Alkitab Mobile SABDA
[VER] : [MAKASAR]     [PL]  [PB] 
 <<  Kejadian 40 >> 

1Siapa are wattu ribokoanganna, nia’ rua palayanna karaeng Mesir appare’ kasalang mae ri karaenga. Jama-jamanna ke’nanga iamintu pangngurusu’ inunganna siagang rotina karaenga.

2Larromi karaenga ri anjo ruaya palayang.

3Napantama’mi ke’nanga ri tarungkua, iamintu balla’ tahananna kapala pangawala’na balla’ karaenga. Nania’ Yusuf lalang ri anjo tampa’ tahananga.

4Sallo tongi ke’nanga lalang ri anjo tarungkua. Nampa nisuromo Yusuf ri kapala pangawala’na balla’ karaenga untu’ allayani ke’nanga.

5Ri se’reang bangngi, massing asso’nami anjo pangngurusu’ inunganga siagang pangngurusu’ rotia.

6Ri wattunna battu Yusuf mae ri ke’nanga ammukona bari’basa’, si’nami nicini’ ke’nanga.

7Akkuta’nammi Yusuf ri ke’nanga angkana, "Angngapa nusi’na sipa’rua anne alloa sari’battang?"

8Appialimi ke’nanga angkana, "Ri bangngia massing asso’nai ikambe. Nampa tena tau angngassengi apa battuanna." Nakanamo Yusuf, "Allata’alaji bawang akkulle assarei taua pakkulle untu’ ampakasingaraki battuanna so’naya. Cobasai bedeng carita anjo so’nanu."

9Nakanamo anjo pangngurusu’ inunganga, "Lalang so’naku nia’ kucini’ poko’ anggoro’ ri dallekangku.

10Anjo pokoka tallu tangkenna. Nampami appakkaramula a’leko’ tangkenna, nata’bakkara’ memammo linta’ bunga-bunganna, siagang a’jari ti’no’mi rapponna.

11Jari kuallemi anjo rappo anggoroka nampa kupacco’ antama’ ri kaca pangnginunganna karaenga. Le’baki anjo kuerammi mae ri karaenga."

12Nakanamo Yusuf, "Iaminne battuanna: Anjo tallua tangke, battuanna tallungngallo.

13Lalang wattu tallungngalloa anne, lanalappassangko karaenga. Lanapammopporangko siagang lanapoterangko mae ri jama-jamannu rioloa. Lanupatalai kaca pangnginunganna mae ri karaenga sangkamma riolo.

14Mingka u’rangia’ punna baji’-baji’ mako. Tulunga’ nanupabattu kara-karaku mae ri karaenga sollanna nalappassanga’ battu ri anne tarungkua.

15Nasaba’, riolo nakke nilukkaka’ battu ri tu Ibrani. Nampa anrinni ri Mesir tena le’bakapa’ anggaukangi manna sirupaya kaja’dallang sa’gengku siratang nipantama’ ri tarungkua."

16Naassenna anjo pangngurusu’ rotia angkanaya anjo battuanna so’nana pangngurusu’ inunganga bajiki, nakana tommo ri Yusuf, "Asso’na tonga’; a’jujunga’ tallung karanjeng roti irate ri ulungku.

17Lalang karanjeng irate dudua a’rupa-rupai kanrejawa bonena untu’ karaenga. Mingka battui jangang-janganga angkanrei anjo sikamma kanrejawaya."

18Nakanamo Yusuf, "Iaminne battuanna anjo so’naya: Anjo tallua karanjeng, battuanna tallungngallo.

19Lalang tallungngalloa anne, lanasuroi karaenga taua ansamballei kallonnu sa’genna tassa’la’ ulunnu. Nampa nagentung kalennu ri se’reang benteng, sa’genna battu jangang-janganga angkanrei dagennu."

20Tallungngalloi pole, narapi’mi allo kalassukanna karaenga. Appare’mi passua’-suarrang untu’ sikontu pagawena. Naparentakammi sollanna nipasulu’ battu ri tarungkua anjo pangngurusu’ inunganga siagang pangngurusu’ rotia, nampa nierang mange ri dallekanna sikontu pagawea ri balla’ karaenga.

21Anjo pangngurusu’ inunganga nipoterammi mae ri jama-jamanna riolo.

22Mingka anjo pangngurusu’ rotia nihukkung matei. Yangasenna anjo kajarianga sicocoki siagang apa le’baka napau Yusuf.

23Mingka anjo pangngurusu’ inunganga nakaluppaimi Yusuf. Takkaluppa sikalimi ri Yusuf.


  Share Facebook  |  Share Twitter

 <<  Kejadian 40 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran