Dual Panel1Areya’ sabagiyan dhari toronanna Yehuda: Peres, Hezron, Karmi, Hur ban Syobal.
2Syobal reya ramana Reaya, Reaya ramana Yahat. Yahat andhi’ ana’ lalake’ kadhuwa: Ahumai ban Lahad. Reng-oreng jareya bangatowana oreng kottha Zora.
3Pottra lake’na Kaleb se sareyang ollena ban rajina se anyama Efrat iya areya Hur. Toronanna Hur reya se maddek kottha Betlehem. Etam, Pnuwel ban Ezer reya tra-pottrana Hur. Etam kaagungan pottra lalake’ katello nyamana Yizre’el, Isma ban Idbas, sarta pottra bine’ kasorang, iya areya Hazelelponi. Pnuwel maddek kottha Gedor ban Ezer maddek kottha Husa.
4(4:3)
5Asyhur se maddek kottha Tekowa kaagungan raji dhadhuwa’, iya areya Hela ban Na’ara.
6Pottra lalake’anna ollena ban Na’ara badha kaempa, iya areya: Ahuzam, Hefer, Temeni ban Ahastari.
7Ban Hela Asyhur kaagungan pottra lalake’ katello, iya areya Zeret, Yizhar ban Etnan.
8Anub ban Hazobeba reya pottra lalake’anna Kos, bangatowana kaom toronanna Aharhel pottrana Harum.
9Badha oreng lalake’ anyama Yabes; oreng jareya ehormadi oreng alebbiyan dhari tan-taretanna. Bi’ ebuna enyamae Yabes lantaran ebuna nanggung sake’ ce’ sarana e bakto rembi’ Yabes jareya.
10Tape Yabes adu’a ka Allah se esemba oreng Isra’il, atorra, "Adhu, Guste Allah, berkadi abdidalem, palebarragi dhaera kakobasa’an abdidalem. Jaga’agi abdidalem sareng pajauwagi dhari sadajana balai sopaja abdidalem ta’ sangsara’a." Ban Allah ngabbuli parnyo’onanna.
11Kelub taretanna Suha andhi’ ana’ lalake’ anyama Mehir. Mehir andhi’ ana’ Eston,
12ban Eston andhi’ ana’ lalake’ katello, iya areya Bet-Rafa, Paseyah ban Tehina, se maddek kottha Nahas. Toronanna reng-oreng jareya badha e kottha Reka.
13Kenas andhi’ ana’ lalake’ kadhuwa nyamana Otniyel ban Seraya. Otniyel andhi’ ana’ lalake’ laenna kadhuwa, iya areya Hatat ban Meonotai.
14Ana’na Meonotai iya areya Ofra. Pottrana Zeraya iya areya Yowab, se maddek Cora Pandhiyan. Pandhudhu’ e cora jareya padha ahli e dhalem agabay karajinan tanang.
15Kaleb pottrana Yefune kaagungan pottra lalake’ katello, iya areya: Iru, Ela ban Na’am. Pottrana Ela iya areya Kenas.
16Yehalele’el andhi’ ana’ lalake’ kaempa, iya areya: Zif, Zifa, Tireya ban Asare’el.
17Ezra kaagungan pottra lalake’ kaempa: iya areya Yeter, Mered, Efer ban Yalon. Mered abine Bica pottrena rato Messer, laju kaagungan pottra babine’ anyama Miriyam, ban pottra lalake’ kadhuwa iya areya Samai ban Yisba. Yisba jareya se maddek kottha Estemoa. Mered abine laen pole, iya areya babine’ dhari suku Yehuda, pas kaagungan pottra lalake’ katello, iya: areya Yered se maddek kottha Gedor, Heber se maddek kottha Sokho, ban Yekutiyel se maddek kottha Zanowah.
18(4:17)
19Hodiya abine taretanna Naham. Toronanna daddi bangatowana kaom Garmi ban kaom Ma’akha. Kaom Garmi neng e kottha Kehila, ban kaom Ma’akha neng e kottha Estemoa.
20Simon andhi’ ana’ lalake’ kaempa, iya areya: Amnon, Rina, Benhanan ban Tilon. Yisei kaagungan pottra lalake’ kadhuwa iya areya Zohet ban Ben-Zohet.
21Sala settong dhari pottrana Yehuda nyamana Sela. Toronanna iya areya: Er se maddek kottha Lekha, Lada se maddek kottha Maresa, Kaom tokang tennonna kaen linen e kottha Bet-Asybeya, Yokim, Pandhudhu’ e kottha Kozeba, Yowas, Sarap se abine babine’an Mo’ab, ban saellana jareya laju abali ka Betlehem. Dhaftar jareya ollena nyonto dhari catheddan kona.
22(4:21)
23Reng-oreng jareya kabbi daddi tokang gabayya gendhi ban pennay se eagemma rato, sarta abengko e kottha Neta’im ban Gedera.
24Simeyon kaagungan pottra lalake’ kalema iya areya: Nemuwel, Yamin, Yarib, Zerah ban Saul.
25Toronanna Saul iya areya: Salum, Mibsam, Misyma, Hamuwel, Zakur, Simei.
26(4:25)
27Simei kaagungan pottra dhu lekor: nem bellas lalake’ ban nem-ennem babine’. Tape la-balana Simei sakone’ pottrana. Toronanna Simeyon bannya’na ta’ akantha toronanna Yehuda.
28Sampe’ ka jamanna Rato Daud, toronanna Simeyon abengko e tha-kottha reya: Bersyeba, Molada, Hazar-Suwal,
29Bilha, Ezem, Tolad,
30Betuwel, Horma, Ziklag,
31Bet-Markabot, Hazar-Susim, Bet-Biri ban Sa’ara’im.
32Reng-oreng jareya abengko keya neng e lema’ kennengngan laenna, iya areya Etam, Ain, Rimon, Tokhen, Asan,
33ban e pong-kampong e ma’-semma’na kennengngan jareya, jauna sampe’ gan kottha Ba’al e bagiyan bara’ dhaja. Kantha jareya catheddan se badha e toronanna Simeyon parkara silsila ban tha-kottha se ekennengnge reng-oreng jareya.
34Areya’ nyamana la-kapala kaom e dhalem suku Simeyon: Mesobab, Yamlekh, Yosa ana’na Amaziya, Yowël, Yehu pottrana Yosibiya (Yosibiya reya pottrana Seraya, bajana Asiyel). Elyoënai, Ya’akoba, Yesohaya, Asaya, Adiyel, Yesimiyel, Benaya, Ziza ana’na Sifei (garis silsila dhari Sifei ka attas iya areya: Alon, Yedaya, Simri, Semaya). Sarrena kalowargana reng-oreng jareya terros atamba,
35(4:34)
36(4:34)
37(4:34)
38(4:34)
39daddi reng-oreng jareya mencar ka bara’ sampe’ ka seddi’na kottha Gedor se badha e settong cora. E bagiyan temorra cora jareya reng-oreng buru nemmo talon pangowanan se landhu sarta lebar ban ta’ ramme, daddi cocok kaangguy ebinna. Lamba’ dhaera jareya ekennengnge reng-oreng Ham se odhi’na rokon.
40(4:39)
41E jamanna Hizkiya, rato Yehuda, toronanna Simeyon se kasebbut e attas jareya alorok Gedor. Mah-kemahna pandhudhu’ kottha ban oreng Meunim epaancor kabbi, dineng reng-orengnga padha eojuk. Saellana jareya tanana laju ekennengnge sabab bannya’ talonna se ekaparlo kaangguy pangowananna ebinna.
42Lema ratos oreng laenna dhari suku Simeyon ngalle ka Edom e temor, epimpin tra-pottrana Yisei, iya areya Pelaca, Ne’arya, Refaya ban Uziyel.
43Reng-oreng jareya mate’e re-karena oreng Amalek se gi’ odhi’, laju terros neptep e jadhiya salanjangnga.