Dual Panel1Siapa are wattu ribokoanganna, Nakanamo Batara mae ri Samuel, "Siapapi sallonu lasi’na pa’mai’ passabakkang Saul? Sai ia tenamo naniakui salaku karaeng Israel? Kamma-kamma anne angngalleko minynya’ zaitun, siagang a’lampako mange ri Betlehem, mange ri se’reang tau niarenga Isai, nasaba’ kalase’renna ana’na Kupilei a’jari karaeng."
2Mingka akkuta’nammi Samuel angkana, "Antekamma musti kugaukanga? Punna nalangngere’ anne passalaka Saul, ma’nassa nabunoa’!" Appialimi Batara angkana, "Angngerangko sikayu sapi rungka, siagang paui mae ri ra’yaka angkanaya niakko battu mange anjoreng untu’ assare koro’bang mae ri Batara.
3Undang tongi Isai mange ri anjo pa’gaukang koro’banga. Sallang laKupauangko apa musti nugaukang. Tau Kujo’jokangako, musti numinynyaki na nuangka’ a’jari karaeng."
4Nagaukammi Samuel situru’ anjo Napaua Batara. Ri wattunna battu mange ri Betlehem, niruppaimi ri sikamma pamimpinga ri anjo kotaya. Nata’bangka ke’nanga siagang akkuta’nang angkana, "Maka kabara’ kasalamakkang anne naerang kabattuanna bapa’?"
5Appialimi Samuel angkana, "Iyo kammatojengi. Battua’ mae untu’ assare koro’bang mae ri Batara. Jari tangkasi ngasengi kalennu sollannu akkulle amminawang ri anjo pa’gaukang koro’banga." Isai siagang ana’-ana’na nasuro ngaseng tommi massing antangkasi kalenna, siagang naundang mange ri anjo pa’gaukanga.
6Ri wattunna a’rappungammo ke’nanga siagang nacini’mi Samuel ana’na Isai, niarenga Eliab, napikkiri’mi angkana, "Ma’nassa iaminne laNapilea Batara."
7Mingka Nakana Batara ri Samuel, "Teako lanri ga’gana tanja’na siagang tinggina pakkaleanna nupacciniki. Teai anjo Kukaerokia. Tena Kusangkamma rupataua angnganggara’. Rupataua accini’ tanjaki, mingka iNakke atinna Kuciniki."
8Nampa nakio’ Isai ana’na niarenga Aminadab, na nasuro mange andallekang ri Samuel. Mingka nakanamo Samuel, "Tena todong nanipilei ri Batara."
9Nampa Syama nisuro maju ri Isai, mingka nakana Samuel, "Ia tena todong nanipilei ri Batara."
10Kammaminjo nanasuromo Isai a’le’basa’ ana’na tuju andallekang ri Samuel, mingka nakana Samuel ri ia, "Tena ri ke’nanga nipile ri Batara."
11Nampa akkuta’nang Samuel ri ia angkana, "Ia ngasenji anne bawang ana’nu bura’nea?" Appialimi Isai angkana, "Nia’ ija sitaupi, iamintu bungkoa, mingka sitabangi a’lampa akkalawaki gimbala’." Nakanamo Samuel, "Suro kioki, nasaba’ tena kilangnganre punna tenapa nabattu."
12Nampa nasuromo Isai mae angkioki anjo anaka. Niassemmi angkanaya anjo anaka se’re turungka gammara’ siagang bajiki kalenna, siagang ga’gai matanna. Nampa Nakanamo Batara ri Samuel, "Iaminne taunna. Minynyakimi na nuangka’!"
13Angngallemi linta’ Samuel minynya’ zaitun nampa naminynyaki Daud ri dallekanna sikamma daenna ngaseng. Anjo wattua nikoasai memammi Daud ri RohNa Batara. Appakkaramula anjo alloa siagang situlusu’na nirurungammi ri RohNa Batara. Nampa ammotere’mo Samuel mange ri Rama.
14Anjo lapung Saul nibokoimi ri RohNa Batara, siagang nisessami ri roh ja’dala’ Nasuroa Batara.
15Lanri kammana nakanamo sikamma atanna Saul ri ia, "Naassengi ikambe angkanaya roh ja’dala’ Nasuroa Batara assessaki’.
16Punna kisitujui, eroki ikambe a’lampa ampa’boyangki’ tau cara’deka akkacapi. Punna nisessaki’ ri roh ja’dalaka, anjo taua akkullei napasa’ra kacapinna, nakkulle baji’ ammotere’ pakkasiatta."
17Nampa naparentakammo Saul ri ke’nanga angkana, "A’boya mako tucara’de’ akkarena musi’, nampa nuerang mae anrinni."
18Nalangngere’na anjo, nia’mo kalase’renna atanna angkana, "Isai pandudu’na Betlehem, nia’ sitau ana’na bura’ne cara’de’ akkarena musi’. Ia tubarani, siagang se’re tantara baji’. Nampa pole gammaraki nacara’de’ a’bicara, siagang tuli nitulungi ri Batara."
19Jari assuromi Saul tau mange ri Isai, na napasang angkana, "Suroi ana’nu Daud, anjo akkalawakia gimbala’, mange andallekang ri nakke."
20Nampa appasadiamo Isai sikayu keledai, na napitekeki sikayu ana’ bembe, roti, siagang sipammoneang rassia anggoro’. Yangasenna anjo nasareammi Daud untu’ napassareang mae ri Saul.
21Kammaminjo nabattumo Daud mange ri Saul nampa a’jari palayanna Saul. Sanna’ nisayanna ri Saul nampa niangka’mo a’jari paerang sanjatana.
22Nampa akkiring Saul pasang mae ri Isai angkana, "Kungai Daud. Pa’biammi ammantang tulusu’ anrinni na’jari palayangku."
23Appakkaramula anjo wattua, punna nibattui Saul ri roh ja’dala’, naallemi kacapinna Daud nampa napasa’ra. Nampa sannammo siagang nyamammi ammotere’ pakkasia’na, lanri nibokoi ri anjo roh ja’dalaka.