Alkitab Mobile SABDA
[VER] : [MAKASAR]     [PL]  [PB] 
 <<  2 Tawarikh 17 >> 

1Yosafat a’jari karaeng ri Yehuda untu’ ansambeangi Asa manggena. Napakajarreki kalenna untu’ angngewai tu Israel.

2Ammoliki tantara ri sikontu kota niaka tembo’ pattahanganna ri Yehuda, ri daera pantara’na kota Yehuda, kammayatompa ri kota-kota le’baka nabeta manggena ri daera Efraim.

3Nabarakkaki Batara anjo Yosafat lanri naturuki apa nagaukanga manggena; tena nanynyomba ri Baal,

4passangalinna anynyombai mae ri Allata’ala. Mannuruki mae ri parenta-parentaNa Allata’ala, siagang tena nakamma karaeng-karaeng Israel batena attallasa’.

5Nasarei Batara Yosafat empoang kassa’ salaku karaeng Yehuda. Sikontu ra’yaka assare kabusuki hadia mae ri ia nampa a’jari kalumanynyammo siagang nipakalompoi ri taua.

6Lompoi siagang terasaki pattujunna untu’ anturuki parentaNa Batara siagang naancuruki sikontu tampa’ panynyombanga mae ri barhalaya siagang patung-patunna Dewi Asyera ri Yehuda.

7Ri taung makatallu ammarentana Yosafat, nasuroi a’lampa pagawe-pagawe tinggia mange ri sikontu kota-kotaya ri Yehuda untu’ ampangngajarrangi hukkung-hukkunNa Batara. Areng-arenna ke’nanga iamintu: Benhail, Obaja, Zakharia, Netaneel siagang Mikha.

8Nirurungangi ke’nanga ri salapang tu Lewi siagang rua imang. Sikamma anjo tu Lewia iamintu: Semaya, Netanya, Zebaja, Asael, Semiramot, Yonatan, Adonia, Tobia siagang Tob-Adonia. Anjo ruaya imang iamintu Elisama siagang Yoram.

9Angngerangi ke’nanga Kitta’"Hukkung-hukkunNa Batara" nampa a’lampa mange-mange ri sikontu kota niaka ri Yehuda nampa naajara’ ke’nanga ra’ya’ niaka anjoreng.

10Napa’jari malla’ kabusuki Batara sikontu kakaraengang niaka ri tammulilina Yehuda untu’ a’bundu’ angngewai Karaeng Yosafat.

11Battu ri Filistin annarimai passare jai pera’ siagang passare maraengannaya, siagang battu ri tu Arab annarimai passare 7.700 gimbala’ siagang 7.700 bembe.

12Kammami anjo napila’ sallo pila’ lompoi kakoasanna Karaeng Yosafat. Ri sikontu Yehuda ambangungi jai pattahangngang siagang kota-kota pammolikang bokong.

13Appatambungi sanna’ jaina bokong anjoreng ri kota-kotaya. Ammoliki ri Yerusalem perwira-perwira tu barani,

14massing-massing siagang pasukanna situru’ lokoang bijanna. Niarengi Adna panglima pasukang battua ri lokoang bijanna tu Yehuda. Nia’ 300.000 tantara napimping.

15Tau makaruaya iamintu niarenga Yohanan; nia’ 280.000 tantara napimping.

16Tau makatallua iamintu niarenga Amasia ana’na Zikhri; nia’ 200.000 tantara napimping. (Amasia iamintu se’re tau le’baka anrellakangi kalenna untu’ ampa’jari atai kalenna mae ri Batara.)

17Panglima pasukang battua ri sikontu lokoang bijanna suku Benyamin iamintu niarenga Elyada, se’re tu barani siagang tu pore. Nia’ 200.000 tantara napimping, sangka’ siagang pana kammayatompa pannangkisi’.

18Tau makaruaya lalang ri pasukanna iamintu niarenga Yosabad; nia’ 180.000 tantara napimping sangka’ siagang sanjatana ke’nanga.

19Iaminne ke’nanga tugasa’ ri Yerusalem. Pantaranganna anjo, ammoli’ tongi karaenga siapa are pasukang-pasukang maraeng ri sikamma pattahangngang niaka ri daera Yehuda.


  Share Facebook  |  Share Twitter

 <<  2 Tawarikh 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel