Alkitab Mobile SABDA
[VER] : [MAKASAR]     [PL]  [PB] 
 <<  Keluaran 9 >> 

1Nakanamo Batara mae ri Musa, "A’lampako mange andallekang ri karaenga nampa nupau mae ri ia angkanaya Batara, Allata’alana tu Ibrania, angkanai: Lappassangi ummakKu a’lampa sollanna akkulle ke’nanga anggaukangi ibadana mae ri Nakke.

2Punna taerokako allappassangi ke’nanga,

3lappabattuA’ garring lompo mae ri sikontu olo’-olo’ piaranu, kammayami jaranga, keledaia, untaya, sapia, gimbalaka, siagang bembea.

4LaKupasisalai olo’-olo’ piarana tu Israel siagang olo’-olo’ piarana tu Mesir. Tena olo’-olo’ piarana tu Israel manna sikayu lamate.

5INakke, Batara, ampattantui angkana ammuko naKugaukang anjo passalaka."

6Ammukona Nagaukammi Batara situru’ anjo apa le’baka Napau. Sikontu olo’-olo’ piarana tu Mesir mate ngasemmi, mingka olo’-olo’ piarana tu Israel manna sikayu tania’ mate.

7Napakkuta’nangngammi karaenga anjo apa kajarianga; nampa nicaritamo ri ia angkanaya olo’-olo’ piarana tu Israel manna sikayu tania’ mate. Mingka kapala batu iji karaenga siagang taerokai allappassangi anjo bansaya a’lampa.

8Nakanamo Batara ri Musa siagang Harun, "Angngalleko siapa are kangkanna au battu ri tampa’ pattunuanga. Nampa musti napakioroki Musa anjo aua nai’, ri dallekanna karaenga.

9Anjo aua latassiaraki mange ri sikontu pa’rasangang Mesir. Anjo aua la’jari lattangi mae ri kalenna taua, reppeka a’jari bokka’-bokka’ nia’ nanana."

10Nampa naallemo Musa siagang Harun anjo aua, na mange andallekang ri karaenga. Napakioro’mi Musa anjo aua nai’. Ammumbami lattanga ri kalenna taua siagang olo’-oloka, nampa reppe’ a’jari bokka’ a’nanaya.

11Sikamma tau niaka pangngissenganna ri anjo tu Mesirka tena ngaseng nakkulle mange andallekang ri Musa lanri rassi ngasengi kalenna ke’nanga siagang lattang sangkamma tu Mesir maraenganga.

12Mingka nipa’jari terasa’ iji ulunna anjo karaenga ri Batara, na sangkamma le’baka Napau Batara, taerokai anjo karaenga anjampangi kananna Musa siagang Harun.

13Nakanamo Batara ri Musa, "A’lampako ammuko bari’basa’ dudu mange andallekang ri karaenga, nampa nupabattuang angkanaya Batara, Allata’alana tu Ibrani Nakana: Lappassangi ummakKu sollanna akkulle ke’nanga a’lampa mange anggaukangi ibadana mae ri Nakke.

14Anne kamma lappabattuA’ bala, tena namae ri sikamma pagawea siagang ra’yaka bawang, mingka ikau pole, sollanna nuasseng angkanaya tena sangkammangKu ri sikontu linoa.

15Ebara’ angkana erokKa’ anghukkungko siagang ra’ya’nu iamintu Kupitujuiko garring, mattantu sallo mako tena ngaseng.

16Mingka Kulappassang ngasengko attallasa’, sollanna akkulle Kupappicinikang kakoasangKu mae ri kau, sa’genna a’jari masahoro’ arengKu ri sikontu linoa.

17Mingka manna mamo nakamma anjo, tuli tinggi langganu siagang taerokako allappassangi ummakKu a’lampa.

18Ammuko bari’basa’, ri wattu kamma-kammaya anne, lappabattuA’ bosi es sannaka heba’na, tenayapa nale’ba’ kajariang ri Mesir battu riolo sa’genna kamma-kamma anne.

19Jari parentakammi sollanna anjo sikontu olo’-olo’ piaranu siagang sikamma apa-apannu niaka pantara’ nierang antama’ ri tampa’ amanga. Sikontu taua siagang olo’-olo’ piara niaka pantara’ takkulleai a’la’lang siagang lamatei nituju ri es."

20Nia’ siapa are pagawe a’jari malla’ allangngereki anjo kananNa Batara. Naerammi sikamma atanna siagang olo’-olo’ piarana ke’nanga antama’ ri balla’ sollanna kala’langngang.

21Mingka maraenganga tanajampangiai anjo pappakaingaka, siagang naboli’ji sikamma atanna siagang olo’-olo’ piarana ke’nanga ri paranga.

22Nampa Nakanamo Batara ri Musa, "Angkaki limannu nai’, nampa laturung bosi eska ri sikontu butta Mesir. Anjo bosia lanatujui taua, olo’-oloka siagang sikontu lamung-lamunga ri kokoa."

23Naangka’mi takkanna Musa nai’, nampa Napaturummo Batara gunturuka siagang bosi eska, kammayatompa kilaka antujui buttaya. Napabattumi Batara

24bosi eska ia sanna’ dudua siagang nirurunganga ri kila’ assisambung-sambunga. Iaminjo bosi es kaminang sannaka lalang ri riwaya’na Mesir.

25Ammanrakimi anjo bosi eska ri sikontu pa’rasanganga, napanraki sikontu apa-apa niaka ri kokoa, kammayatompa rupataua siagang olo’-oloka. Sikontu lamung-lamung niaka ri kokoa panra’ ngasengi, siagang sikamma poko’-pokoka nirumbangngang todong.

26Poro daera Gosyen bawang, iamintu tampa’ pammantangnganna tu Israel, tena nitujui ri anjo bosi eska.

27Nampa nakio’mi karaenga anjo Musa siagang Harun, na nakana, "Dorakama’. Batara annaba, inakke siagang ra’yakku a’gau’ ja’dala’.

28Appala’ doang mako mae ri Batara; ganna’mi kasessanna ikambe lanri anne gunturuka siagang bosi eska. Lakulappassang mako a’lampa. Tea’ mako ammantangngi pole anrinni."

29Nakanamo Musa ri karaenga, "Tasalloai battuku assulu’ ri pantaranna kotaya, lakuangkaki limangku untu’ appala’ doang ri Batara. Anjo gunturuka siagang anjo bosi eska lammari siagang la’jari sannangi, sollanna kiasseng karaeng, angkanaya anne buttaya Batara pata.

30Mingka kuassengi angkanaya ikatte siagang sikamma pagaweta tenapa namalla’ mae ri Karaeng Allata’ala."

31Anjo lamung-lamung birallea siagang ase kokoa laputtai, lanri anjo birallea sitabangi a’bunga siagang ase kokoa sitabang a’bulere’.

32Mingka gandunga siagang lise’-liseranga talapanrakai lanri teaipi wattunna.

33Nampa nabokoimo Musa anjo karaenga na’lampa assulukang kota; anjoreng naangka’mi limanna appala’ doang ri Batara. Anjo memang wattua ammarimi gunturuka, bosi eska siagang bosia.

34Nacini’na karaenga anjo apa kajarianga, a’gau’ dosami pole. Ia siagang sikamma pagawena tuli kapala batuna.

35Kamma le’baka Napau Batara tete ri Musa, taerokai anjo karaenga allappassangi tu Israel a’lampa.


  Share Facebook  |  Share Twitter

 <<  Keluaran 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran