Alkitab Mobile SABDA
[VER] : [MADURA]     [PL]  [PB] 
 <<  Kejadian 12 >> 

1PANGERAN adhabu ka Abram, "Dina’agi nagarana ba’na jareya, bariya keya la-balana ban bengkona eppa’na, pas mangkat ka nagara laen se bi’ Sengko’ eduduwagiya ka ba’na.

2Bi’ Sengko’ ba’na eberri’ana na’ poto sabannya’na, ban na’ potona ba’na bakal daddiya bangsa raja. Bi’ Sengko’ ba’na eberkadana, ban nyamana epakalonta’a, ban ba’na bakal madhatengnga berkat ka oreng laenna.

3Sengko’ aberkadana reng-oreng se aberkadi ba’na, ban abastowa reng-oreng se abasto ba’na. Ban polana ba’na, Sengko’ aberkadana sakabbinna bangsa e bume reya."

4Daddi Abram laju mangkat dhari Haran menorot se edhabuwagi PANGERAN. Lud noro’ keya. E bakto jareya yuswana Abram pettong polo lema’ taon.

5Abram abakta rajina se anyama Sarai, ponakanna se anyama Lud, bariya keya sakabbinna dhi’-andhi’na ban nor-dunorra se ollena makompol e Haran. Abram sabalana laju mangkat ka tana Kana’an. Sanapa’na ka Kana’an

6Abram meyos san-kassannagi e nagara jareya, sampe’ napa’ ka settong kajuwan se karamat e Moreh, iya areya kennengnganna oreng ajalannagi kabakteyan e Sikhem. (E bakto jareya nagara jareya gi’ ekennengnge oreng Kana’an.)

7PANGERAN ngaton ka Abram pas adhabu, "Nagara reya bi’ Sengko’ ebagiya ka ba’na sana’potona." Abram pas abadhi mezba e jadhiya, eatorragi ka PANGERAN se ngaton ka salerana jareya.

8Saellana jareya Abram meyos terros ka lao’, ka bagiyan se bannya’ gunongnga e temoranna kottha Betel. E jadhiya Abram laju maddek kemah e bagiyan se badha e temorra Betel ban e bara’na kottha Ai. Laen dhari jareya Abram abadhi keya mezba sarta pas abakte ka PANGERAN.

9Saellana jareya Abram laju nerrossagi parjalananna dhari settong kennengngan ka kennengngan laenna ka tana Negeb e bagiyan lao’na Kana’an.

10E bakto e Kana’an badha laep raja, Abram laju meyos dha’ lao’ sampe’ napa’ ka Messer, maksodda ngongseya sampe’ laep jareya mare.

11E bakto napa’ ka batessa Messer, Abram adhabu ka Sarai, rajina, "Ba’na reya raddin, le’.

12Mon oreng Messer nangale’e ba’na, tanto padha nyangka ja’ ba’na tang bine, sengko’ tanto pas epate’e, tape ba’na ta’ epama-baramma.

13Daddi ba’na ngako tang ale’ bai, sopaja polana ngabas ba’na sengko’ ta’ epate’e ban etarema kalaban bagus."

14Bendher onggu, saellana maso’ ka Messer, reng-oreng Messer nangale’e ja’ Sarai reya ce’ raddinna.

15Ba-ponggaba karaton se nangale’e Sarai jareya mator ka ratona ja’ rajina Abram jareya ce’ raddinna; daddi Sarai pas egiba ngadhep ka karaton.

16Rato Messer narema Abram kalaban bagus polana terro ka babine’ jareya. Abram eparenge dumba ban embi’, sape ban hemar, onta ban nor-dunor lalake’an ban babine’an.

17Tape polana Sarai ekabine rato, PANGERAN madhateng panyaket se nako’e, se ekenneng panyaket jareya iya areya rato ban reng-oreng se badha e karaton.

18Abram edikane bi’ rato. Dhabuna rato ka Abram, "Ba’na reya baramma? Me’ ta’ abala ja’ babine’ reya binena ba’na?

19Arapa bi’ ba’na me’ eako taretanna sampe’ ekabine bi’ sengko’? Sateya, reya’ giba binena, pas ondur dhari dhinna’."

20Rato makon ba-ponggabana ngaterragi Abram kalowar dhari nagarana, abareng ban rajina sarta abakta sakabbinna dhi’-andhi’na.


  Share Facebook  |  Share Twitter

 <<  Kejadian 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel