1Saellana mare se maddek Padalemman Socce jareya, Rato Sulaiman laju nyempen e dhang-gudhangnga padalemman jareya sakabbinna salaka, emmas ban rang-barang laenna se bi’ Daud ramana la eatorragi ka PANGERAN.
2Saellana jareya Rato Sulaiman laju makon para pamimpinna suku ban kaom dhari bangsa Isra’il akompol e Yerusalim parlo epangalleya Petthe Parjanjiyanna PANGERAN dhari Siyon, Kottha Daud ka Padalemman Socce.
3Reng-oreng jareya padha dhateng teppa’na Are Raja Ranggun Dhaun.
4Saellana reng-oreng jareya akompol, Petthe Parjanjiyan jareya laju eangko’ bi’ reng-oreng Lewi,
5egiba ka Padalemman Socce. Kemah Socce ban parlengkabanna egiba keya ka Padalemman Socce, eangko’ bi’ para imam sarta reng-oreng Lewi.
6Rato Sulaiman ban ra’yat Isra’il akompol kabbi e adha’na Petthe Parjanjiyan jareya, laju ngatorragi ka PANGERAN dumba ban sape se ta’ kabitong bannya’na.
7Saellana jareya Petthe Parjanjiyan jareya bi’ para imam epamaso’ ka dhalem Padalemman Socce, esaba’ e baba’anna arcana kerub e dhalem Rowang Se Mahasocce.
8Kalembangnga ca-arca jareya menthang notobi petthe jareya ban ju-kaju pekolanna.
9Kol-pekolla jareya ce’ lanjangnga, sampe’ co’-konco’na etangale’e dhari adha’na Rowang Se Mahasocce, tape ta’ etangale’e dhari lowar. (Sampe’ sateya ju-kaju jareya gi’ badha e jadhiya.)
10E dhalem Petthe Parjanjiyan jareya tadha’ pa-apana kajabana papan bato dhadhuwa’. To-bato jareya epamaso’ ka jadhiya bi’ Mosa e Gunong Sinay, e bakto PANGERAN abadhi parjanjiyan ban bangsa Isra’il e dhalem parjalanan dhari Messer ka nagara Kana’an.
11Sakabbinna imam se badha e jadhiya, dhari sakabbinna galumpo’, la asadhiya se mabadha’a opacara jareya. Sakabbinna tokang nyanye ban tokang mosik e dhalem suku Lewi, iya areya Asaf, Heman, Yedutun ban sakabbinna anggotana kaomma, padha ngangguy kalambi dhari kaen linen. Reng-oreng Lewi jareya manjeng e temorra mezba sambi neggu’ simbal ban calempong. E jadhiya badha keya imam saratos dhu polo oreng se padha nope tarompet. Sowarana para tokang nyanye abareng ban monyena tarompet ban simbal sarta mosik laenna. Nyanyeyanna reng-oreng jareya se amolja’agi PANGERAN monyena kantha reya: "Poji PANGERAN, sabab Pangeran reya sae. Kataresna’anna langgeng tadha’ aherra." E bakto para imam kalowar dhari Padalemman Socce jareya, o-tao padalemman jareya tera’ ban sonar kahadiranna PANGERAN, sampe’ mam-imam jareya ta’ ngenneng nerrossagi opacara jareya.
12(5:11)
13(5:11)
14(5:11)