Mazmur 20 (MAKASAR)

1Untu’ pamimping pakelong. Pammujina Daud. (20-2) Poro Napialiko Batara ri wattu kasukkarrang, poro nala’langngiko koasaNa Allata’alana Yakub!

2(20-3) Poro akkiringi bantuang battu ri Balla’Na, na Nasareko pannulung battu ri Bulu’ Sion.

3(20-4) Poro Nau’rangi ngasengi sikontu passarenu, na sannang ri sikamma koro’bang nitununu.

4(20-5) Poro Nasareko sikontu nukaerokia, na Napa’jari sikamma rancananu.

5(20-6) Na makkio’ marannu ikambe lanri pammetannu, nimangngangka’ bate-bate untu’ mammuji ri Allata’alata. Poro Napa’jari Batara sikontu pappala’nu.

6(20-7) Anne kamma kuassemmi angkana Batara assarei pammetang mae ri karaeng nipileNa. Nipiali ri Batara battu ri suruga matangkasa’na; lanri koasaNa Batara, nanggappa pammetang lompo.

7(20-8) Nia’ tau ampattoangi kareta pa’bundukanna, nia’ todong appattoangi jaranna. Mingka ikatte nipattoanga koasaNa Batara, Allata’alata.

8(20-9) Latatto’roi ke’nanga na tu’guru’ mingka ikatte lambangungki’ nai’ ammenteng kassa’.

9(20-10) O, Batara, Kisarei pammetang karaenga, Kipialimi ikambe lalang makkio’na ikambe.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

<< Mazmur 20 >>