Alkitab Mobile SABDA
[VER] : [MAKASAR]     [PL]  [PB] 
 <<  Amsal 12 >> 

1Tau mangngaia ri pangngassengang sannangi nyawana nipasaile; mingka tau tenaya nangai nipasaile iami tau dongo’.

2Tau bajika ningai ri Batara, mingka tau a’rancanga kaja’dallang langgappai hukkungang.

3Tena manna sitau tuli lapore lalang ri kaja’dallanna; mingka tau lambusuka tuli jarreki, takkulleai ta’lengga.

4Tubaine bajika iami kalompoang pa’mai’ siagang kate’neang mae ri bura’nenna, baine ampakasirikai bura’nenna sanrapangi garring lalang ri buku, ammanrakia.

5Tau lambusuka nanawa-nawai apa-apa bajika; tau ja’dalaka annipua narancana.

6Kana-kananna tau ja’dalaka ammunoi; kana-kananna tau lambusuka appasalamaki.

7Tau ja’dalaka latu’guruki napanra’ tena bate-batena; mingka tau bajika latuli jarreki sikontu turungang.

8Lanipuji taua situru’ kacara’dekanna; nihinai taua situru’ kadongokanna.

9Bajikangngangi a’jari ra’ya’ ca’di niaka jama-jamanna, kala assipa’ kamma tau malompo nakakurangang ri kanre.

10Tau bajika naparhatikangi olo’-olo’ piarana; mingka tau ja’dalaka nasessai.

11Pamarri anjama terasaka jai kanre-kanreanna, mingka tau ampelakai wattunna untu’ anggaukangi apa-apa tenaya matu-matunna, iami dongo’.

12Tau ja’dalaka eroki anggappa passawallang battu ri tau dorakaya; tau bajika sanrapangi poko’ kayu a’rappoa.

13Tau ja’dalaka niallei ri sikko’ kana-kana kodi napasuluka; tau bajika nipalili battu ri kasukkarranga.

14Tunggala’ tau anggappai pa’balasa’ situru’ kana-kananna siagang panggaukanna; massing nisarei pahala situru’ kana-kananna siagang panggaukanna.

15Tau dongoka nakanai kalenna tale’baka sala, mingka tau cara’deka nangai appilangngeri pappakainga’.

16Punna kasi’rikang tau toloa, anjo wattua napau memammi pa’risi’ pa’mai’na; mingka tau cara’deka tanapaduliai punna nicallai.

17Lanri napauna katojenganga, napaentemmi taua kaadelanga; lanri a’balle-ballena, appabattumi taua apa tenaya naadele’.

18Bicara sambaranga akkullei nalokoki pa’maika sanrapang panno’do’na pa’danga; kana-kana cara’deka sanrapangi pa’balle appamollea.

19Sipakkida mataji natassungkemo balle-ballea, mingka kana-kana tojenga latuli niaki satunggu-tungguna.

20Tau nangaia a’rancana kaja’dallang nangai tenaya naadele’; tau angngusahaya kabajikang lamate’nei.

21Tau bajika talanatujuai bala; tau ja’dalaka tuli lanatujui susa.

22Birisiki Batara mae ri tau paballe-ballea; mingka sannangi mae ri tau lambusuka.

23Tau cara’deka tena napappicini’-cinikangi pangngassenganna; tau dongoka napa’lammorangi kadongokanna.

24Anjama terasaka napa’jari taua koasa; kamalassanga napa’jari taua ata.

25Ranggaselaya natepoki sumangaka, mingka kana-kana lammaya napakalompoi pa’maika.

26Tau bajika upakkangngangi na sambori’na; tau ja’dalaka sala oloangi lanri kaja’dallanna.

27Punna a’malasa’-malasa’ talanagappayai taua apa nakaerokia; lanri anjama terasa’ nanggappa taua kakalumanynyangngang.

28Tau amminawanga ri oloang annabaya lamate’nei ri tallasa’na; tau amminawanga ri oloanna tau ja’dalaka lamangei ri matea.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Amsal 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel