Alkitab Mobile SABDA
[VER] : [MADURA]     [PL]  [PB] 
 <<  Kejadian 11 >> 

1Dha’-adha’na manossa e dunnya reya pera’ andhi’ settong basa sarta padha oca’na.

2E bakto reng-oreng jareya alalana ka temor, laju napa’ ka settong tana e Babilonia, tana jareya laju ekennengnge.

3E settong are reng-oreng jareya ngoca’ kantha reya, "Mara ja’ agabaya bata, pas obbar pagali." Reng-oreng jareya pas agabay bata, ekagabaya bengko, sarta agabay etter se egabay panyekka’na to-bato jareya.

4Ca’na reng-oreng jareya pole, "Sateya mara ja’ maddegga kottha, pobuwi manara se tenggina napa’ ka langnge’, sopaja sengko’ ban ba’na bisa’a kasohor ban ta’ sa-tapesa pole e bume reya."

5PANGERAN toron ngoladi kottha ban manara gabayanna manossa jareya,

6pas adhabu, "Reng-oreng reya asalla dhari settong bangsa se pera’ ngangguy settong basa; areya coma parmola’anna sabarang se bakal elakonana reng-oreng jareya. Ta’ saapa pole abidda reng-oreng jareya bakal bisa’a ngalakone apa’a bai se ekaterrowe.

7Daddi mara ja’ torona, basana reng-oreng jareya pasalbut sampe’ oreng se settong ta’ ngarte ka cacana oreng settonga."

8Daddi bi’ PANGERAN reng-oreng jareya epasalebbudan ka saantero bume. Se maddek kottha ta’ epaterros.

9Jareya sababba arapa kottha jareya me’ sampe’ sateya enyamae Babil, sabab e jadhiya PANGERAN masalbut basana manossa, ban dhari jadhiya sa-bangsa padha asalebbudan ka sabingkerra bume.

10Areya’ toronanna Sem. Dhu taon saellana banjir raja rowa, e bakto aomor saratos taon, Sem andhi’ ana’ lalake’ nyamana Arpakhsad.

11Saellana jareya Sem gi’ odhi’ lema ratos taon aggi’ sarta gi’ andhi’ ana’ lalake’ ban babine’ en-laenna pole.

12E bakto aomor tello polo lema’ taon Arpakhsad andhi’ ana’ lalake’ nyamana Selah.

13Saellana jareya Arpakhsad gi’ odhi’ pa’ ratos tello’ taon aggi’, sarta gi’ andhi’ ana’ lalake’ ban babine’ en-laenna pole.

14E bakto aomor tello polo taon Selah andhi’ ana’ lalake’ nyamana Eber.

15Saellana jareya Selah gi’ odhi’ pa’ ratos tello taon aggi’, sarta gi’ andhi’ ana’ lalake’ ban babine’ en-laenna pole.

16E bakto aomor tello polo empa’ taon Eber andhi’ ana’ lalake’ nyamana Peleg.

17Saellana jareya Eber gi’ odhi’ pa’ ratos tello polo taon aggi’, sarta gi’ andhi’ ana’ lalake’ ban babine’ en-laenna pole.

18E bakto aomor tello polo taon, Peleg andhi’ ana’ lalake’, nyamana Rehu.

19Saellana jareya Peleg gi’ odhi’ dhu ratos sangang taon aggi’, sarta gi’ andhi’ ana’ lalake’ ban babine’ en-laenna pole.

20E bakto aomor tello polo dhuwa’ taon Rehu andhi’ ana’ lalake’ nyamana Serug.

21Saellana jareya Rehu gi’ odhi’ dhu ratos petto’ taon aggi’, sarta gi’ andhi’ ana’ lalake’ ban babine’ en-laenna pole.

22E bakto aomor tello polo taon Serug andhi’ ana’ lalake’ nyamana Nahor.

23Saellana jareya Serug gi’ odhi’ dhu ratos taon aggi’, sarta gi’ andhi’ ana’ lalake’ ban babine’ en-laenna pole.

24E bakto aomor sangang lekor taon Nahor andhi’ ana’ lalake’ nyamana Terah.

25Saellana jareya Nahor gi’ odhi’ saratos sangang bellas taon aggi’, sarta gi’ andhi’ ana’ lalake’ ban babine’ en-laenna pole.

26E bakto aomor pettong polo taon Terah andhi’ ana’ lalake’ katello, iya areya Abram, Nahor ban Haran.

27Areya’ toronanna Terah, iya areya eppa’na Abram, Nahor ban Haran. Haran andhi’ ana’ lalake’, nyamana Lud.

28Haran mate e tana kalahiranna, iya areya e Ur e Babilonia, e bakto jareya eppa’na gi’ odhi’.

29Abram araji Sarai, ban Nahor araji Milka ana’na Haran. Haran gi’ andhi’ ana’ lalake’ laen, nyamana Yiska.

30Sarai jareya jubeng, ta’ bisa kaagungan pottra.

31Terah ngalle dhari Ur e Babilonia abareng ban Abram pottrana, Lud bajana, sarta Sarai mantona, iya areya rajina Abram. Maksodda ngalleya ka Kana’an. Tape sanapa’na ka Haran pas ambu sarta laju ako-bengko e jadhiya.

32Terah seda e jadhiya e bakto yuswana dhu ratos lema’ taon.


  Share Facebook  |  Share Twitter

 <<  Kejadian 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel