Dual Panel1Yusak makompol sakabbinna suku Isra’il e Sikhem. Ja-pangrajana, para pamimpinna, kim-hakimma ban para parwirana epakon ngadhep kabbi. Daddi reng-oreng jareya pas ngadhep ka Allah.
2Dhabuna Yusak ka reng-oreng jareya kabbi, "Mara edhingngagi apa dhabuna Allah, PANGERANna Isra’il, ka ba’na, ‘Lamba’ bangatowana ba’na enneng e temorra Songay Efrat, sarta nyemba ba-diba. E antarana bangatowana ba’na jareya badha se anyama Terah, ramana Ibrahim ban Nahor.
3Bi’ Sengko’ Ibrahim, bangatowana ba’na jareya, egiba dhari temorra Songay Efrat jareya, esoro entar mareksa sabalattrana nagara Kana’an. Ibrahim jareya bi’ Sengko’ epabannya’ toronanna. Dha’-adha’na bi’ Sengko’ eberri’i ana’ Ishak,
4Ishak bi’ Sengko’ pas eberri’i ana’ Yakub ban Esau. Esau eberri’i pagunongan Edom menangka andhi’na dibi’. Tape Yakub, bangatowana ba’na rowa, sana’ potona ngalle ka Messer.
5Samarena jareya Sengko’ ngotos Mosa ban Harun, sarta madhateng acem-macem balai ka Messer.
6Bangatowana ba’na bi’ Sengko’ epakalowar dhari Messer, tape laju eserser bi’ oreng Messer se nompa’ kareta perrang sarta ngeba tantara se nompa’ jaran. Sanapa’na ka Tase’ Galagas,
7bangatowana ba’na aera’ ka Sengko’ menta tolong. Daddi kennengngan e antarana reng-oreng Messer ban reng-oreng Isra’il bi’ Sengko’ epapetteng; reng-oreng Messer bi’ Sengko’ etotobi aeng, sampe’ padha tasellem kabbi. Ba’na tao epabaramma bangsa Messer jareya bi’ Sengko’. Ba’na ce’ abidda badha e sagara beddhi.
8Bi’ Sengko’ ba’na pas egiba ka nagarana bangsa Amori se badha e temorra Songay Yordan. Reng-oreng jareya merrange ba’na, tape bi’ Sengko’ ba’na epamennang. Ba’na arebbu’ nagarana, ban bangsa jareya bi’ Sengko’ epatompes kabbi.
9Saellana jareya, rato Mo’ab se anyama Balak ana’na Zipor rowa merrange ba’na. Rato Balak asorowan ka Bileyam ana’na Beor, esoro abasto ba’na.
10Tape Sengko’ ta’ norodi parnyo’onanna Bileyam, daddi bi’ Bileyam ba’na eberkadi. Daddi bi’ Sengko’ ba’na epasalamet dhari Balak.
11Ba’na pas alengka Songay Yordan, laju napa’ ka Yerikho. Ba’na eperrange bi’ reng-oreng Yerikho, bariya keya bi’ reng-oreng Amori, Feris, Kana’an, Het, Girgasi, Hewi ban oreng Yebus. Tape bi’ Sengko’ ba’na epamennang ka so-mosona jareya.
12E bakto ba’na maju nyerrangnga, so-mosona ba’na bi’ Sengko’ epabingong ban epakatako’en, daddi rato Amori se kadhuwa rowa laju buru. Se mamennang ba’na banne peddhangnga ba’na, bariya keya banne panana.
13Ba’na narema tana se ejanjiyagi Sengko’ ka ba’na ta’ kalaban aseksa. Ban tha-kottha se ebagi Sengko’ ka ba’na, banne ba’na se maddek. Sateya ba’na enneng e jadhiya, kanyamanen ngakan buwana anggur ban buwana jaitun se banne tamennanna ba’na.’"
14"Daddi sateya," dhabuna Yusak pole, "hormadi PANGERAN. Abakte ka Salerana kalaban ehlas ban esto. Panyengla kabbi la’-alla’an se esemba bangatowana ba’na e Mesopotamia ban e Messer lamba’. Abakte ka PANGERAN malolo.
15Saompamana ba’na ta’ endha’ abakte ka PANGERAN, potossagi sateya keya sapa se esemba’a ba’na: la’-alla’an se esemba para bangatowana ba’na e Mesopotamia otabana la’-alla’anna bangsa Amori se nagarana sateya ekennengnge ba’na. Tape sengko’ sabala abakteya pera’ ka PANGERAN malolo."
16Saodda ommat Isra’il, "Abdina sadaja ta’ adinggallagiya PANGERAN kaangguy nyemba’a ka la’-alla’an!
17GUSTE Allah se ampon mabebas para bangatowa abdina sadaja sareng abdina dibi’ dhari odhi’ se ekadunor oreng e Messer. Abdina ampon padha nengale sadajana kaajiban se epabadha sareng PANGERAN. E dhalem parjalanan se ka’dhimma’a saos, lebat e nagarana sa-bangsa manca, abdina sadaja terros elindhunge sareng PANGERAN.
18E bakto abdina sadaja maso’ ka nagara ka’dhinto, sadajana oreng Amori se badha e nagara ka’dhinto eojuk sareng PANGERAN. Daddi, abdina sadaja badi abakteya ka PANGERAN, sabab PANGERAN ka’dhinto Allah abdina."
19Dhabuna Yusak ka reng-oreng Isra’il, "Tape olle daddi ba’na ta’ kera sanggup abakte ka PANGERAN. Sabab PANGERAN reya Allah Se Socce, Allah Se Settong. PANGERAN ta’ kasokan epapadha ban apa’a bai; mon ba’na sampe’ mongkore Salerana ban nyemba ka la’-alla’anna reng-oreng manca rowa, ba’na tanto ta’ esapora. Ba’na tanto eokom epatompes, maske sabbanna PANGERAN reya becce’ terros ka ba’na."
20(24:19)
21Ca’na ommat Isra’il ka Yusak, "Bunten! Abdina sadaja namong abakteya ka PANGERAN, ta’ nyemba’a ka la’-alla’an."
22Dhabuna Yusak, "Daddi ba’na dibi’ menangka sakse ja’ ba’na la mele abakteya ka PANGERAN." "Lerres," ca’na reng-oreng jareya, "abdina saksena."
23"Mon bariya, buwang la’-alla’anna oreng manca se badha e ba’na jareya," dhabuna Yusak, "ban mara ajanji ja’ ba’na kabbi pagguna esto ka PANGERAN, Allahna bangsa Isra’il."
24Ca’na reng-oreng jareya ka Yusak, "Abdina sadaja namong abakteya ka PANGERAN, Allahna panjennengngan sareng abdina, atoro’a ka sadajana papakonna."
25Daddi e are jareya neng e Sikhem Yusak mabadha parjanjiyan ban ommat Isra’il; e jadhiya Yusak manapa’ kom-hokom ban sakabbinna atoran se kodu etoro’ bi’ bangsa Isra’il jareya.
26Sakabbinna hokom ban atoran jareya bi’ Yusak eserrat e dhalem Ketab Hokomma Allah. Yusak pas mondhut bato raja; bato jareya epamanjeng e baba’anna kajuwan e kennengngan se pera’ kaangguy PANGERAN malolo.
27Dhabuna Yusak ka sakabbinna ommat Isra’il, "Bato reya menangka sakse. Sabarang se edhabuwagi PANGERAN, la edhabuwagi e adha’anna bato reya. Daddi, bato reya se daddiya sakse se maenga’a ba’na sopaja ta’ alaban ka Allahna."
28Samarena jareya reng-oreng Isra’il gella’ bi’ Yusak epakon mole; reng-oreng jareya pas abali ka kennengnganna bang-sebang.
29Saellana jareya Yusak, abdina PANGERAN jareya, seda e bakto yuswana saratos sapolo taon.
30Jinazana esareyagi e tana kaagunganna dibi’, iya areya e Timnat-Serah e pagunongan Efraim e dhajana Gunong Ga’as.
31Saabidda Yusak gi’ odhi’, ommat Isra’il abakte ka PANGERAN. Saellana Yusak seda, reng-oreng Isra’il gi’ paggun keya abakte ka PANGERAN, saabidda e antarana reng-oreng jareya gi’ badha pin-pamimpinna se tao nangale’e dibi’ pa-apa se la elampa’agi PANGERAN kaangguy ommat Isra’il.
32Jinazana Yusup, se egiba dhari Messer bi’ reng-oreng Isra’il, esareyagi e Sikhem, neng e tana se eobange Yakub saarga saratos pesse salaka dhari na’-ana’na Hemor, eppa’na Sikhem. Tana jareya esangkollagi ka na’ potona Yusup.
33Saellana jareya Eleyazar pottrana Harun seda keya, sarta esareyagi e Gibeya, iya areya e kottha se badha e dhaera Pagunongan Efraim. Kottha jareya la ebagi ka Pinehas, pottrana Eleyazar.