Alkitab Mobile SABDA
[VER] : [MAKASAR]     [PL]  [PB] 
 <<  Keluaran 32 >> 

1Ri wattunna nacini’ bansa Israel angkanaya sallo dudumi Musa natanaungapa ammotere’ Musa battu ri monconga, mingka tuli ammantanna rate, battumi ke’nanga allipungi Harun na nakana ri ia, "Taniassengai angkana apa kajariang ri Musa, anjo tau angngerangaki’ assulu’ battu ri Mesir; jari papparekammi ikambe se’re rewata akkullea ampimpingi ikambe."

2Nakanamo Harun ri ke’nanga, "La’gasa’ ngasengi sikamma anting-anting bulaeng niaka napake sikamma tubai’-bainenu siagang ana’-ana’nu nampa nuerang mae ri nakke."

3Jari massing nala’gasa’ ngasemmi anting-anting bulaenna ke’nanga nampa naerang mae ri Harun.

4Naallemi Harun anjo sikamma anting-antinga, nampa napasolong nampa napatiri’ antama’ ri katarang nappare’ se’re patung sapi. Nakanamo anjo bansaya, "He, Israel iaminne rewatanta, ia angngantarakki’ assulu’ battu ri Mesir!"

5Nampa appaenteng Harun se’re tampa’ pakkoro’bangngang ri dallekanna anjo sapi bulaenga nampa napa’la’bang napau angkana, "Ammuko nia’ passua’-suarrang untu’ ampakalompoi Batara."

6Ammukona bari’basa’ dudu, angngerammi tu Israel pirangkayu are olo’-olo’ untu’ a’jari koro’bang nitunu, na pirangkayu are pole untu’ koro’bang passiamakkang. Ammempomi ke’nanga angnganre siagang angnginung, nampa ammenteng untu’ assannang-sannang.

7Jari Nakanamo Batara ri Musa, "Naungko linta’, saba’ anjo bansa nupimpinga assulu’ battu ri Mesir a’gau’ ja’dala’mi.

8Ammengkami ke’nanga battu ri parenta-parentaKu. Appareki ke’nanga patung sapi bulaeng, nampa nasomba siagang nasare passare koro’bang. Nakana ke’nanga, iaminjo rewata angngerangai ke’nanga assulu’ battu ri Mesir.

9Kuassengi angkanaya anjo bansaya sanna’ kapala batuna.

10Teako coba-cobai anghalangiA’. LarroA’ ri ke’nanga siagang erokKa’ angngancuruki ke’nanga. Mingka ikau siagang jari-jarinu laKupa’jari se’re bansa malompo."

11Napala’mi Musa mae ri Karaeng Allata’alana, nakana, "O, Batara, angngapa namusti kamma anjo Kigaukang mae ri ke’nanga? Sai iKatte ampasalamaki ke’nanga battu ri Mesir siagang kakoasanTa na kagassingang lompoTa?

12Punna Kiancuruki ke’nanga, lanakanamo tu Mesirka angkana Kipimpingi anjo bansaya assulu’ battu ri Mesir sollanna akkulle Kibuno ke’nanga ri monconga siagang Kiancuru’ taba sikali ke’nanga. TeaKi’ appakammai, o Batara; Kipinra laloi anjo pattujunTa ero’ ancilakai anjo bansaya.

13Kiu’rangi sikamma atanTa Abraham, Ishak siagang Yakub. Kiu’rangi angkanaya assumpaKi’ a’janji untu’ assarei ke’nanga jari-jari rapang bintoeng ri langi’ jaina, kammayatompa angkanaya sikontu anjo butta Kipa’janjianga lanapatangi jari-jarina ke’nanga sa’genna satunggu-tungguna."

14Jari Napinrami Batara pattujunNa siagang ta’jariami Nagaukang anjo bala laNapabattua mae ri anjo bansaya.

15Naummi ammotere’ Musa battu ri anjo monconga na naerang anjo ruaya batu niaka tattulisi’ lalang sikamma parentaNa Allata’ala.

16KalenNa Allata’ala ampareki anjo batua siagang angngukiriki lalang sikamma parentaNa.

17Lalang a’jappana naung, nalangngere’mi Yosua ammarrang-marrang tu Israel. Nakanamo ri Musa, "Nia’ karicuang pa’bundukang ri kemaya."

18Nakanamo Musa, "Kamma nilangngere’ teai gora pammetang yareka gora nibeta; anjo sa’ra tau akkelong."

19A’reppese’namo Musa mae ri anjo pakkemaanga, nacini’mi anjo sapi bulaenga siagang tau sitabanga a’joge’-joge’; sanna’mi larrona. Anjoreng memanji, iamintu ri bangkenna anjo monconga, napatappasa’ anjo batu naeranga sa’genna ancuru’ tassimbung-simbung.

20Nampa naalle anjo patung sapi bate pare’na anjo tu Israelka, na napasolong, nadengka sa’genna alusu’ sangkamma limbu’bu’, nampa nacampuru’ siagang je’ne’. Nampa nasuro tu Israelka angnginungi.

21Nakanamo ri Harun, "Apa nagaukang ke’nanga mae ri kau sa’genna nulappassang ke’nanga doraka lompo?"

22Appialimi Harun angkana, "Teako larroi ri nakke; baji’ nuassenna ke’nanga antekamma lompona pattujunna ke’nanga anne untu’ a’gau’ ja’dala’.

23Nakana ke’nanga ri nakke, ‘Taniassengai angkana apa kajariang ri Musa, anjo tau angngerangaki’ assulu’ battu ri Mesir; jari papparekammi ikambe rewata akkullea ampimpingi ikambe.’

24Kusuromi ke’nanga ampassareangi belo-belo bulaenna, nampa napassareammo ke’nanga ri nakke. Kabusu’na anjo belo-belo bulaenga kupantamaki ri pepeka, nampa a’jarimo anne sapia!"

25Nasadarimi Musa angkanaya nabalang parekangi Harun anjo bansa Israel rapang jarang lappasaka battu ri barana, sa’genna nikakkalimo ke’nanga ri musu-musunna ke’nanga.

26Jari ammentemmi ri dallekanna pakke’bu’ lompona kemaya nampa a’gora angkana, "Inai-nai agang mae ri Batara musti battui mae anrinni!" Jari battumi suku Lewi angkulilingi Musa;

27na nakanamo Musa ri ke’nanga, "Karaeng Allata’alana Israel amparentakangi mae ri kau ngaseng untu’ ambi’buki pa’dannu nampa a’jappa allalo ri anne pakkemaanga, appakkaramula battu ri anne pakke’bu’ lompoa sa’genna mange ri pakke’bu’ lompo maraengannaya, nampa nubuno sikamma sari’battannu, sikamma sahaba’nu siagang sikamma siampi’ balla’nu."

28Nagaukammi suku Lewi anjo parentaya; anjo alloa nia’ kira-kira tallussa’bu tau mate nibuno.

29Nakana Musa mae ri suku Lewi, "Anne alloa nusa’la’mi kalennu untu’ a’jari imang allayaniai Batara lanri nubunomi ana’-anaka siagang sikamma sari’battannu; jari Nasare mako barakka’Na Batara."

30Ammukona nakanamo Musa ri anjo bansaya, "Ikau doraka lompo ngaseng mako. Mingka kamma-kamma anne eroka’ nai’ poleang ri monconga untu’ andallekang ri Batara; dasi-dasi na Napammopporanga’ siagang Napammopporangi dosa-dosanu."

31Nampa a’lampa poleammo Musa andallekang ri Batara, na nakana, "Anjo bansaya le’ba’mi a’gau’ dosa lompo. Appareki ke’nanga rewata battu ri bulaeng.

32Poro Kipammopporang laloi dosana ke’nanga; punna tena, lu’lu’mi arengku battu kitta’na sikamma tau attallasaka."

33Appialimi Batara angkana, "Tau dorakayaji bawang mae ri Nakke laKulu’lu’ arenna battu ri anjo kittaka.

34Kamma-kamma anne a’lampamako, nampa nuerang anjo ke’nanga mange ri tampa’ le’baka Kupau mae ri kau. MalaekakKu lanrurungangko, mingka nia’ se’re wattu sallang na narapi’ wattunna laKuhukkung ke’nanga lanri dosa-dosana ke’nanga."

35Nampa Napabattumo Batara balaya mae ri sikamma anjo taua, lanri napassana Harun ampareki anjo patung sapi bulaenga.


  Share Facebook  |  Share Twitter

 <<  Keluaran 32 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel