Alkitab Mobile SABDA
[VER] : [MAKASAR]     [PL]  [PB] 
 <<  2 Samuel 22 >> 

1Le’ba’namo nipasalama’ Daud ri Batara battu ri Saul siagang sikontu musunna maraenga, nakelongammi Daud anne lagu kammaya mae ri Batara:

2[Mangngaia' ri Katte, o Batara, iKattemi kagassingangku.]

3Batara rapang pattahangngang makassa’ a’jari tampa’ pa’la’langangku. Allata’alaku rapang moncong batu, tampa’ pa’la’langangku. Rapang pa’lapa’ barambang antongkoka’, siagang anjagaia’ sollangku tuli amang.

4Makkioka’ ri Batara siratanga nipuji, Ia allappassanga’ battu ri musu-musungku.

5Nikurunga’ ri bahaya kamateang siagang niamme ri a’ba kapanrakang.

6Nikurunga’ ri bahaya kamateang, tado’na kamateanga niaki ri dallekangku.

7Lalang kasukkarrangku kumakkio’ ri Batara, ma’gora ri Allata’alaku appala’ tulung. Battu ri Balla’Na Nalangngereki sa’rangku na Naparhatikang pakkiokku.

8Nampa ta’goccang linoa siagang ta’ge’goso’ lanri kalarroanNa Allata’ala!

9Tapporasaki umbua battu ri so’bolo’ ka’murunNa, nassulu’ pepeka siagang baraya battu ri bawaNa.

10Napuei langika, nampa manaung, lalang rammang sassang irawangngang bangkenNa.

11A’dongko’ ri malaeka’ akka’nyi’ anri’ba’; allayang irate ri ka’nyi’na anginga.

12Natongko’ KalenNa siagang kasassangngang; rammang le’leng na kapala’ angkulilingi KalenNa.

13Battu ri kila’ ri dallekanNa, assulu’ rammanga, bosi es siagang pepe’.

14Nampa a’gamarrung Batara battu ri allaka, Kaminang Tinggia ampappilangngerangi sa’ranNa.

15Napatembaki sikamma ana’ panaNa, na Napasimbung-simbung sikamma musunNa. Appabattui ma’mole-mole kila’ na Napalari kabusu’ ke’nanga.

16Ammumbai dapara’na tamparanga siagang tassungke dapara’na buttaya ri wattu larroNa angga’garaki musunNa

17Battu rate Napajonjo limanNa Batara kuNata’gala’ nampa Nabeso’ battu lalang ri je’ne’ lantang.

18Napasalamakka’ battu ri musu porea siagang battu ri tau mangngabirissia ri nakke lanri ta’lalo kassa’na ke’nanga.

19Nabundukia’ ri wattungku natuju bala mingka Batara a’jari pannulungku.

20Ia ampata’lappasakka’ battu ri bahayaya na Napasalamakka’ lanri pangngellainNa mae ri nakke.

21Nabalasaki Batara gau’ katojengangku; Nabarakkakia’ lanri tenana kusala.

22Kuturuki parentaNa Batara, na tena kuma’boko battu ri Allata’alaku.

23Sikontu hukkunNa kuparhatikangi, tena kubalang parekangi sikamma parentaNa.

24Naassengi angkanaya tena callangku na kupakabella kalengku battu ri kasalanga.

25Na Nabalasa’ Batara gau’ tojengku lanri naassenNa angkana tena kusala.

26O, Batara tena pamminraTa mae ri tu tamamminraya siagang bajikKi’ mae ri tau bajika.

27Kipa’nyatai kalenTa mae ri tau matangkasaka, mingka Kimusui tau ja’dalaka.

28Kipasalamaki tau tuna pa’maika; mingka tau tampoa Kipadundui.

29Kiparinrai kanjoliku; Nasingari Karaeng Allata’ala kasassangangku.

30Kipakajarreka’ untu’ antumpasaki musua Nabantua’ Allata’alaku anrumbangi pattahanganna ke’nanga.

31Sangkaki gau’Na Allata’ala, janjinNa akkullei nipatappa’! Ia rapang pa’lapa’ barambang mae ri sikontu a’la’langa ri Ia.

32Lanri Batara bawang Allata’ala; Allata’ala bawang angngalleiki’.

33Iami Allata’ala ampakajarreka’ ampa’jari amangi oloangku.

34Napakajarreki bangkengku rapang bangkeng jonga, na Najagai kasalamakkangku ri monconga.

35Naajarakka’ a’bundu’, sa’gengku akkulle a’beso’ pana kaminang kassaka.

36O, Batara, iKatte alla’langia’ siagang ampasalamakka’, antumpakka’ siagang kakoasanTa nakuammeta lanri gautTa.

37Kijagaia’ sollangku tanijakkalla siagang tena nakule’ba’ tu’guru’.

38Kuondangi musungku nampa kubeta ke’nanga siagang kutammonoka sa’genna posso’ ke’nanga.

39Kupatappasa’ ke’nanga sa’genna takkullea ambangung poleang, anra’bai ke’nanga ri dallekang bangkengku.

40Kisarea’ kagassingang untu’ a’bundu’, siagang pammetang mae ri musu-musungku.

41Kipalari musungku battu ri nakke; Kipossoki sikamma tau birisika mae ri nakke.

42Ammarrangi ke’nanga, mingka tena antulungi, akkioki ke’nanga ri Batara, mingka tena Nappiali.

43Kuremoi ke’nanga rapang limbu’bu’ tassimbunga siagang kubarrasa’ rapang peo’ ri aganga.

44Kilappassanga’ battu ri tau dorakaya na Kipa’jaria’ tukoasa mae ri bansa-bansaya; bansa tenaya nakuassengi a’jari atangku.

45Sikamma tu bansa maraenga tundu’ kabusuki ri nakke, siagang mappilangngeri punna nalangngere’ parentaku.

46Lanynya’mi kabaranianna ke’nanga; annenremmi siagang assulu’mi ke’nanga battu ri paccokkoanna.

47Batara mattallasaka! Nipujimi Pannulungku! Mala’biriki kalompoanNa Allata’ala Mappasalamakku!

48Nasarea’ pammetang mae ri musungku, Napadundui bansa-bansaya ri dallekangku,

49Napasalamakka’ battu ri musu-musungku. Batara, Kisarea’ pammetang mae ri musungku, Kila’langia’ battu ri tau pallaka.

50Jari kupakala’birikKi’ ri alla’na bansa-bansaya, na kumakkelong kelong pammuji mae ri Katte.

51Allata’ala assarei pammetang karaeng Napilea, tuli Nakamaseangi tau Napilea, iamintu Daud siagang jari-jarina sa’genna satunggu-tungguna.


  Share Facebook  |  Share Twitter

 <<  2 Samuel 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel