Dual Panel1Jaburra Asaf: settong nyanyeyan. (83-2) Ya Allah, ngereng ja’ mendel saos, ta’ abu-dhabu sakale, ja’ mendel saos, ta’ nolonge sakale.
2(83-3) Ngereng oladi, so-mosona Junandalem baridhu, reng-oreng se baji’ ka Junandalem padha aberonta’.
3(83-4) Reng-oreng gapaneka gadhuwan sajja se salenter macalaka’a ommattepon Junandalem; padha aparembagan macalaka’a reng-oreng se eaobi Junandalem.
4(83-5) Ca’epon reng-oreng gapaneka, "Mara paancor reng-oreng Isra’il, me’ olle nyamana ta’ ekaenga’e oreng pole."
5(83-6) Sa-bangsa padha asakongkel, amopakat alabana ka Junandalem:
6(83-7) bangsa Edom sareng Isma’il, oreng Mo’ab sareng Hagar;
7(83-8) bangsa Gebal, Amon sareng Amalek, bangsa Filistea sareng pandhudhu’ Tirus.
8(83-9) Jugan Asyur agabung sareng reng-oreng gapaneka, daddi soko tanangnga toronanna Lud.
9(83-10) Reng-oreng gapaneka pakadi reng-oreng Midian, Guste, jugan pakadi Sisera sareng Yabin e Songay Kisyon,
10(83-11) se padha epaancor e Endor, sareng padha daddi buthogga tana.
11(83-12) Pin-pamimpinna pakadi Oreb sareng Ze’eb, para pangobasana pakala akadi Zebah sareng Salmuna,
12(83-13) sabab reng-oreng gapaneka ngoca’ sapaneka, "Mara kobasae tana kalenggiyanna Allah."
13(83-14) Ya Allah, panabuyyagi reng-oreng gapaneka pakadi abu, pakadi darameyan se eketbat angen.
14(83-15) Akadi apoy se ngello’ alas, akadi apoy se rabbang makatonon nong-gunong.
15(83-16) Serser reng-oreng gapaneka sareng ojan angen sale’bung, pangejjit sareng kaleng busbus.
16(83-17) Ya Allah, PANGERAN, diggal reng-oreng gapaneka me’ olle eya-seya, Guste, sopaja padha ngakone kakobasa’annepon Junandalem.
17(83-18) Diggal reng-oreng gapaneka me’ olle epamalo sareng katako’en salanjangnga, me’ olle padha mate nespa.
18(83-19) Moga reng-oreng gapaneka eparengngana oneng ja’ namong Junandalem Se Mahatenggi, PANGERAN, se ngobasane bume.