Alkitab Mobile SABDA
[VER] : [MEYAH]     [PL]  [PB] 
 <<  1 Timotius 1 >> 

1Didif Paulus bera dunogu surat egens kef. Didif direk rasul egens ongga dufij Yesus Kristus. Didif dijerek rasul egens jeska Allah, ongga eita eiteij ah ongga efeinah gu mimif, noba Yesus Kristus ongga mimif muisum gij, bera oncunc didif erek koma. Didif dugu surat egens kef gu bua Timotius ongga dijeka erek dedin edesa, jeska bua buroru Yesus Kristus rot tenten fob. Didif duis gu mifmin mika Allah jera Yesus Kristus ongga erek mifmin Tuhan, jeskaseda Ofa eita oufamofa eteb gu bua, noba jeskaseda ofa odou okora rot bua noba eita eiteij ah ongga eskeiramera eteb gu bua ojgomuja.

2(1:1)

3Timotius, didif dudou os rot oida bua biker gij kota Efesus erek didif duis gu bua sis mona ongga dingker gij monuh Makedonia ros. Didif dagot erek koma jeska rusnok rineya gij kota Efesus bera ruftuftu mar ongga erek tenten guru. Bua biker gij kota koma jeskaseda bagot joug rua osok gij mar insa koma ojgomu.

4Bagot joug rua jeskaseda rua rinefesij mar ofoukou osok gij rerin mahteyi ojgomuja tein, era jeskaseda rua rinedibdib rot rerin rufou ebiedi tein ojgomuja guru. Jeska mar koma bera orotunggom rusnok rudou erebibei rot ojgomu, noba koma onofij rua jeskaseda riker joug rusnok enjgineg tein ongga ruroru Allah jinaga guru.

5Didif dinagot rot mar erek kef jeskaseda rusnok insa koma rita rudou ongga ebsi komowa noba eskeira fogora rutunggom mar ongga erek tenten ojgomu. Beda rua rumororu Yesus oga rot tenten tein noba rua rudou omokorema tein.

6Tina rineya jeska rua bera ringkikif jeska mar ongga oufamofa insa koma fob. Jefeda mar ongga rua rifesij moguma rot bera onofij rua jinaga guru.

7Rua rutunggom mar erek insa koma jeska rua rudou os rija erek ebirfager ongga ruftuftu rot hukum Musa gu rusnok Mod Ari. Tina rua risinsa rudou enebriyi gij mar ongga rua ruftuftu rot guru. Noba rua rusujohu rot oida rudou efesis gij mar insa koma fob, tina guru. Jeska rua rudou eineina gij mar ongga rua risinsa ranggot rot gu rusnok insa koma ojgomu.

8Erek koma, tina mimif mijginaga rot oida hukum ongga Musa anggot rot jeska Allah bera ongkoska rot rusnok ongga ruroru hukum insa koma rot tenten ojgomu. Tina rusnok rineya bera runoftuftu osok gij hukum insa koma rot tenten guru.

9Mimif tein mijginaga rot oida Allah eneita hukum insa koma jeskaseda ofra mar okum keingg rusnok ongga rudou ebsi komowa guru. Tina Ofa eita hukum koma jeskaseda ofra mar okum keingg rusnok ongga rutunggom mar ongga oska ongga ekirsa rot hukum Musa fogora rukoja Allah tein. Rua runougif gu Allah guru, noba rua rita mar ongga oska ojgomuja. Jefeda Allah omofra mar okum keingg rua ongga runororu mar ongga erek Ofa odou os rot guru. Rua runot joug rudou efesi rot Allah oga guru, tina rua ragob rerin riker jera riser tein. Noba rua ragob rusnok enjgineg tein. Jefeda rua rimesma mar okum jeska Allah si.

10Ofa omofra mar okum keingg rusnok ongga risiri morototuma ni, runer ongga raha rerin ruhoner jah noba rudou ockahtah rot runer enjgineg ojgomu ni, rua ongga ragei rusnok rourou jeskaseda ruhu rua gu rusnok enjgineg ni, rusnok ongga ruhurmei mar rourou gij rusnok egema ni, rusnok ongga rucuwei mar gij rusnok enjgineg ni, jera rusnok enjgineg tein ongga runtunggom mar ongga ekirsa rot hukum Musa tein si.

11Mar ongga didif duftuftu insa koma bera en jeska Allah oga ongga oufamofa, noba mimif nomnaga misitit Ofa rot. Noba Ofa oncunc didif jeskaseda dijefesij rot efen oga insa koma gu rusnok enjgineg fob.

12Didif duis oufamofa eteb gu Tuhan Yesus kristus, jeska Ofa odou eredi didif fogora omfra didif jeskaseda duftuftu mar osok gij efen ofoka gu rusnok enjgineg. Ofa bera eita owesa efek gu didif fogora didif duftuftu mar gu rusnok erek koma.

13Sis fob bera didif danggot mar ongga oska eteb rot Yesus. Gij mona insa koma didif dufra mar okum keingg rusnok ongga ruroru Ofa ojgomuja. Noba dudou efesi oska rot Yesus jera rusnok nomnaga ongga ruroru Ofa ojgomu. Erek koma tina Yesus ocunc efen odou ongga okora eteb rot didif, jeska didif dunororu Ofa gij mona insa koma enesi. Jefeda didif dinejginaga rot oida mar ongga didif duntunggom insa koma bera erek onoska enesi.

14Tina Tuhan odou okora eteb rot didif noba ofij didif. Jefeda ebeibeyaif didif duroru Ofa noba dudou okora rot Ofa eteb.

15Yesus Kristus ojuj jah mebif jeskaseda osuwa rusnok jeska rerin mar ongga oska. Koma bera tenten ojgomu, jefeda rusnok ruroru mar koma ojgomu. Jeska sis fob didif tein bera dita mar ongga oska eteb ekirsa jeska rusnok nomnaga.

16Erek koma tina Yesus odou okora eteb rot didif. Noba Ofa eita odou erek koma jeskaseda orocunc gu rusnok nomnaga oida Ofa oin keingg odou efesi noba enaha mar okum ebeirens keingg rusnok ongga rutunggom mar ongga oska enesi. Sis fob didif dutunggom mar ongga oska ekirsa jeska rusnok nomnaga. Tina Ofa oh odou ongga ongkoska rot didif jeskaseda rusnok enjgineg tein rik beda rikikif jeska rerin mar ongga oska fogora ruroru Ofa tein. Beda rua rimesma eiteij ah ongga efeinah tein si.

17Mimif muis oufamofa eteb gu mifmin mika Allah ongga ofoka ereij keingg rusnok erek raja egens nou mona ongga ah aibin ojgomuja. Ofa bera eker ah aibin. Noba erek minek Ofa gu miteij tein guru, tina Ofa bera Allah ongga egensmes ojgomu, noba mimif mugif gu Ofa noba misitit Ofa rot gij mona ongga ah aibin ojgomuja.

18Timotius, didif dijeka bua morototuma erek dedin edesa egens. Didif dudou os disisi keingg bua rot mar ongga ebirfager Mod Ari ranggot jeska Allah osok gij bua sis fob. Jefeda bua tein buftuftu rusnok insa koma rot mar ongga dinefesij gu bua gij surat kef. Noba erek tentara egens ongga ot rot ahais fogora agob mesa, beda bua tein but rot ahais gij mar ongga ereneni bua ojgomu.

19Gij mona ongga bua buftuftu rot Allah oga erek insa koma, beda bua bisinsa tein buroru mar koma rot tenten ojgomu. Bua butunggom mar ongga bua bisinsa tein bijginaga rot ongga erek tenten ojgomu. Jeska rusnok rineya bera rungkoja rot mar insa koma fogora runororu mar ongga tenten deika guru. Jeska rua rita mar insa koma, jefeda mar okum emah keingg rua rot si.

20Gosnok gegeka jeska rusnok insa koma bera gofoka Himeneus gonu Aleksander. Goga gagot mar ongga oska skoita Allah ojgomuja. Jefeda didif dungkoja goga noba daha goga gu Bilis ojgomu. Didif duntunggom erek koma jeskaseda gij mona ongga Bilis eita ofogog skoita goga, beda goga gemek oida mar ongga gontunggom insa koma bera oska.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel