Alkitab Mobile SABDA
[VER] : [MANGGARAI]     [PL]  [PB] 
 <<  2 Korintus 9 >> 

Raom Séng Latang Te Ata Serani Oné Yérusalém

1Gori keturu latang te ata serani oné tana Yudéa, toé maléng tulis kolé laku agu méu.

2Aku poli pecing te méu laséng campé atas. Hitu ata pandé bombong rak daku oné ata Makédonia. Tombo laku agu isé, te méu ata Akhaya ho’o pu’ung ntaung olo ga poli mengkek raom séng. Agu gori de méu pandé kéngko ata do.

3Aku wuat hi Titus agu sua taus asé-ka’é ca imbi, kudut bombong rak dami latang te méu oné gori ho’o, toé tombo bod. Jari, méu paka mengkek di’a-di’a tu’ung ného hitut poli tombon laku.

4Kudut émé ata Makédonia mai cama laing agu akus, repéng laku te méu poli mengkeks, wiga ami toé ritak ali bombong rak dami hitu.

5Hitu tara jerad laku hi Titus agu sua asé-ka’é ca imbi situ kudut ngo pado olos, kudut wintuk réco situt poli reké de méu olo. Ali hitu ita si’angn cepisa te réco de méu hitu téing le gawas nai toé ali dedek molé.

Téing Ali Nisang Nai

6Idep di’a-di’a go’ét ho’o: Ata weri cekoé, ako cekoé koléy, ata weri do, ako do koléy.

7Poro néténg-néténg méu téing lorong téti nai rus, néka ali mendo nai ko ali denet data, ai Mori Keraéng momang ata siot téing ali nisang naid.

8Mori Keraéng ngancéng téing sanggéd widang latang te méu, kudut méu toé géong oné sanggéd cao-ca, ngot manga labid latang te pandé di’a agu campé tau.

9Ného manga tulis: “Hia pati agu téing oné ata lénggé, di’a Diha manga dengkir tédéng lén.”

10Hia ata ambi wini latang te isét weri agu roti latang te hang. Hia kolé ambi wini latang te méu kudut pandé bekas agu pandé todos wua di’a de méu.

11Méu te ciri boram oné sanggéd cao-ca, wiga méu téing mtaung ali gawas nai. Ami ata létangn téing de méu hitu te pandé wali di’a oné Mori Keraéng.

12Ai gori keturu ali momang ho’ot pandé de méu, toé hanang pandé rapak sékék data serani, maik téing wali di’a oné Mori Keraéng.

13Ai méu poli ta’ong damang oné gori keturu hitu, isé bong ngasang de Mori Keraéng ali ita junggu de méu oné imbi Keréba Di’a di Kristus. Isé kolé bong ngasang de Mori Keraéng ali gawas de méu le pati sanggéd cao-ca oné isé agu sanggéd ata.

14Itu tara oné ngaji disé, nuk mtaung méu ali do kétas widang de Mori Keraéng latang te méu.

15Wali di’a oné Mori Keraéng landing widang Diha hitut toé kéta ngancéng carod!


  Share Facebook  |  Share Twitter

 <<  2 Korintus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel