Dual Panel1"Kioki daennu Harun siagang sikamma ana’na, iamintu Nadab, Abihu, Eleazar, siagang Itamar, nampa sa’laki ke’nanga sollanna akkulle allayaniA’ salaku imang.
2Apparekko pakeang imang untu’ Harun, sollanna la’biri’ nicini’.
3Kioki sikontu tukang manjaika ia le’baka Kusare kacara’dekang. Suroi ke’nanga ampareki pakeanna Harun sollanna akkulle nisa’la’ untu’ allayaniA’ salaku imang.
4Suro tongi ke’nanga appare’ pattongko’ barambang, efod, juba, kameja nisulang, soro’bang siagang passikko’ aya’. Anjo pakeang imanga musti napareki ke’nanga untu’ daennu Harun siagang sikamma ana’na sollanna akkulle allayaniA’ salaku imang.
5Anjo pakeanga musti napareki ke’nanga battu ri kaeng wol gau’, lame butung siagang eja, bannang bulaeng siagang lenang alusu’. Pantaranganna anjo, efodka musti nibelo-beloi siagang sulang.
6(28:5)
7Nia’ rua otere’ ri salangganna untu’ ansikkoki anjo efodka; anjo musti nijaiki ri sa’rinna.
8Nia’ se’re passikko’ aya’, ia alusuka tannunna, bahanna sangkammai, musti nijaiki mae ri efodka sollanna a’jari se’re bageang.
9Angngalleko rua batu delima. A’boyako tukang bulaeng cara’deka, untu’ angngukiriki mae ri anjo batua areng-arenna sampuloa anrua ana’na Yakub situru’ atoro’na umuru’na, ta’annang areng ri tasse’rea batu. Nampa anjo ruaya batu paramata musti nipatabai lalang ri les bulaenga siagang nipanjoreng ri otere’ salangganna efodka, a’jari pammatei siagang pappiu’rangi mae ri sampuloa anrua suku Israel. Kammaminjo carana Harun angngerangi arenna ke’nanga ri salangganna, sa’genna iNakke, Batara, tuli Kuu’rangi ke’nanga.
10(28:9)
11(28:9)
12(28:9)
13Pantaranganna anjo ruaya les bulaeng,
14musti nipare’ tongi rua rante battu ri bulaeng ti’no’ ia nipasiotereka sangkamma otere’, untu’ nipataba mae ri anjo les bulaenga."
15"Apparekko untu’ Imang Lompoa se’re pa’lapa’ barambang untu’ nipake ri wattunna ero’ niasseng angkana apa ero’Na Allata’ala. Bahanna siagang sulanna anjo pa’lapa’ barambanga musti sangkammai siagang bahanna siagang sulanna efodka.
16Pare’na iamintu appasagi na nilappa’ rua, la’buna siagang sangkara’na massing 22 sentimetere’.
17Patabai appa’ barrisi’ paramata ri anjo pa’lapa’ barambanga. Ri barrisi’ makase’rea iamintu batu delima, topasa’ siagang baiduri.
18Ri barrisi’ makaruaya iamintu batu samru’, batu nilang siagang intang.
19Ri barrisi’ makatallua iamintu batu lasuardi, batu aki’ siagang batu kacubung.
20Ri barrisi’ makaappaka iamintu batu pirusu’, batu yaku’ siagang batu ratna campaka. Anjo sampuloa anrua batu paramata musti nisikkoki bulaeng.
21Ri tunggala’ paramataya musti niukiriki massing arenna tasse’rea suku battu ri anjo sampuloa anrua ana’na Yakub, untu’ a’jari pammatei siagang pappiu’rangi mae ri suku-suku Israel.
22Apparekko untu’ anjo pa’lapa’ barambanga rua rante bulaeng ti’no’ ia niotereka sangkamma otere’.
23Appare’ tongko rua ponto bulaeng siagang patabai ri rua cappa’ ratena anjo pa’lapa’ barambanga,
24nampa nupantama’ anjo ruaya rante bulaeng ri anjo ponto-pontoa sumpaeng.
25Rua cappa’ maraenna anjo rantea musti nipasikkoki mae ri rua les, sollanna akkulle anjo pa’lapa’ barambanga nipasialle siagang bageang dallekanna otere’ salangganna efodka.
26Nampa apparekko pole rua ponto bulaeng, na napataba ri anjo pa’lapa’ barambanga ri cappa’ rawana bageang lalanga natabaya efod.
27Le’baki anjo, apparekko pole rua ponto bulaeng, nampa nupataba ri bageang dallekanna anjo ruaya otere’ salanggana efodka, ri ampi’na passambung jai’na, bageang rawa sike’de’, irateanna passikko’ aya’ alusuka tannunna.
28Pontona anjo pa’lapa’ barambanga musti nipasiallei siagang otere’ gau’ ri pontona efodka sollanna anjo pa’lapa’ barambanga tuli nia’na irateanna passikko’ ayaka siagang tena nata’lappasa’.
29Punna antama Harun ri tampa’ matangkasaka, musti naerangi areng-arenna suku Israel niaka ta’ukiri’ ri pa’lapa’ barambanna, sollanna iNakke, Batara, tuli Kuu’rangi ummakKu.
30Boliki anjo Urim siagang Tumim lalang ri anjo pa’lapa’ barambanga untu’ napake Harun punna andallekang ri Nakke. Ri wattu-wattu kammaya anjo musti tuli ammakei pa’lapa’ barambang, sollanna akkulle naasseng angkana apa erokKu mae ri ummakKu Israel."
31"Juba nipakea ri efodka musti wol gau’ ngaseng nipare’.
32So’bolo’ kallonna nijarreki siagang pita nitannung sollanna tena nalammoro’ kekke’.
33Ri tammulilina biring rawana musti nipareki belo-belo iamintu a’rupa rappo delima battu ri wol gau’, lame butung siagang eja, nialla’-allakki siagang giring-giring bulaeng.
34(28:33)
35Anjo jubaya musti napakei Harun punna tugasaki salaku imang. Punna battu mae ri dallekangKu ri Kamara’ Matangkasaka yareka nabokoi anjo tampaka, lakalangngerangi sa’ranna anjo giring-giringa, sollanna tena namate.
36Apparekko se’re belo-belo bulaeng ti’no’ nampa niukiri’ anne kana-kana angkanaya, ‘Nisa’laki untu’ Batara’.
37Pasikkoki anjo mae ri soro’banga siagang otere’ gau’.
38Anjo belo-belo bulaenga musti napatabai Harun ri abanna, sollanna iNakke, Batara, eroKa’ antarimai sikontu passare naeranga tu Israel mae ri Nakke, manna pole nania’ kasalanna ke’nanga lalang naeranna anjo passarea.
39Kamejana Harun musti nitannungi battu ri lenang alusu’. Appare’ tongko se’re soro’bang battu ri lenang alusu’ siagang passikko’ aya’ nisulang.
40Apparekko kameja, passikko’ aya’ siagang soro’bang untu’ ana’-ana’na Harun sollanna la’biri’ ke’nanga nicini’.
41Pipakei sari’battannu Harun anjo pakeanga siagang ana’-ana’na. Minynyaki ke’nanga siagang minynya’ zaitun; kammaminjo nanilanti’mo ke’nanga siagang nisa’la’mo ke’nanga untu’ allayaniA’ salaku imang.
42Nampa papparekangi ke’nanga saluara’ bodo battu ri kaeng lenang; la’buna battu ri aya’ sa’genna bongga untu’ antongkoki bageang kalenna tenaya nasiratang nicini’.
43Anjo saluaraka musti tuli napakei ke’nanga punna antama’ ri KemaKu yareka nareppesi tampa’ pakkoro’bangnganga untu’ anggaukangi ibadaya salaku imang ri Kamara’ Matangkasaka, sollanna tena namate ke’nanga lanri kacinikangi bageang kalenna tenaya nasiratang nicini’. Anjo paratoranga tuli nipakei untu’ Harun siagang jari-jarina."