Dual Panel1Pammujina golongang Korah. Untu’ pamimpin pakelong. Lagu Alamot. (46-2) Allata’ala pa’la’langangku siagang kagassingangku; tuli sadiai siagang akkullei antulunga’ lalang kasukkarang.
2(46-3) Talamallaka maki’, manna pole ta’goccang linoa, siagang tallang sikamma monconga naung ri tamparanga;
3(46-4) manna na’jallo’ tamparanga siagang bombang lompo, nannekkere’ bulu’-buluka natunrung.
4(46-5) Nia’ lo’lorang je’ne’ binanga ampakarannui KotaNa Allata’ala, tampa’ pammantanganNa Allata’ala Kaminang Tinggia.
5(46-6) Ammantangi Allata’ala anjoreng, jari talapossokami anjo kotaya; laNatulungi ri wattu ammumbana alloa.
6(46-7) A’gunturu’mi Allata’ala, na ancuru’ taba sikali linoa; gegere’mi bansa-bansaya, runtummi sikamma karaenga.
7(46-8) Batara Kaminang Makoasa anrurungangki’, Allata’alana Yakub anjagaiki’.
8(46-9) Umba, ciniki apa le’baka Nagaukang Batara; tamaka lompona bate pare’Na ri lino!
9(46-10) Napammari pa’bundukanga ri sikontu linoa, anrong panaya siagang pokea Naancuruki, pa’lapa’ a’bundalaka untu’ batangkalea Natunui.
10(46-11) Nakana, "Pammari a’bunduka; assengi, angkana iNakke anne Allata’ala, iNakke malompo ri alla’na bansa-bansaya, malompo ri sikontu linoa."
11(46-12) Batara Kaminang Makoasaya anrurungangki’, Allata’alana Yakub anjagaiki’.