Dual Panel1Suku-suku Ruben siagang Gad teai sipato’ jaina olo’-olo’ piarana. Ri wattunna nacini’ ke’nanga antekamma baji’na butta Gilead siagang Yaezer untu’ nipammarakai olo’-olo’,
2mangemi ke’nanga andallekang ri Musa, Imang Eleazar siagang pamimping-pamimping maraenna Israel. Nakanamo ke’nanga,
3"Buttana kota-kota Atarot, Dibon, Yaezer, Nimra, Hesybon, Eleale, Sebam, Nebo siagang Beon ia naempoiamo Israel lanri bantuanNa Batara, sanna’ baji’na untu’ nipammarakai olo’-olo’. Na lanri jai duduna olo’-olo’na ikambe,
4(32:3)
5napalaki ikambe sollanna nipassareang anne buttaya mae ri kambe untu’ napatang ikambe. Teami suroi a’lette’ ikambe ri ba’leanna Binanga Yordan."
6Appialimi Musa angkana, "Angngapa nulammantang anrinni nampa a’lampa julu bansanu a’bundu’?
7Angngapa nalanupa’jari malla’ bansa Israel allimbangi Binanga Yordan siagang antama’ ri pa’rasangang Napassareanga Batara mae ri ke’nanga?
8Kamma tomminjo panggaukanna sikamma bapa’nu, ri wattunna kusuro ke’nanga battu ri Kades-Barnea untu’ anjappai anjo pa’rasanganga.
9Anrapi’mi ke’nanga sa’genna ri Ka’bung Lappara’ Eskol siagang nacini’mi ke’nanga anjo buttaya. Mingka ri wattunna ammotere’ ke’nanga, napakamalla’mi bansa Israel untu’ antama’ ri butta Napassareanga Batara mae ri ke’nanga.
10Jari larromi Batara anjo wattua sa’genna Nakana, ‘Tena namajarre’ pa’mai’na mae ri Nakke anjo taua. Lanri kammana anjo assumpaMa’ angkanaya sikamma tau umuru’ ruampulo taunga sa’genna irateanganna battu ri anjo ke’nanga ri wattunna nabokoi Mesir, tena lakkulle antama’ ri pa’rasangang Kupa’janjianga mae ri Abraham, Ishak siagang Yakub.’
11(32:10)
12Kabusu’na anjo taua natabai hukkungang, pantaranganna Kaleb ana’na Yefune, tu Kenas, siagang Yosua ana’na Nun, lanri anjo ke’nanga tau ruaya tuli majarreki pa’mai’na mae ri Batara.
13Larroi Batara mae ri bansa Israel sa’genna Nalappassang ke’nanga a’la’ba’ a’lampa ri parang lompoa patampulo taung sallona, sa’genna sikontu anjo tau angngewaya mae ri ia mate ngasemmi.
14Na kamma-kamma anne, angngewa tommako sangkamma bapa’nu ngaseng. Ikau memang pa’rappungannako tau dorakaya, ampakalompoai nassuNa Batara mae ri bansa Israel!
15Punna a’bokoko ambokoi Batara, anne sikontu bansaya lanilappassangi la’bi sallo pole a’la’ba’ a’lampa ri parang lompoa, nampa ikau ngasemmi passabakkanna napanra’ ke’nanga!"
16Nampa a’reppese’mo tu Ruben siagang tu Gad mae ri Musa siagang nakana ke’nanga, "Baji’mi nappare’ rolong ikambe bara-bara nitemboka untu’ pammantangngang gimbala’na ikambe, kammayatompa kota-kota nitemboka tammulilina untu’ napammantangngi ana’-ana’na siagang bainenna ikambe.
17Nampa apparuru ikambe untu’ maju linta’ mange a’bundu’ siagang sari’battanna ikambe. Ikambe lampimpingi anjo pa’bundukanga siagang langngerangi ke’nanga antama’ ri pa’rasangang lanapatanga ke’nanga. Lalanna anjo wattua akkullemi ammantang ana’-ana’na siagang sikamma tubai’-bainena ikambe anrinni, ri kota-kota nitemboka ri tammulilina, amangi battu ri bundu’na panduduka anrinni.
18Tena nalammotere’ ikambe mae ri balla’na ikambe punna tenapa nanggappa ngaseng tu Israel butta untu’ lanapisakai.
19Taerokai ikambe annarima manna pole sike’de’ battu ri buttana ke’nanga ri ba’leanna Binanga Yordan, lanri le’ba’mi ikambe annarima bageang anrinni, irayanganna Binanga Yordan."
20Appialimi Musa angkana, "Punna attojeng-tojengko ero’ apparuru untu’ a’bundu’ lanri Batara,
21siagang sikamma akkullea a’bundu’ a’limbang ngasengi ri Binanga Yordan, nampa nipimping ri Batara ambunduki musu-musua sa’genna nibongka ke’nanga ri Batara,
22sa’genna niallemo anjo pa’rasanganga, akkulle mako ammotere’; ta’lappasa’ mako battu ri kawajibannu mae ri Batara siagang mae ri sikamma sari’battannu, kammayatompa laNasareang mako Batara anjo butta niaka iraya anne untu’ ikau ampatangi.
23Mingka u’rangi, punna tena nurupai janjinnu, dorakako mae ri Batara siagang lanihukkungko lanri anjo dosanu.
24A’lampamako mange ambangungi kota-kotaya siagang bara-barana gimbala’nu, siagang teako takkaluppai anrupai anjo apa le’baka nupa’janjiang!"
25Nampa nakanamo tu Gad siagang tu Ruben, "Bapa’, lanagaukangi ikambe anjo apa naparentakanga Bapa’.
26Ana’-ana’na siagang tubai’-bainena ikambe kammayatompa olo’-olo’ sapi siagang gimbala’na ikambe lammantangi anrinni, ri kota-kota Gilead.
27Mingka ikambe anne sadia maki’ untu’ a’lampa mange a’bundu’ nipimping ri Batara. La’limbangi ikambe ri Binanga Yordan, nampa a’bundu’ sangkamma le’baka kipau."
28Jari napasulu’mi anne parentaya Musa mae ri Imang Eleazar, Yosua siagang sikamma pamimpinna Israel, angkana,
29"Punna naturuki tu Gad siagang tu Ruben parentaNa Batara siagang nalimbang Binanga Yordan untu’ mange a’bundu’, siagang punna lanri bantuanna ke’nanga nakkulle nugappa anjo pa’rasanganga, anjo butta Gilead musti nusareangi ke’nanga untu’ napatang ke’nanga.
30Mingka punna tena na’limbang ke’nanga ri Binanga Yordan untu’ ambantuko a’bundu’, musti butta pisaka ri Kanaan nagappa ke’nanga, sangkamma ngaseng ikau."
31Appialimi tu Gad siagang tu Ruben angkana, "Lanagaukangi ikambe apa Naparentakanga Batara, bapa’.
32Batara lampimpingi ikambe a’limbang mange ri pa’rasangang Kanaan siagang maju untu’ a’bundu’; mingka anjo butta niaka irayanganna Binanga Yordan poro ikambe tuli ampatangi."
33Nampa napassareammo Musa mae ri suku Gad siagang Ruben, kammayatompa bage ruana suku Manasye sikontu daera Sihon, karaeng Amori, siagang daera Og, karaeng Basan, kammayatompa kota-kotaya siagang butta niaka ri tammulilina.
34Nabangummi suku Gad iamintu kota Dibon, Atarot, Aroër,
35Atarot-Sofan, Yaezer, Yogbeha,
36Bet-Nimra, siagang Bet-Haran, salaku kota-kota ammake tembo’ kalli’ siagang salaku tampa’ bara-barana gimbalaka.
37Nabangummi suku Ruben iamintu kota-kota Hesybon, Eleale, Kiryataim,
38Nebo, Baal-Meon, siagang Sebam. Anjo kota-kota nabangung poleanga ke’nanga nasambei ke’nanga arenna.
39Golongang bijanna Makhir, ana’na Manasye, nabundukimi butta Gilead, nampa naallemo ke’nanga anjo buttaya siagang nabongkami tu Amori niaka ammantang anjoreng.
40Lanri kammana anjo napassareammi Musa anjo butta Gilead mae ri golongang Makhir, siagang ammantang tulimi ke’nanga anjoreng.
41Yair, battu ri suku Manasye, nabundukimi siagang naempoimi siapa are desa, nampa naareng anjo desa-desaya: "Desa-desa Yair".
42Nobah nabundukimi siagang naempoimi Kenat siagang sikamma kampong-kampong niaka ri tammulilina, nampa naareng "Nobah" anjo kampong-kamponga, situru’ areng kalenna.