Alkitab Mobile SABDA
[VER] : [MAKASAR]     [PL]  [PB] 
 <<  Ayub 41 >> 

1"Maka akkullei nujakkala’ buaya niarenga Lewiatan, naporo sipappa’ja pekang nupake? Maka akkullei nupaukang lilana siagang otere’ passikko’?

2Maka akkullei nusarei otere’ muncenna, yareka nusare pakkai’ bassi gigi nga’ngala’na?

3Maka akkullei napala’ ri kau sollanna nulappassang? Yareka sipa’bicara siagang ikau, appala’ pangngamaseang?

4Maka akkullei appare’ passitujuang siagang ikau, siagang a’janji tuli ero’ allayaniko?

5Maka akkullei nusikko’ sanrapang jangang-jangang piara, ampakasannangai pa’mai’na ata-ata bainea?

6Maka akkullei nidanggangang ri paboya jukuka nampa nabage-bage mae ri padangganga?

7Maka akkulle nuto’do’ bukkulenna siagang poke tallua matanna yareka nusambilai poke sa’genna natarrusu’ ulunna?

8Seromi manna sikalija bawang, na tenamo nalanupinruangi; tenamo nalanukaluppai anjo passiba’jianga satunggu-tungguna.

9Inai-nai anciniki lapung Lewiatan, la’jari lammai kalenna nampa tu’guru’ pinsang lanri malla’.

10Sanna’ larrona punna nipabangungi ri tinrona; tena manna sitau barani ammenteng ri dallekanna.

11Inai akkulle ambakkai natalokoka? Tena tau ri linoa anne akkulle anggaukangi.

12Maeko Nakucaritakangko ri passala’na pakkaleanna Lewiatan, ri passala’ kagassinganna siagang antekamma ga’gana.

13Tena manna sitau akkulle angkekkeki baju pantara’na yareka antarrusuki baju bundu’ napakea.

14Inai akkulle ansungkei moncong kassa’na, niaka lalang gigi-giginna sannaka heba’na?

15Kamma pa’lapa’ assusung, iaminjo dongko’na rapa’ sikali dakki’na, sanrapang batu terasa’na.

16Sisusung-susung, tassikko’ jarre’, sa’genna manna anging takkulle ta’lappasa’ antama’.

17Anjo pa’lapa’ ri kalenna sanna’ jarre’na sita’gala’na sa’genna tena olona lakkulle nipasisa’la’.

18Punna ta’rassing Lewiatan, akkila’-kilaki cahayaya; accillaki matanna rapang ammumbana alloa.

19Nia’ lila pepe’ assulu’ battu ri bawana; akkilaki bunga-bunga pepeka ri kere-keremae.

20Assuluki umbua battu ri ka’murunna, rapang umbu kayu nitunu rawanganna uringa.

21Nappasa’na apparinrai bara; rinra pepe’ assulu’ battu ri bawana.

22Kacikoro’na tamaka kassa’na, sa’genna malla’ ngaseng sikontu apa niaka ri dallekanna.

23Tena tampa’ lu’mu’ nia’ ri kalenna; Tena olona reppe’ lanri sangkammai bassi baja terasa’na.

24Pa’mai’na sanrapang batu, tena sikali ranggaselana kassa’ siagang terasa’ sangkamma batu pa’gilingang.

25Punna ammentengi, manna tau kaminang gassinga tappela’ ngaseng kabaranianna, a’jari tenamo dayana lanri sanna’ malla’na.

26Tena pa’dang akkulle allokoki; poke, pana, yareka coka, takkulle ampa’risi.

27Bassia napasangkammaji alusu’na ruku’-rukuka, tambagaya sangkammaji kayu jappoka lu’mu’na.

28Tena pana akkulle ambongkai; batu nipasambilaya mae ri ia sanrapanji rarame bawang.

29Palu-palua napasangkammaji silawaraka ruku’ kalotoro’; ammakkalaki punna nia’ tau ansambilai poke.

30Sissi’na ri parru’na rapangi kaca ciduka cappa’na. Sanrapang pa’battasa’ nakkekkeseki peoka na napue.

31Nagoccangi tamparanga sa’genna atanja’ je’ne’ a’rere; sanrapang panci pappalluang minynya’ a’busa-busa.

32Ammoliki bate bangkeng accaya, napinrai tamparanga a’jari busa je’ne’, keboka tanja’na.

33Tena sangkammanna ri tompo’na buttaya; apa attallasa’ tenaya nangngasseng malla’!

34Olo’-olo’ kaminang gammaraka nacini’ rawa ngaseng; iami karaeng ri sikontu olo’-olo’ sekkeka."


  Share Facebook  |  Share Twitter

 <<  Ayub 41 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran