siria si nggeluh denga mela akapna bali ras kalak Israel. Aku, TUHAN, ngatakenca si enda."
4Nina TUHAN, "Reh me warina maka masap kemulian Israel janah kebayakenna isambari alu kemusilen.
5Israel nggo melemba desken juma i bas Baluren Repaim si nggo isabi janah iperani gandumna.
6Bagi batang saitun si nggo dung iperani tading sada dua i bas pucukna. Janah piga-piga nari ka i bas dahan-dahanna si arah teruh, bage me piga-piga kalak nari ngenca pagi tading i Israel. Aku, TUHAN Dibata Israel, nggo ngataken si enda."
7Tupung wari si e, mulih me kalak mindo penampat kempak si nepasa eme Dibata si Badia nu Israel.
8Lanai pagi kalak ernalem kempak batar-batar persembahen si ibahanna alu tanna jine, tah pe erpenundalen kempak bekas ukiren tanna, eme gana-gana Dewi Asera, ras batar-batar ingan nutung kumenen.
9Tupung wari e, melungen kota-kota si erbenteng enteguh janah nggo runtuh bagi kota-kota si itadingken kalak Hewi ras Amori asum ia lompat iperangi kalak Israel.
10O Israel nggo ilupakenndu Dibata si mulahi kam janah si engkawali kam desken deleng batu si paguh. Kepeken nggo isuanindu peken-peken si badia gelah nembah man dibata-dibata bangsa si deban.
11Tapi aminna gia sinuan-sinuanndu e turah janah erbunga, tapi labo kam peranisa. Kesusahen ras kinisuin si la terpepalem ngenca sikerajangenndu.
Negeri-negeri musuh italuken
12Bangsa-bangsa si megegeh sangana guntar. Sorana desken sora lawit si ergeruhguh, desken sora erdeso galumbang si mbelin.
13Bangsa-bangsa reh desken galumbang si ergalun. Tapi isuriangi Dibata ia, emaka minter naduh surut; bagi abu iembusken i reben-reben, ntah pe bagi nggala iembusken angin kalinsungsung.
14Karaben mbiar kerina kalak ibahanna, tapi erpagi-pagi nggo masap ia. Bage me jadina kalak si ngerampasi negerinta.