Dual Panel1Ebeibeyaif didif dudou os dagot mar gu iwa ongga irek ebirfager Mod Ari. Didif tein bera direk ebirfaga egens nou rusnok Mod Ari, noba sis fob didif dik Yesus Kristus eita efera okora gu diteij. Noba didif dimesma dufoka ongga aksa eteb gij mona ongga Yesus Kristus ongksons en morototuma jera iwa tein. Jefeda didif duis gu iwa ongga irek ebirfager Mod Ari jeskaseda iwa yut joug Allah efen rusnok rot iskusk ojgomu. Koma erek gembala egens ongga ot joug ebirfaga egens efen domba-domba rot iskusk tein. Beda iwa inot joug rua jeska rusnok enjgineg rubk iwa rot ojgomu guru, tina yut joug rua jeni yeyin idou ongga erirei rot ojgomu. Jeska koma bera ongga Allah ondou os rot. Noba iwa inot joug rua jeskaseda isma mareibra ofoukou rot ojgomu guru, tina yut joug rua jeska idou os yufij rua ojgomu.
2(5:1)
3Iwa ineradgodu rua rot yuga ongga owesa ojgomuja tein guru, tina iwa ita mar ongga erek orocunc rot ongkoska nou rua ongga erek Allah efen domba-domba ojgomu. Jeska Allah oncunc iwa jeskaseda yufijir.
4Iwa ita mar erek koma ojgomu. Noba gij mona ongga Yesus Kristus, ongga erek ebirfaga nou gembala nomnaga ongksons en fob, beda iwa imesma yeyin ifons ongga efen efera osok eteb doska. Yeyin ifons insa koma bera eneseiseifa jeska iwa jinaga guru.
5Noba skoita iwa ongga iforoka efes ros, bera didif duis gu iwa jeskaseda yufij ebirfager Mod Ari ojgomu. Noba iwa yuin keingg idou efesi rot tenten moguma. Iwa itunggom mar erek koma jeska ranggot gij Mar Efeyi Ebsi oida, "Allah eretei rot rusnok ongga rufra risinsa rufoka erek aksa eteb, tina Ofa eita oufamofa eteb skoita rusnok ongga ruin keingg risinsa rudou efesi."
6Jefeda iwa yuin keingg isinsa idou efesi skoita Allah ongga efen owesa efek eteb jeskaseda Ofa omofra yeyin ifoka erek aksa gij mona ongga Ofa anggot rot.
7Noba idou enefeneinei rot mar egema tein guru, tina yuisum gij Allah rot mar nomnaga ojgomu. Jeska Ofa bera omot joug iwa ojgomuja.
8Iwa yut joug idou efesi rot ahais, noba yusku joug isinsa tein rot mar ongga ofogog skoita iwa. Jeska Bilis bera erek singa egens ongga edib mar efen ojgomuja jeskaseda eska fogora et. Erek koma tein ofa bera ofogog eteb rot iwa, noba ofa ohca moroju jeskaseda otunggom mar ongga ofogog skoita iwa tein.
9Jefeda oisouska idou ongga eredi Allah rot ahais bera iretei Bilis ojgomuja. Jeska iwa ijginaga rot fob oida yeyin ihujir ongga ruroru Yesus Kristus rejrej monuh nomnaga bera rita rifera okora morototuma erek iwa ebeibeyaif tein.
10Noba iwa ita mar erek koma tein jeska Allah, ongga odou oufamofa eteb rot mimif, bera enjeka iwa jeskaseda isma ifoka ongga aksa morototuma jera Yesus Kristus fob. Noba nou ongga mona estir kef ongga iwa ita ifera okora bera oisa fob, beda Ofa emeisisi joug idou efesi deika ojgomuja. Beda Ofa tein emeita owesa efek eteb gu iwa gij mar nomnaga ongga iwa intunggom fogora iwa imot rot ahais ojgomuja.
11Mimif nomnaga mudou os jeskaseda Allah ofoka ereij keingg rusnok nomnaga rot ahais ojgomuja. Ainsoma.
12Silas bera erek dedin edohuj egens ongga ororu Yesus Kristus rot tenten fob. Noba ofa omfij didif jeskaseda dugu surat egens kef ongga estir gu iwa. Didif dunggu surat egens kef gu iwa jeskaseda disisi joug iwa. Noba didif disa surat egens kef jeskaseda iwa ijginaga rot tenten oida, oisouska Allah odou ongga oufamofa eteb rot mimif, bera mimif misma eiteij ah ongga efeinah. Jefeda iwa iroru mar ongga didif danggot gij surat egens kef fob ojgomuja.
13Noba rusnok ongga ruroru Yesus Kristus gij kota Babilon, noba ongga Allah oncunc morototuma jera iwa, bera ruisu iwa. Noba Markus, ongga erek dedin edesa egens, ofa bera oisu iwa tein.
14Gij mona kenefa ongga iwa imorodosuma, beda iwa yagei itma erek irocunc rot oida idou omokorema fob. Didif dum diteij gu Allah jeskaseda iwa nomnaga ongga iroru Yesus Kristus fob imesma iteij ah ongga eskeiramera ojgomuja. Ainsoma.