Dual Panel1Bowas entar ka kennengnganna kompolan e labang sakethengnga kottha. Saellana toju’ e jadhiya Bowas nangale’e oreng lalake’ se menorot Bowas balana Elimelekh se paleng semma’. Bowas pas ngolok oreng jareya, "Taretan, tore agi-lenggi e ka’dhinto." Oreng jareya nyander, pas toju’ e jadhiya.
2Bowas pas ngajak pamimpinna masarakat sapolo oreng esoro toju’ e jadhiya keya. Saellana kabbi padha toju’,
3Bowas ngoca’ ka oreng se gi’ sabala’an ban aba’na jareya, oca’na, "Na’omi ampon abali dhari nagara Mo’ab. Samangken ajuwala tana gadhuwanna almarhum Elimelekh, balana sampeyan sareng kaula.
4Ca’na kaula sampeyan kodu oneng parkara ganeka. Samangken, manabi tana ganeka eobangana sampeyan, ngereng dhabuwagi e adha’na ca-kanca se padha alenggi e ka’iya paneka. Mon bunten, ngereng adhabu rang-terrangan, sabab coma sampeyan sareng kaula se gadhuwan ha’ ngobange tana ganeka, sampeyan se nomer settong, kaula se nomer dhuwa’." Ca’na lalake’ jareya, "Diggal ebelliya kaula."
5Ca’na Bowas, "Sae. Namong, manabi sampeyan ngobangana tanana Na’omi, Errut, babine’ Mo’ab, randhana ana’na Na’omi ka’issa’ kodu epondhut jugan sareng sampeyan, sabab tana ganeka kodu teptep daddi andhi’na toronanna oreng se adinggal omor ka’issa’."
6Saodda oreng jareya, "Mon sapaneka, kaula ta’ poron. Dinggal kaula aleppasa ha’ kaula menangka oreng se nomer settong kaangguy ngobange tana ganeka. Tadha’ gunana kaula ngobange tana ganeka, ta’ kera bisa ekaandhi’ na’ poto kaula. Obange sampeyan saos."
7E jaman jareya, mon oreng awal-juwal otaba rop-poroban dhi’-andhi’na, kaangguy ngessa’agi orengnga se ajuwal kodu mokka’ sandhalla, ban sandhalla jareya kodu ebagi ka se melle. Kantha jareya carana oreng e Isra’il ngessa’agi orosan juwal belli.
8Daddi, e bakto lalake’ gella’ ngoca’ ka Bowas, "Obange sampeyan saos," oreng jareya mokka’ sandhalla laju ebagi ka Bowas.
9Ca’na Bowas ka para pamimpinna masarakat ban reng-oreng se badha e jadhiya kabbi, "Are mangken sampeyan padha daddi sakse ja’ kaula ampon ngobange dhari Na’omi sadaja se ekaandhi’ almarhum Elimelekh sareng tra-pottrana enggi paneka Kilyon sareng Mahlon.
10Laen dhari ganeka kaula narema’a randhana Mahlon, enggi paneka Errut oreng Mo’ab ka’issa’ menangka raji kaula. Kalaban cara paneka tana se eobange kaula ganeka bakal teptebba daddi andhi’na ana’ binena oreng se ampon adinggal omor. Jugan na’ potona bakal terrosa badha e antarana la-balana sareng e kotthana. Senga’ tan-taretan, e are mangken sampeyan sadaja daddi saksena."
11Para pamimpinna masarakat ban reng-oreng se badha e jadhiya kabbi padha ngoca’, "Enggi, kaula saksena. Moga-moga rajina sampeyan bi’ PANGERAN eparengngana daddi akadi Rahel sareng Liya se ngalahirragi pottrana Yakub kantos sabannya’na. Moga-moga sampeyan eparengngana ma’mor odhi’na e antarana reng-oreng kaom Efrata sarengngan moga sampeyan kasohora e Betlehem.
12Moga-moga tra-pottrana sampeyan se eparengngagiya PANGERAN kalaban parantara’anna babine’ ganeka andaddiyagi essena compo’na sampeyan akadi Peres, pottrana Yehuda sareng Tamar."
13Daddi Bowas laju akabin ban Errut. Errut eberkadi PANGERAN, daddi pas ngandhung sarta rembi’ lalake’.
14Ca’na babine’an e kottha jareya ka Na’omi, "Molja’agi PANGERAN! Sabab e are mangken paneka PANGERAN marenge kompoy lalake’ ka sampeyan se bakal meyara’a sampeyan. Moga kana’ ganeka kasohora e Isra’il!
15Mantona sampeyan ce’ neserra ka sampeyan. Se etarema sampeyan dhari Errut ngalebbi’i dhari se ekenneng tarema sampeyan dhari oreng lalake’ kapetto. Samangken sampeyan ampon olle kompoy lalake’ dhari Errut; kana’ ganeka bakal mabaliya samangadda sampeyan, ban se bakal meyara’a sampeyan mon ampon towa."
16Na’omi ngemban kana’ jareya sarta meyara kana’ jareya, atena arassa ce’ leburra ban ce’ neserra ka kana’ jareya.
17Bi’ ga-tatangga babine’anna kana’ jareya enyamae Obed. Mon tatemmo ban sapa’a bai, ga-tatangga babine’anna jareya ngoca’, "Na’omi la andhi’ ana’ lalake’!" Obed reya se e budhi are daddi ramana Isay, ban Isay jareya ramana Daud.
18Areya’ garis toronanna Daud, molae dhari Peres: Peres, Hezron, Ram, Aminadab, Nahason, Salmon, Bowas, Obed, Isay, Daud.
19(4:18)
20(4:18)
21(4:18)
22(4:18)