Dual Panel1Anjo wattua akkioki Elisa kalase’renna anjo na’bi-na’bi naajaraka nampa nakana ri ia: "Apparuruko untu’ a’lampa mange ri Ramot ri pa’rasangang Gilead, siagang erangi anne botolo’ niaka minynya’ zaitunna.
2Punna battuko mange anjoreng boyai Yehu ana’na Yosafat cucunna Nimsi. Kioki kale-kalenna antama’ ri se’reang bili’,
3nampa nupatiri’ anne minynyaka irate ri ulunna, nampa nukana, ‘Nakana Batara, Naangkakko a’jari karaeng Israel.’ Punna le’ba’ nugaukang anjo kammaya, bokoimi linta’ anjo tampaka."
4A’lampami anjo na’bi rungkaya mange ri Ramot,
5nampa nagappamo Yehu siagang sikamma panglima maraengannaya sitabang sirapakkang anjoreng. Nakanamo anjo na’bia, "Karaeng, nia’ kabara’ kuerang untu’ ikatte." Appialimi Yehu angkana, "Untu’ inai?" Nakanamo anjo na’bia, "Untu’ kalenta karaeng."
6Nampa antama’mo ke’nanga sipa’rua ri ballaka, nampa napatiri’mo na’bi rungkaya anjo minynya’ zaitunga nai’ ri ulunna Yehu siagang nakana, "Nakana Karaeng Allata’alana Israel, ‘Kulantikko a’jari karaeng mae ri ummakKu Israel.
7Lanupaccappuki kaluargana karaennu Ahab. Lalang kammana anjo naKuhukkummo Izebel le’baka ambunoi na’bi-na’biKu siagang sikamma atangKu maraengannaya.
8Sikontu kaluargana siagang ana’ cucunna Ahab musti mate kabusuki. Sikontu tu bura’nea baji’ tau toa kammayatompa tau rungkaya laKupaccappuki.
9Kaluargana laKupasangkammai le’baka Kugaukang mae ri kaluargana Yerobeam siagang kaluargana Baesa, karaeng-karaenna Israel.
10Izebel tena nalanitarawangi. Tubuna lanikanrei ri kongkong ri daera Yizreel.’" Le’baki napau ngaseng sikammaya anjo, assulu’mi anjo na’bi rungkaya nampa lari.
11Ammotere’mi Yehu mange ri agang-aganna. Nampa akkuta’nammo ke’nanga ri ia angkana, "Kabara’ apa kutadeng? Apa ero’na anjo tau pongoroka mae ri kalennu?" Appialimi Yehu angkana, "Assara-sarai ngasengko antu, nasaba’ nuasseng ngasemmi."
12Appialimi ke’nanga angkana, "Tena, tena tojempa niassengi anne. Pau laloi!" Appialimi Yehu angkana, "Napabattuanga’ pasanNa Batara angkanaya niangkakka’ a’jari karaeng Israel."
13Akkaro-karomi agang-aganna Yehu ansungkei jubana ke’nanga nampa napaka’rang ri tukaka ri dallekanna Yehu. Nampa appasa’ra ke’nanga tarompe’ siagang a’gora angkana, "Yehu a’jari karaeng!"
14Kammami anjo naassikongkolo’mo Yehu angngewai Karaeng Yoram niaka ri Yizreel anjo wattua. Niaki Yoram mange anjoreng untu’ amballei loko’na nagappaya lalang a’bundu’na ri Ramot angngewai Hazael karaeng Siria. Nakana Yehu ri agang-aganna ngaseng paranna panglima, "Punna situjuko inakke a’jari karaeng, jagai sollanna tena manna sitau akkulle assulu’ battu ri Ramot untu’ ampauangi taua ri Yizreel."
15(9:14)
16Le’baki anjo nai’mi ri kareta bundu’na nampa a’lampa mange ri Yizreel. Anjo wattua tenapa nammolle bokka’na Yoram, siagang Ahazia iamintu karaeng Yehuda anjoreng, battui antoaki.
17Ri wattunna nacini’ pangawala’na menara kotaya ri Yizreel angkanaya niaki battu Yehu siagang sikamma taunna, a’gorami anjo pangawalaka angkana, "Nia’ siapa are jaina tau battu a’lampa mae anrinni!" Appialimi Yoram angkana, "Suroi se’re tantara mange ansalidiki untu’ angngassengi angkanaya apaka agang yareka musu anjo ke’nanga."
18A’lampami a’dongko’ jarang anjo tantaraya, nampa battumo mange ri Yehu. Akkuta’nammi anjo tantaraya angkana, "Eroki naasseng karaenga angkanaya anne kabattuanta salaku agangki’ yareka bali." Appialimi Yehu angkana, "Anjo teai urusannu. Maeko nuagang mae ri nakke." Niciniki ri pangawala’na menara kotaya battu mange ri rombonganna Yehu, mingka tena nammotere’. Jari nalaporo’mi anjo passalaka,
19sa’genna nikirimmo pole sitau tantara maraengannaya. Anne tantaraya akkuta’nang tommi ri Yehu sangkamma pakkuta’nanna tantara rioloa sumpadeng nisuro, na sikalipa pole appiali Yehu angkana, "Anjo teai urusannu! Maeko nuagang mae ri nakke!"
20Nalaporo’mi pole pangawala’na menaraya angkanaya anjo tantara nisuroa battumi mange anjoreng ri rombonganga mingka tenai ammotere’. Nampa nakana pole, "Nakulle kapang Yehu pamimpinna anjo rombonganga, nasaba’ a’dongko’ kareta bunduki sangkamma tau pongoro’."
21Naparentakammi Karaeng Yoram angkana, "Pasadiai karetaku." Nipasadiami karetana, nampa a’lampa kalenna Yoram siagang Karaeng Ahazia mange anruppai Yehu, massing para lalang ri kareta kalenna. Assibuntulu’mi ke’nanga siagang Yehu ri le’ba’ kokonna Nabot.
22Akkuta’nammi Yoram ri Yehu angkana, "Apaka anne kabattuannu salaku agang?" Appialimi Yehu angkana, "Antekamma olona salaku agang punna anrinni nia’ ija sanro, siagang nia’ ija tau anynyomba ri barhala appakkaramulaya nagaukang anjo amma’nu?"
23Ammarrammi Yoram angkana, "Anne taua bali Ahazia!" Nampa napabilu’ karetana Yoram nalari.
24Napabantammi otere’ panana Yehu sipagassing-gassinna nampa nalio-lio napana anjo Yoram, na nataba dongko’na sitarrusu’ mae ri atenna. Anra’bami Yoram, nampa mate lalang ri karetana.
25Nakanamo Yehu ri Bidkar iamintu pambantuna, "Apaka nuu’rangi iji ri wattunta a’dongko’ jarang ampinawangi Ahab, manggena Yoram? Anjo wattua Nakana Batara ri Ahab, ‘Kuassengi angkanaya inai ambunoi Ahab siagang sikontu ana’na subangngi, naKua’janji angkanaya laKuhukkungko anrinni todong ri kokoa anne.’" Nampa nakanamo pole Yehu mae ri anjo pambantuna, "Pasambilai anjo maya’na Yoram antama’ ri kokonna Nabot, sollanna a’rupa hukkunganNa Allata’ala mae ri kalenna."
26(9:25)
27Naciniki Ahazia anjo apa kajarianga. Jari napalarimi karetana a’lampa mange ri kota Bet-Hagan. Niondammi ri Yehu siagang a’gorai ri ana’ buana angkana, "Buno tongi anjo!" Nipanami ri ke’nanga na nataba ri agang a’lampa mangea ri Gur, ri ampi’na kota Yibleam. Mingka akkullei ta’lappasa’ lari sa’genna mange ri Megido, nampa anjorempi mate.
28Niallemi maya’na ri pagawe-pagawena nampa naerang naparikareta a’lampa ammotere’ mange ri Yerusalem, nampa natarawang anjoreng ri pa’jerakkanna sikamma karaenga ri kota Daud.
29Wattunna a’jari Karaeng Ahazia ri Yehuda, anjo wattua sampulomi asse’re taung sallona a’jari Karaeng Yoram ana’na Ahab ammarenta ri Israel.
30Battumi Yehu mange ri Yizreel. Le’ba’namo nalangngere’ Izebel anjo apa kajarianga, najangkai baji’mi uu’na nampa ammake paccalla mata, nampa attoa’ naung battu ri tontonganna balla’ karaenga.
31Ri wattunna antama’ Yehu battu ri pakke’bu’ lompoa, a’gorami Izebel angkana, "Hoe, Zimri, pabuno-buno! Apa ero’nu battu mae anrinni?"
32Accongami Yehu nai’ ri tujunna tontonganga, na nakana, "Inai agang mae ri nakke?" Nalangngere’na anjo sa’ra kammaya, nia’mo rua yareka tallu pagawe balla’ karaenga attoa’ naung.
33Nakanamo Yehu mae ri ke’nanga, "Pasambilai naung mae antu bainea!" Na nipasambilamo Izebel ri ke’nanga naung battu ri tontonganga, nampa nilissarrang ri kareta sa’genna ta’racci’ cera’na mae ri temboka siagang mae ri sikamma jaranna anjo karetaya.
34Le’baki anjo antama’mi Yehu ri balla’ karaenga nampa angnganre. Nampa nakana, "Anjo bainea tau nitunrai. Mingka manna nakamma mamo, tarawang tonji ia maya’na, lanri ia ana’ bainenai karaenga."
35Mingka ri wattunna a’lampa taua ero’ angngallei maya’na untu’ lanatarawang, buku-bukunna mami narapikang ke’nanga, iamintu ka’daro ulunna na, buku-buku limanna siagang buku-buku bangkenna.
36Le’ba’na nilaporo’ anjo passalaka mae ri Yehu, nakanamo Yehu, "Anne kammaya le’ba’mi Natappu riolo Batara, ri wattunna akkana kamma anne tete ri Elia atanna: ‘Maya’na Izebel lanikanrei ri kongkong ri daera Yizreel,
37nampa sikamma tassesaya battu ri anjo maya’na latassiaraki sanrapang tai olo’-olo’, sa’genna tena manna sitau lakkulle ambatei angkana inai maya’ anjo.’"