Alkitab Mobile SABDA
[VER] : [MAKASAR]     [PL]  [PB] 
 <<  Yehezkiel 18 >> 

1Nakana Batara ri nakke,

2"Angngapai anne paruntu’ kanaya natuli nipau ri pa’rasangang Israel? ‘Tau toaya angnganre rappo anggoro’ kacci kasia’na, mingka ana’-ana’na tilu nasa’ring giginna.’

3Lanri iNakke, Allata’ala mattallasaka, Batara Kaminang Tinggia, anjo paruntu’ kanaya tenamo nalanitappu ri Israel.

4Nyawana tunggala’ taua iNakke pata, baji’ nanyawana tau toana kammayatompa nyawana ana’na. Tau dorakaya, lamatei.

5Ebara’ angkana nia’ tau baji’, adeleki siagang lambusuki.

6Tena nanynyomba ri barhalana tu Israel yareka tena nangnganre koro’bang nipassareanga ri tampa’-tampa’ panynyombanga ri rewata-rewataya. Tale’bakai naodo’ bainenna paranna tau yareka attinro siagang baine battua bulanna.

7Tale’bakai annipu yareka angngella’. Barang-barang napappita’gallanga taua mae ri ia tuli napoterangi. Tau cipuruka nasarei kanre na tau tenaya bajunna nasarei baju.

8Tale’bakai assare angnginrang nampa nasuro bungai. Taerokai anggaukangi kaja’dallanga siagang punna nia’ pa’beserang tuli natangngai siagang adele’.

9Nagaukangi parentaKu siagang naturuki hukkung-hukkungKu. Tau kammayami anjo nikana tau lambusu’ siagang latuli attallasa’. INakke, Batara Kaminang Tinggia anne akkana.

10Mingka ebara’ angkana anjo taua nia’ ana’na nangai angngella’, ammuno, siagang anggaukang jai kaja’dallang maraengannaya

11tenaya nale’ba’ nigaukang ri manggena. Angnganrei koro’bang nipassareanga ri tampa’-tampa’ panynyombanga mae ri rewata-rewataya. Nangai naodo’ siagang naagang sikatinroang bainenna paranna tau.

12Nangai annipu tu kasi-asi, angngella’, naalle barang-barang napappita’gallanga taua mae ri ia. A’lampai mange ri balla’ rewatana tau tenaya natappa’ ri Batara siagang anynyombaya barhala appakaringi’-ringi’.

13Punna assarei angnginrang appalaki bunga. Apaka anjo tau kammaya lattallasaki? Tena! Nagaukammi sikontu panggaukang appakaringi’-ringika anjo, siagang lamatei. Anjo namate lanri panggaukanna tonji.

14Ebara’ angkana anjo tau a’gau’ jaia kaja’dallang nia’ ana’na, nampa anjo anaka naciniki anjo sikontu panggaukanna manggena, mingka tena naturuki.

15Anjo anaka taerokai anynyomba ri barhalana tu Israel, yareka angnganre koro’bang nipassareanga ri tampa’-tampa’ panynyombanga ri rewata-rewataya. Tale’bakai nagoda bainenna paranna tau,

16yareka najallakkang yareka naella’ paranna tau. Tuli napoterangi barang-barang napappita’gallanga taua mae ri ia. Tau cipuruka nasarei kanre na tau tenaya bajunna nasarei pakeang.

17Tale’bakai a’gau’ ja’dala’ yareka assare angnginrang nappala’ bunga. Mannuruki ri hukkung-hukkungKu siagang nagaukangi parentaKu. Anjo anaka tena nalamate lanri dosa-dosana manggena, passangalinna latuli attallasaki.

18Kabalekanna, manggena nangaia annipu, angngella’ siagang anggaukangi kaja’dallang maraengannaya, lamatei lanri dosa-dosa nagaukanga kalenna.

19Mingka nia’ kapang tau akkuta’nang angkana angngapa anjo anaka natena natanggongi dosa-dosana manggena. Pialinna iamintu, lanri anjo anaka bajiki siagang lambusuki. Ia mannuruki ri hukkung-hukkungKu siagang majarreki anggaukangi, jari tuli lattallasaki.

20Inai tau doraka iami lamate. Anjo anaka tena namusti natanggongi dosana manggena; kabalekanna, manggena tena todong namusti natanggongi dosa-dosana ana’na. Tau bajika langgappai pahala baji’ lanri panggaukang baji’na. Na tau ja’dalaka lanakasiaki sessaya lanri panggaukang ja’dala’na.

21Punna nia’ tau ja’dala’ nampa tenamo nagaukangi pole dosaya, siagang appakkaramulami naturuki hukkung-hukkungKu, kammayatompa nagaukang panggaukang bajika siagang annabaya, ia tena nalamate.

22Sikontu dosana lanipammopporangi; lattallasaki lanri nagaukangi apa annabaya.

23Apaka nupikkiriki angkana iNakke, Batara Kaminang Tinggia sannangA’ punna matei tau ja’dalaka? Tena sikali-kalia! Kukellai nanabokoi dosa-dosana sollanna akkulle tuli attallasa’.

24Mingka punna nia’ tau baji’ natenamo nagaukangi bajika, ba’lalo appakkaramulami nagaukang kaja’dallanga siagang sikontu panggaukang appakaringi’ biasaya nigaukang ri tau ja’dalaka, maka lakkullei tuli attallasa’? Tena! Battu ri sikamma anjo panggaukang-panggaukang baji’na, tena manna se’re laniu’rangi poleang. Lamatei lanri nagaukanna dosaya siagang lanri tenana namajarre’ mae ri Nakke.

25Nakulle kapang nia’ tau akkana kamma anne, ‘Anjo tindakanNa Batara salai.’ Pilangngeri he tu Israel! Maka salai anjo tindakangKu? Ikaumi sala.

26Punna nia’ tau baji’ natanagaukangamo pole panggaukang bajika, ba’lalo appakkaramulami a’gau’ ja’dala’, ia lamatei, lanri anjo panggaukang ja’dala’ le’baka nagaukang.

27Mingka punna nia’ tau ja’dala’ nampa tenamo na’gau’ ja’dala’ pole passangalinna appakkaramulami nagaukang panggaukang bajika siagang annabaya, lasalamaki nyawana.

28Nasadarimi sikontu panggaukanna nampa ammari anggaukangi dosaya. Lalang kammana anjo tenamo nalamate, passangalinna tuli lattallasaki.

29Na ikau, he sikamma tu Israel, nukanai anjo tindakanNa Batara salai. Maka salai anjo tindakangKu, he Israel? Tena! Passangalinna ikaumi sala!"

30Nakana Batara Kaminang Tinggia, "He tu Israel, laKuadeli tunggala’ taua situru’ massing panggaukanna. Toba’ mako battu ri dosa-dosanu. Teako lappassangi dosanu angngancuruki kalennu.

31Pamari anjo sikontu panggaukang ja’dala’ nugaukanga siagang lappassammi a’jari beru atinnu siagang pikkirannu. Angngapa numusti mate?

32Tena kusannang punna nia’ tau mate. Bokoimi dosa-dosanu sollannu tuli attallasa’. INakke Batara Kaminang Tinggia, anne akkana."


  Share Facebook  |  Share Twitter

 <<  Yehezkiel 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran