Dual Panel1Areya’ pessen parkara Tirus. He, para bandhiga Tarsis se alajar e tase’ raja, mara nanges! E bakto alajar moleya dhari Siprus, ba’na badha se malae ja’ Tirus la ancor. Kottha palabbuwan ban ko-bengkona ba’na la padha ancor, gujur tadha’ karena.
2Mara aserro, reng-oreng paseser, gar-sodagar Sidon! Sabab biyasana ba’na ngerem reng-oreng epalengka tase’ kaangguy ajuwal belli gandum Messer sarta adaganga ban sakabbinna bangsa.
3(23:2)
4E kottha Sidon, kahormadanna ba’na la elang! Tase’ raja ta’ ngakone ba’na pole, oca’na, "Sengko’ ta’ tao andhi’ ana’, ta’ tao maraja ana’ lalake’ otaba babine’."
5La’-mala’ oreng Messer bakal takerjada ban daddi ramme mon ngedhing ja’ Tirus la tompes.
6Mara nanges, ngongse ka Tarsis, e, reng-oreng paseser!
7Abassagi kotthana ba’na Tirus se la badha dhari jaman lamba’. Jareya, ya, kottha se biyasana ekennengnge oreng neng-sennengngan? Jareya, ya, kottha se ngerem reng-oreng epalengka tase’ epaennengnga e nagarana oreng?
8Gar-sodagarra gu ta’ kaom oreng agung se paleng ehormadi e bume, ta’ iya? Sapa se motossagi maancora Tirus, kottha se paleng kobasa jareya?
9PANGERAN Se Mahakobasa se motossagi jareya, polana maambuwa kasombonganna pandhudhu’na lantaran hasel se ekaolle reng-oreng jareya, sarta ngapessagi reng-oreng se ehormadi e bume.
10Kassa’ garap teggalla, pandhudhu’ Tarsis, sabab kennengnganna agabay kapal la tadha’.
11PANGERAN la mangaceng astana e attassa tase’ magulu’ karaja’an-karaja’an. Pangeran apareng papakon sopaja teng-binteng Funisia epamosna.
12Dhabuna PANGERAN, "E kottha Sidon, ba’na ta’ kera neng-sennengngan pole. Pandhudhu’na ba’na enyek-enyek. Maske ngongseya ka Siprus sakale, reng-oreng jareya ta’ kera aman."
13(Banne bi’ bangsa Asyur, tape bi’ bangsa Babil kottha Tirusedina ekobasae burun alas. Bangsa Babil jareya keya se maddek ra-manara pangeppongan, magujur teng-bintengnga ban marosak kottha jareya epadaddi jur-gujuran.)
14Mara nanges, para bandhiga! Kottha se eandellagi ba’na la ancor.
15Bakal napa’a baktona Tirus ta’ ekaenga’e oreng pettong polo taon abidda, padha ban omorra rato. Mon bakto jareya la lebat, Tirus bakal padha’a ban sondel e dhalem nyanyeyan reya:
16Mara ngala’ calempong, alengleng e kottha, e, sondel se palang se ta’ ekaenga’e oreng! Pamonye calempongnga, pas anyanye pole, sopaja ba’na ekaenga’e oreng pole.
17Mon la olle pettong polo taon, PANGERAN bakal ngemodana Tirus sampe’ Tirus bisa abali ka lalakonna se lamba’, iya areya adagang ban sakabbinna karaja’an e bume.
18Kaontonganna se adagang ta’ esempenna, tape eatorragiya ka PANGERAN. Bi’ reng-oreng se nyemba PANGERAN pesse jareya bakal ekabelliya angguy ban kakan se ekaparlo.