Alkitab Mobile SABDA
[VER] : [MADURA]     [PL]  [PB] 
 <<  Kejadian 41 >> 

1Saellana olle dhu taon, rato Messer asopenna, pangrasana akantha se ngadek e penggirra Songay Nil.

2E bakto jareya laju badha sape papetto’ kalowar dhari songay. Sapena po-lempo, kole’na ngennyer. Sape jareya padha ngakan rebba e penggirra songay.

3Saellana jareya laju badha sape laen, bannya’na papetto’ keya. Badanna koros, kare tolang ban kole’. Pe-sape se koros jareya nyander ka pe-sape se lempo, manjeng e seddi’anna, e penggirra songay gella’.

4Pe-sape se lempo gella’ ekakan bi’ pe-sape se koros sampe’ tadha’ kabbi. Saellana jareya rato laju abungo.

5Rato buru laju tangeddha pole, sarta asopenna pole. Pangrasana badha gandum sabungka abuwa pettong gagang, padha ras-merras ban la towa.

6Ta’ abit pas nyolbu’ gandum pettong gagang pole, kabbi padha kepa’ tor kero’ ekenneng angen dhari sagara beddhi.

7Gandum se ras-merras gella’ ekakan bi’ gandum se kepa’ sampe’ epatadha’. Rato abungo, laju apangrasa ja’ salerana asopenna.

8Kalagguwanna rato jareya ngalengsang, daddi laju makon adikane sakabbinna tokang tennongnga ban sakabbinna oreng se penter e sanagara Messer. Rato notorragi sopennana, tape kabbi padha tadha’ se taowa ngarte’e.

9Tokang gabayya nom-enomanna rato laju mator ka ratona, "Samangken abdidalem tapaksa mator ja’ abdidalem gadhuwan sala.

10Junandalem oneng duka ka abdidalem sareng ka kapalana tokang roti. Abdidalem, jugan kapalana tokang roti, sareng junandalem laju epamaso’ ka penjara e compo’epon kapalana pangawalla karaton.

11E settong malem kapalana tokang roti sareng abdidalem padha amempe, dineng mempeepon kapalana tokang roti sareng mempe abdidalem ta’ padha artena.

12E penjara ka’dhissa’ badha oreng lalake’ Ibrani, gi’ ngodha, dunorrepon kapalana pangawalla karaton. Kapalana tokang roti sareng abdidalem padha notorragi mempe gella’ ka oreng Yahudi gapaneka; sareng oreng gapaneka laju eparenge oneng artena.

13Sadajana cocok akadi se ekoca’agi oreng gapaneka: sareng junandalem abdidalem epabali ka lalakon se asal, dineng kapalana tokang roti ka’dhissa’ eokom mate."

14Rato makon oreng ngone’e Yusup. Sanatkala jareya keya Yusup epakalowar dhari penjara. Obu’na ecokor, kalambina esalene. Samarena pas egiba ngadhep ka rato.

15Dhabuna rato, "Sengko’ amempe tape tadha’ oreng se taowa artena. Sengko’ ngedhing kabar ja’ ba’na tao ngarte’e mempe."

16Atorra Yusup, "Manabi abdidalem ta’ oneng, guste. Namong Guste Allah se badhi nerrangngagiya arteepon."

17Rato adhabu, "Sengko’ amempe manjeng e penggirra Songay Nil.

18E bakto jareya pangrasana badha sape papetto’ kalowar dhari songay. Sapena po-lempo, kole’na ngennyer. Sape jareya padha ngakan rebba e penggirra songay.

19Saellana jareya pas badha sape laen, bannya’na papetto’ keya. Badanna koros, kare kole’ ban tolang. Sajjegga odhi’ sengko’ ta’ tao nangale’e sape se juba’na kantha jareya e sanagara Messer reya.

20Sape se po-lempo jareya ekakan kabbi bi’ pe-sape se koros sampe’ tadha’ karena.

21Tape pe-sape se koros jareya gi’ paggun koros. Samarena jareya sengko’ pas ngedhing.

22Ta’ sabarampa abidda sengko’ tatedhung pole sarta pas amempe pole. Pangrasana sengko’ nangale’e badha gandum sabungka abuwa pettong gagang, padha ras-merras ban la towa.

23Ta’ abit pas nyolbu’ gandum pettong gagang pole, kabbi padha kepa’ tor kero’ ekenneng angen dhari sagara beddhi.

24Gandum se ras-merras gella’ ekakan bi’ gandum se kepa’ sampe’ epatadha’. Tang mempe jareya bi’ sengko’ la etotorragi ka kang-tokang tennong, tape tadha’ se taowa ngarte’e."

25Atorra Yusup, "Sopenna se dhu macem ka’dhinto arteepon padha; Guste Allah apareng oneng ka junandalem ponapa se bakal elampa’agiya.

26Sape papetto’ se po-lempo arteepon pettong taon, ban gandum se pettong gagang arteepon pettong taon jugan. Arteepon padha.

27Sape se koros se papetto’ se kalowar jang bingkengan, sareng gandum pettong gagang se kepa’ sareng kero’ polana ekenneng angen dhari sagara beddhi, arteepon mosem laep se pettong taon abittepon.

28Kadi se ampon eatorragi sareng abdidalem gella’, Guste Allah apareng oneng ka junandalem ponapa se bakal elampa’agiya.

29Pettong taon abittepon nagara Messer badhi ma’mora.

30Salastarena pas badhi dhatengnga mosem laep se abittepon pettong taon jugan. Jaman ma’mor gapaneka bakal ta’ ekaemodana oreng sabab mosem laeppepon talebat sarana, kantos sanagara tadha’ bu-tombuwan sakale.

31(41:30)

32Junandalem asopenna dhu kale, arteepon: Allah ampon neptebbagi ponapa se badhi elampa’agiya, sarengngan pole parkara gapaneka badhi kalakona ta’ abit pole.

33Samangken langkong sae junandalem mele oreng se penter sareng bicaksana, parenge kakobasa’an ngator nagara.

34Junandalem jugan kodu ngangkat ba-ponggaba laennepon. Ba-ponggaba gapaneka parenge kakobasa’an makompol saparlemanna hasellepon palabija saabidda jaman ma’mor se pettong taon gapaneka. Palabija se ampon epakompol gapaneka pakon tompo’ e tha-kottha sareng pakon jaga.

35(41:34)

36Gandum gapaneka parlo ebadhi teddha’an saabittepon mosem laep se pettong taon e Messer. Kalaban jalan kadi gapaneka ra’yat Messer bakal lopoda dhari kalaparan."

37Rato ban ba-ponggabana padha nganggep panemmona Yusup jareya teppa’.

38Dhabuna rato ka ba-ponggabana jareya, "Ta’ kera badha oreng laen se ateppa’an dhari Yusup, sabab Yusup reya etolonge Erroh Allah dibi’."

39Dhabuna rato ka Yusup, "Bi’ Allah ba’na la eparenge ngataowe parkara reya kabbi, daddi terrang ba’na reya apenterran ban lebbi bicaksana etembang bi’ reng-oreng laenna.

40Bi’ sengko’ ba’na epassra’ana tang nagara, orossagi pateppa’. Tang ra’yat kabbi bakal atoro’a ka parentana ba’na. Pera’ sengko’ malolo se lebbi kobasa dhari ba’na. Sateya bi’ sengko’ ba’na epadaddiya gubennor Messer."

41Saellana jareya rato mokka’ sesserra dhari rajunganna. Sesser jareya eoker epasange satempella karaja’an. Saellana ebukka’, sesser jareya laju epobu ka rajunganna Yusup sambi adhabu, "Sateya bi’ sengko’ ba’na epadaddi gubennor Messer." Saellana jareya Yusup laju epangagem juba linen se alos, epobuwagi rato dibi’, sarta pas ekalonge rantay emmas.

42(41:41)

43Samarena, Yusup laju eparenge kareta karaja’an se nomer dhuwa’ menangka teteyanna; pangawal kahormadanna rato ajalan e adha’anna kareta jareya sambi ra’-era’an, "Menggir! Menggir!" Daddi Yusup la epadaddi gubennor sanagara Messer.

44Dhabuna rato ka Yusup, "Sengko’ reya rato — ban sateya sengko’ ngomommagi ja’ sapa’a bai se badha e Messer reya ta’ olle ngalakone apa’a bai mon ta’ olle edi dhari ba’na."

45Bi’ rato jareya Yusup laju eparenge asma Messer, iya areya Zafnat-Pa’aneah. Laen dhari jareya Yusup eparenge raji se asmana Asnat, pottrana Potifera se daddi imam e kottha Heliopolis. Yusup yuswana tello polo taon e bakto molae ngalampa’agi lalakonna menangka pangabdiyanna ka rato Messer. Yusup mangkat dhari karaton terros alengleng e saanterona nagara.

46(41:45)

47E dhalem bakto pettong taon se ma’mor, hasella tana wa-ngalowa.

48Hasella gandum jareya bi’ Yusup epakompol, esaba’ e tha-kottha. E saneyap kottha esempen gandum hasella gal-teggal e sabingkerra.

49Gandum ollena makompol jareya talebat bannya’na, akantha bannya’na beddhi e penggir tase’, daddi bi’ Yusup la ta’ etaker pole.

50Sabellunna mosem laep jareya molae, Yusup kaagungan pottra lalake’ kadhuwa dhari rajina se anyama Asnat.

51Dhabuna Yusup, "Bi’ Allah sengko’ la epaloppa ka sakabbinna tang kasangsara’an ban ka la-balana tang eppa’." Daddi pottrana se nomer settong jareya eparenge nyama Manasye.

52Yusup adhabu kantha reya keya, "Bi’ Allah sengko’ eparenge ana’ dhadhuwa’ e dhalem tang kasossa’an," daddi pottrana se nomer dhuwa’ jareya eparenge nyama Efraim.

53Bakto pettong taon e dhalem kama’moran se ekarassa’agi ne’madda e nagara Messer la lebat.

54Mosem laep se pettong taon abidda molae dhateng, cocok akantha se la edhabuwagi Yusup. E nagara en-laenna e dunnya oreng padha kalaparan, tape e Messer badha parsadhiya’anna kakanan.

55E naleka ra’yat Messer molae kalaparan, kabbi laju padha nyo’on gandum ka rato. Bi’ rato reng-oreng jareya epakon nyabis ka Yusup, sarta epakon atoro’ ka pa-apa se edhabuwagi Yusup.

56Kalaparan jareya atamba sara tor balattra daddi sanagara, daddi Yusup molae mokka’ sakabbinna gudhang, sarta ajuwal gandum ka reng-oreng Messer.

57Dhari man-dhimman e sabingkerra bume reng-oreng entar ka Messer melleya gandum ka Yusup, sabab kalaparan jareya neng e man-dhimman pajat ce’ sarana.


  Share Facebook  |  Share Twitter

 <<  Kejadian 41 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran