1Pammuji. Akkelongko lagu beru mae ri Batara, lanri sikamma panggaukang malompoNa! Lanri koasa siagang kagassingang KalenNa nanggappamo pammetang.
2Nakabarrang Batara pammetanNa; napa’nyatai kaadelanNa mae ri bansa-bansaya.
3Nau’rangi pangngamaseanNa siagang pa’mai’ tamamminraNa mae ri Israel umma’Na. Sikontu bansaya ri lino nacini’mi pammetanNa Allata’alata.
4Akkio’ rannuko mae ri Batara, he sikontu lino! Pujimi Batara siagang kelong na makkio’ rannu.
5Akkelongko lagu pammuji mae ri Batara, siagang ko’bi’-ko’bi’ kacapi.
6Pasa’rai musika siagang tarompeka, akkio’ rannuko mae ri Batara, Karaenta.
7Ammarrungko he tamparang siagang sikontu bonena buttaya siagang sikontu niaka ri tompo’na.
8Boli’mi kamma attempa-tempa lima sikamma binangaya, nakkio’ rannu sikamma buluka ri dallekanNa Batara.
9Saba’ battui untu’ angngadeli linoa; bansa-bansaya laNaadeli siagang adele’ na tojeng.