Dual PanelUkumen Dibata nandangi bangsa-bangsa
1Nina TUHAN, "Tupung e pagi Kuulihken ka kemakmuren Juda ras Jerusalem.
2Kupepulung kerina bangsa-bangsa jenari Kubaba ia kerina ku Baluren Pengadilen. I jah Kuadili ia erkiteken kai si nggo ibahanna man bangsangKu. Nggo ikerapkenna kalak Israel ku negeri-negeri si deban jenari ibagi-bagikenna negeringKu, Israel.
3Ibahanna tikam tanduk nentuken ise ndatken tabanen. Idayakenna anak dilaki ras diberu jadi budak, lako nggalari diberu si pencarinna erlua-lua ras nukur lau anggur.
4Kai kin atendu ibahanndu man bangKu o Tirus, Sidon ras daerah-daerah Pilisti? Erbalas kin atendu man bangKu? Adi e kin sura-surandu, minter ka nge Aku erbalas man bandu!
5Nggo ibuatindu pirak ras emasKu, jenari iangkutndu barang-barangKu si meherga bas rumah persembahenndu.
6Nggo iangkutndu kalak Juda ras kalak Jerusalem ndauh i bas negerina nari, dingen idayakenndu ia man kalak Junani.
7Genduari Kubaba ateKu ia ndarat i bas ingan e nari, eme ingan ku ja ia nggo idayakenndu. Kulakoken man bandu bagi nggo ilakokenndu man bana.
8Kupelepas anakndu si dilaki ras si diberu idayaken man kalak Juda. Idayaken kalak Juda ka ia kerina man sada bangsa si ndauh, eme kalak Syeba. Aku TUHAN kap si nggo melasken ranan enda.
9Momokenlah enda man bangsa-bangsa kerina: Ersikaplah guna erperang, dilo kerina kalak si mbisandu, suruh berkat kerina tenterandu.
10Tepa gigi lukundu jadi pedang, patukndu jadi lembing. Kalak si la megegeh pe arus ikut erperang.
11Pedasken mari, O kam bangsa-bangsa jenari pulunglah i bas berneh-berneh." O TUHAN, suruh TenteraNdu reh nerang ia kerina.
12"Bangsa-bangsa la banci la ersikap, dingen reh ku Baluren Pengadilen. I je, Aku TUHAN mereken penghakimen man bangsa-bangsa.
13Jahat kap ia kerina; sabi ia desken gandum isabi tupung peranin; erik ia bagi ngerik buah anggur i bas pengeriken seh maka ndaraten launa.
14Meribu-ribu kalak, meribu-ribu kalak i bas berneh-berneh Pengadilen. Ku je me reh wari TUHAN janah pedas-pedas perehna.
15Matawari ras bulan jadi gelap bintang-bintang pe lanai ersinalsal."
TUHAN masu-masu BangsaNa
16TUHAN ergeruhguh i Deleng Sion nari, sorana erlenggur i Jerusalem nari; doni ras langit mundu-undu, tapi Ia kap sekawal BangsaNa.
17"O Israel jenari itandaindu kap pagi maka Aku kap TUHAN Dibatandu. I datas Deleng Sion, delengKu si badia, i je ringan Aku. Jerusalem jadi kota si badia lanai ndigan pe kalak si deban naluken ia.
18Tupung e tambur me deleng-deleng alu kebun anggur, asuh-asuhen dem i bas tiap-tiap uruk, lau si erburak-burak maler; i bas kerina sumbul lau Juda nari, Ulu lau pultak i bas Rumah Pertoton TUHAN nari maler ku Baluren Akasia.
19Mesir jadi gurun pasir, Edom jadi mbalmbal si terulang erkiteken nggo iserangna negeri Juda, janah ibunuhina kalak si la ersalah.
20Erbalas me Aku man kalak si nggo munuhi; la ateKu mekuah man kalak jahat. Tapi Juda ras Jerusalem tetap iingani rasa lalap, dingen Aku TUHAN ringan i datas Deleng Sion."
21(Yoel 3:20)