Alkitab Mobile SABDA
[VER] : [MADURA]     [PL]  [PB] 
 <<  1 Samuel 13 >> 

1E settong are, saellana jumenneng rato,

2Saul mele tello ebu oreng Isra’il, se dhu ebu esaba’ e kalenggiyanna, iya areya e Mikhmas ban e dhaera pagunongan Betel, dineng se saebuna epaentar ka Gibeya e dhaerana suku Benyamin epabareng ban Yonatan, pottrana. Ra’yat laenna eedine mole ka bengkona bang-sebang.

3Yonatan pas mate’e panglima Filistin se badha e Geba, parkara jareya ekaedhing bi’ bangsa Filistin. Saul pas makon oreng nope tarompet sabalattrana nagara Isra’il, makompola oreng Ibrani, epakona noro’ aperrang.

4Ka reng-oreng Isra’il ekabala ja’ Saul se mate’e panglima Filistin gella’ ban ja’ bangsa Filistin ce’ baji’na ka oreng Isra’il. Daddi ra’yat atoro’ ka papakon se ngajak oreng Isra’il agabung ban Saul e Gilgal.

5Sabatara jareya oreng Filistin la akompol keya se nyerranga Isra’il; ngeba kareta perrang tello polo ebu meggi’, tantara se nompa’ jaran nem ebu oreng, ban tantara laenna se bannya’na padha ban beddhi e paseser. Oreng Filistin jareya akemah e Mikhmas e temorra Bet-Awen.

6Saellana jareya pas nyerrang oreng Isra’il akantha celeng tato, sampe’ kabadha’anna oreng Isra’il ce’ babajana. Oreng Isra’il badha se ngetek e dhalem guwa ban rang-jurangnga gunong otabana e ke’-lekke’na bato karang otabana e dhalem somor ban e bang-lobang e dhalem tana,

7ban badha keya se alengka Songay Yordan maso’ ka dhaera Gad ban Gileyad. Saul gi’ badha e Gilgal, ra’yat se noro’ molae ngetter katako’en.

8Saul gi’ anante’ Samuwel pettong are abidda, menorot se epessennagi Samuwel ka salerana, tape Samuwel gi’ ta’ napa’ ka Gilgal, mangkana ra’yadda la molae ondur.

9Daddi Saul adhabu ka reng-oreng jareya, "Kassa’ ngala’ kurban obbaran ban kurban kasalameddan rowa." Saul dibi’ se ngatorragi kurban obbaran jareya.

10Tape gi’ buru mare se ngatorragi kurban jareya, Samuwel rabu. Saul nyander nyemma’e Samuwel ngatorana salam,

11tape Samuwel adhabu, "Ponapa se elampa’agi junandalem gella’?" Saodda Saul, "Kaula nengale ra’yat molae ondur, mangkana panjennengngan gi’ ta’ rabu saamponna napa’ baktona se etantowagi panjennengngan dibi’. Sarengngan pole, oreng Filistin ampon akompol e Mikhmas.

12Daddi ca’epon kaula tako’ oreng Filistin nyerrang kaula e Gilgal paneka, mangkana kaula gi’ ta’ nyo’on bantowanna PANGERAN. Daddi kaula motossagi ngatorragiya kurban paneka."

13Meyarsa jareya Samuwel pas adhabu, "Gapaneka budhu nyamana. Saompamana junandalem ta’at ka dhabuna GUSTE Allah, tanto junandalem sana’potona sareng PANGERAN epajumenneng rato salanjangnga.

14Namong samangken ampon ta’ kengeng. Sabab junandalem ta’ atoro’ ka dhabuna PANGERAN, daddi PANGERAN badhi meleya oreng laen se ekasokane Salerana se epadaddiya ratona ommadda."

15Samuwel pas meyos dhari Gilgal nerrossagi parjalananna ka Gibeya e dhaerana Benyamin. Sabatara jareya Saul mareksa pasukanna, se bannya’na ra-kera nem atos oreng.

16Daddi Saul ban Yonatan pottrana, sarta tantarana akemah e Geba e dhaera Benyamin, dineng oreng Filistin akemah e Mikhmas.

17E bakto jareya keya badha tello rombongan rampok Filistin mangkat dhari parkemahan Filistin entara arampok; se sarombongan mangkat ka Ofra e dhaera Syuwal,

18rombongan se nomer dhuwa’ mangkat ka Bet-Horon, ban se nomer tello’ mangkat ka batessa nagara se ngadhep ka Cora Zebo’im ban sagara beddhi.

19Sanagara Isra’il tadha’ pandhi, sabab oreng Filistin ta’ ngedine oreng Ibrani agabay peddhang otaba tombak.

20Daddi mon agangseya nanggalana, landhu’na, kapagga ban are’na, oreng Isra’il kodu entar ka oreng Filistin;

21opana mon agangse kapak ban mateppa’ pakakassa kerrabanna sape pesse tampes kene’ settong, mon agangse nanggala otaba landhu’ pesse tampes kene’ dhadhuwa’.

22Jareya sababba arapa e baktona perrang e Mikhmas, tadha’ oreng Isra’il se andhi’a peddhang otaba tombak, kajabana Saul ban Yonatan pottrana.

23Oreng Filistin masang eppos panjaga’an e jalan se eapet gunong dhadhuwa’ e Mikhmas sopaja ta’ ekobasa’ana mosona.


  Share Facebook  |  Share Twitter

 <<  1 Samuel 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran