Alkitab Mobile SABDA
[VER] : [MAKASAR]     [PL]  [PB] 
 <<  1 Samuel 12 >> 

1Nampa nakanamo Samuel mae ri sikontu anjo bansa Israel, "Le’ba’mi kuturuki sikontu pappala’nu, na nia’mo kuangka’ se’re karaeng mae ri kau ngaseng.

2Appakkaramula ri kamma-kammaya anne iami a’jari pamimpinnu. Ciniki, inakke anne toama’ siagang kebo’mi uukku. Sallo sikalima’ a’jari pamimping mae ri kau ngaseng — battu ri rungkaku iji sa’genna kamma-kamma anne.

3Kamma-kammaminne, nakuammenteng ri dallekannu ngaseng! Punna nia’ kasalang le’ba’ kugaukang, tuntu’ma’ ri dallekanNa Batara siagang ri dallekanna karaeng Napilea. Niakka nakule’ba’ angngalle sapi yareka keledai battu ri tau maraengang? Niakka nakule’ba’ annipu yareka anjallakkang tau yareka annarima doe’ pacoco’? Paumi, sollanna akkulle kupoterang manna naapa-apa mamo."

4Appialimi sikamma anjo taua angkana, "Tena, tena le’bakaki’ bapa’ antipui yareka anjallakkangi ikambe. Tena kile’ba’ angngallei apa-apanna manna pole inai."

5Nampa nakanamo Samuel, "Anne alloa, Batara siagang karaeng Napilea a’jari sa’bi angkanaya ma’nassa tena salangku manna pole sike’de’." Appialimi ke’nanga angkana, "Iyo’, kammatojengi, Batara a’jari sa’binta."

6Nampa nakanamo pole Samuel, "Batara ampilei Musa siagang Harun, siagang angngerangi boe-boenu assulu’ battu ri Mesir.

7Kamma-kamma anne teako rolong a’lampai. Lakutuntu’ ngasengko ri dallekanNa Batara. U’rangi sikontu kalammorang pa’mai’Na Batara ia le’baka Napappicinikang ri kau ngaseng siagang mae ri boe-boenu.

8Ri wattunna battu Yakub siagang kaluargana mange ri Mesir, na nijallakkang ke’nanga ri tu Mesir, appala’ tulungi boe-boenu mae ri Batara, nampa Nasuromo battu Musa siagang Harun. Iaminjo tau ruaya angngerangi boe-boenu assulu’ battu ri Mesir, siagang antulungi ke’nanga ammantang ri anne buttaya.

9Mingka ri bokoang allo nakaluppaimi Batara Allata’alana ke’nanga. Lanri kammana, nibalang parekammi ke’nanga na nibunduki siagang nibeta ri Sisera, anjo panglimana tantara Hazor, siagang nibeta ri tu Filistin siagang ri karaeng Moab.

10Nampa appala’ doang ke’nanga mae ri Batara siagang namangakuimi dosa-dosana ke’nanga, angkana, ‘Dorakami ikambe lanri nabokoinTa, o Batara, siagang anynyombami ikambe mae ri patung-patunna Rewata Asytoret siagang Baal. Mingka kamma-kamma anne, Kipasalamaki ikambe battu ri musunna ikambe, nampa anynyomba ikambe mae ri Katte!’

11Nampa Nasuromo Batara battu Gideon, nampa Barak, le’baki anjo Yefta, nampa kala’busanna inakke minne. Ikambemi massing allappassangko battu ri musunnu, sa’gennu tuli akkulle attallasa’ siagang amang.

12Mingka nuassenna angkana lanabundukiko Nahas, anjo karaeng Amon, nusorongbokomi Batara a’jari Karaennu nampa nukana ri nakke, ‘Eroki ikambe niparenta ri se’reang karaeng.’

13Kamma-kamma anne, cini’mi, iaminne karaeng anjo nupilea. Le’ba’mi nupala’, na Nasaremako Batara.

14Mate’ne mako punna nupakala’biri’ Batara, siagang anynyomba mae ri Ia, kammayatompa nuturuki parentaNa, sarroangampa punna ikau ngaseng siagang karaennu tuli tamamminrayako mae ri Karaeng Allata’alanu.

15Mingka, punna tena numappilangngeri ri Batara, ba’lalo nubaliangi parentaNa, ma’nassa ikau ngaseng siagang karaennu laNabaliangko Batara.

16Kamma-kamma anne pilangngeri pole! Parhatikangi panggaukang malompo le’baka Nagaukang Batara ri dallekannu ngaseng.

17Lakkioka’ mae ri Batara, namanna pole wattu timoroki, lappaturungi Batara gunturu’ siagang bosi, a’jari pammatei angkanaya Napilangngeri pappala’ doangku. Anjo wattua, lasadara’ mako antekamma lompona dosanu mae ri Batara lanri appala’nu sitau karaeng."

18Nampa appala’ doammo Samuel; na ia memang anjo alloa appaturummi Batara gunturu’ siagang bosi. Sikontu anjo bansaya a’jari malla’ ngasemmi ri Batara siagang mae ri Samuel.

19Nakanamo ke’nanga mae ri Samuel, "Tulungi ikambe bapa’. Kipappala’ doangangi ikambe anne mae ri Karaeng Allata’alanu, sollanna tamatea ikambe. Kamma-kamma anne sadara’mi ikambe angkanaya pantaranganna dosana ikambe riolo, dorakami pole ikambe lanri appala’na ikambe sitau karaeng."

20Appialimi Samuel angkana, "Teako mallakki; manna pole le’ba’mi nugaukang anjo kaja’dallanga, teako a’bokoi battu ri Batara, passangalinna tuli anynyombako ri Ia situlusu’na atinnu.

21Teako amminawangngi ri rewata-rewata tenaya nakkulle antulungko siagang ampasalamakko, nasaba’ anjo ke’nanga sikontutojenna apa-apa taena battuanna.

22Le’ba’mi assumpa Batara, angkanaya tena nalaNabokoiko, lanri le’ba’namo Napattantu angkanaya laNapa’jariko umma’ KalenNa.

23Na ri passala’na inakke, tapporo tena lalo kudoraka ri Batara lanri tenana kupappala’ doangangko. Mingka tuli lakupangngajarrangi mae ri kau apa-apa bajika siagang tojenga.

24Pakala’biriki Batara, siagang anynyombako mae ri Ia siagang teako amminrai lalang sikontu atinnu. U’rangi sikamma panggaukang malompoNa, ia le’baka Nagaukang mae ri kau.

25Mingka punna tulusu’ a’gau’ dosa tonjako ia, tena tapanra’nu siagang karaennu."


  Share Facebook  |  Share Twitter

 <<  1 Samuel 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran