Dual Panel1Enda me kata TUHAN man Joel anak si Petuel.
Ceda ate bangsa e perban labang encedai negeri
2O Pertua-pertua, megermetlah, kerina kalak si i Juda dengkehkenlah. Lit kin pernah jadi bagenda i bas jamanndu ntah i bas jaman nini-ninindu nai?
3Turiken man anak-anakndu kerina si jadi enda, maka iturikenna ka kempak anak-anakna, anak-anakna nurikenca ka kempak kesusuren si arah pudi.
4Pegancih-gancih reh labang erdemuyung icinepina sinuan-sinuanndu. Kenca lawes si pemena, reh ka labang si deban erdemuyung. Keri ipanganina sinuan-sinuan si lit denga tading.
5O kalak pemabuk, kekeken jenari ngandungken, o kam peminem-minem anggur, tangislah; buah anggur nggo kernep, lau anggur si mbaru lanai banci ibahan.
6Sada bala labang nggo reh nerang negerinta; gegehna lanai teralang, buena lanai terkira. Ipenna bali telapna ras ipen singa.
7Nggo ikernepkenna buah anggurta, nggo ingatngatina batang aranta. Kuling batang kayu e pe keri ipanganina, seh maka nggo mbentar dahan-dahanna.
8Tangiskenlah bali ras pertangis singuda-nguda erkiteken kepaten anak perana si nandangi ngempoi ia.
9Lanai lit persembahen pangan ras inemen guna Rumah Pertoton, ceda ate imam-imam lanai lit man persembahenken man TUHAN.
10Juma-juma nggo terulang; taneh tangis ngandung sabap gandum nggo radas, buah anggur nggo kerah, minak saitun nggo kelayap.
11Ndeleken, o perjuma, tangisken, o kam si perkebun anggur, erkiteken gandum ras jaba ras kerina ulih juma nggo radas kal.
12Batang anggur ras ara nggo kerah kerina batang kayu si erbuah; kerah jenari mate. Keriahen bangsa e nggo bene.
13O imam-imam si ngelai batar-batar, pakekenlah uis guni tanda rate ceda, jenari tangisken. To bengket ku bas Rumah Pertoton jenari ngandungken gedang-gedang berngi! Lanai lit persembahen pangan ras inemen si man persembahenken man TUHAN.
14Suruh kerina erpuasa, lebuh perpulungen! Pepulung peminpin-peminpin ras kerina kalak Juda, gelah bengket ia kerina ku Rumah Pertoton TUHAN Dibatandu maka serko ia man BaNa.
15Wari TUHAN nggo ndeher, eme wari cilaka, si rehna i bas si Mada Kuasa nari. Andiko mejinna cilaka si IbahanNa i bas wari e!
16Teridah kita nggo kote kerina, erkiteken kerina pangan nggo lesap. Lanai lit keriahen, i bas Rumah Pertoton TUHAN Dibatanta.
17Benih maten i bas taneh si kerah. Lanai lit gandum si man lumbungenken emaka nggo runtuh lumbung-lumbung si lume.
18Lembu erboh perban serana, perbahan lanai lit mbalmbal inganna nggagat; rarasen biri-biri pe seh kal iakapna serana.
19Serko aku man BaNdu, o TUHAN, sabap mbalmbal ras batang kayu nggo kerah tempa-tempa api enciluksa.
20Rubia-rubia si meliar pe serko man BaNdu sabap ulu lau pe nggo jadi kerah.