Dual Panel1Pammujina Asaf. O, Allata’ala, bansa tenaya naassengKi’ naempoimi butta pisakaTa. Nara’massimi BallatTa, napa’jarimi Yerusalem rumbangngang balla’.
2Nabokoi ke’nanga maya’-maya’na sikamma atanTa a’jari kanrena jangang-jangang ri allaka. Nabalang parekangi sikamma maya’ tunikamaseanTa a’jari kanrena olo’-olo’ liaraka.
3Ri sikontu kota Yerusalem tattumpa cera’na ke’nanga sanrapang je’ne’; tena antarawangi ke’nanga.
4Nicau-caumi ikambe ri bansa-bansa siampi’na ikambe, nakakkalimi siagang nacau-caumi ikambe.
5O, Batara, maka lasitulusutTa larro, siagang a’rinra kamma pepe’ kimburuTa?
6Kitumpami pangngalarroinTa mae ri bansa-bansaya ia tenaya naassengKi’, siagang mae ri sikamma kakaraengang tenaya nanynyomba mae ri Katte.
7Saba’ le’ba’mi naballassi ummatTa, naancuru’ tampa’ pammantanganna ke’nanga.
8TeaKi’ hukkungi ikambe lanri dosana boe-boena ikambe. Linta’ maKi’ kamaseangi ikambe, lanri tappu’ minasami ikambe.
9Kitulung laloi ikambe o, Allata’ala, Tumappasalama’na ikambe, Kipammopporangi dosa-dosana ikambe siagang Kilappassangi ikambe untu’ kalompoang kalenTa.
10TeaKi’ lappassangi bansa maraenga akkuta’nang ri kambe, angkana, "Kemaeji Allata’alana ke’nanga?" Boli’mi kamma naccini’ ikambe pa’balasa’ mae ri bansa-bansa ambunoai ata-atanTa.
11Kipilangngeri laloi kunrarenna sikamma tau nitahanga; poro sikamma tau nipattantua lamate nitallassi lanri koasaTa.
12O, Batara, Kibalasaki anjo bansa-bansa a’lappi tuju lanri sikontu panghinaanna mae ri Katte.
13Nampa ikambe ummatTa, gimbala’ Kikalawakia, lappala’ sukkuruki mae ri Katte sa’genna satunggu-tungguna, siagang mammuji mae ri Katte lalang sikontu turungang.