Alkitab Mobile SABDA
[VER] : [MONGONDOW]     [PL]  [PB] 
 <<  Lukas 22 >> 

1Kon singgai moḷoben Roti Diaí Koragi inta sinangoi Paskah nodiugdon.

2Imang mita itoi bo mototunduí mita kon agama norai mongo naíonda im poḷolimod monia ko'i Yesus, ta'e umuni-uni sim mo'ondok kon intau moaíntoí.

3Onda intua Ibilis ginumonuí ko'i Yudas inta dinonoi ki Iskariot, tobatuí murií i Yesus inta kon sigad naya mopuḷuh bodoyowaí.

4Daí minayak in sia bo noyosingog takin imang mita itoi bo intau mita inta moḷoḷukad kom Baḷoi Tuhan. Sia nongonguman kon soaáḷ naíonda in caranya moporasahkan ko'i Yesus ko'i monia.

5Nopia totok ing gina intau mita tatua, daí dinandi monia kon ogoian monia in doit in sia.

6Ki Yudas no'ibog, daí mulaidon sia bo umuni-uni im motayak kong kasampatan moposarahkan ko'i Yesus ko'i monia.

7Nodapotdon in singgai moḷoben Roti Diaí Koragi, tuata in singgai inta porataan kon domba Paskah.

8Daí ki Yesus nopotabaí ko'i Petrus bo ko'i Yohanes, "Bayakdon bo posadiadon kom pongaanan naton kon singgai moḷoben Paskah."

9Daí taya dua nolibo, "Kon onda ing ko'ibog i Pak Guru bayaían nami posadiaan?"

10Ki Yesus notubag, "Aka mo'ikow tumu'ot kon tobatuí kotaí, yo mo'ikow moyodungkuḷ in tobatuí ḷoḷaki inta nodia kon kendi kobonu-bonu in tubig. Dudui ko'inia modapot im baḷoi inta pongandupannya,

11bo pogumadon ko'i togi baḷoi tatua nana'a: Ki Pak Guru nokiliboí ko'i tuang, 'Kon onda in tampat inta mota'au-Ku ponga'anan takin murií-Ku mita kon singgai im Paskah na'a?'

12Yo tundu'onbií i togi baḷoi tatua ko'i namunda in tobatuí ruangan moḷoben kon limonik. Kon tua aindon notompod im pakakatnya mita, daí sadiadon kon tua."

13Onda intua minayakdon ing ki Petrus bo ki Yohanes. Kino'bayaíanmai monia komintanbií notongkai naí inta aim pinoguman i Yesus. Bo sinadiadon monia kon tua im ponga'anan monia kon singgai im Paskah.

14Naonda in wakutunyadon monga'an, ki Yesus ilimituí noyotakin murií-Nya mita kom meja ponga'anan.

15Bo Sia noguman ko'i monia, "Aku'oi mo'ibog totok moka'an kong ka'anon Paskah tana'a moyotakin monimu wakutu in diaípa mokorasa kon roriga in Aku'oi!

16Sim muna-Kudon poguman ko'i monimu: Aku'oi in diaí bidon moka'an bui kong ka'anon tana'a modapot intua komintan poponyatadon i Allah kon dunia na'a."

17Onda intua binuat-Nya in palo pongonginuman kon anggur bo nosambayang nopoyaput in sukur ko'i Allah. Nopaḷut makow Sia noguman, "Gamaí in na'a bo silai-silaidon makow;

18simbaí kota'auandon monimu: mulaidon tana'a makow, Aku'oi in diaí bidon bui monginum kon anggur tana'a modapot ing ki Allah mamangoidon momarentah saḷaku Raja."

19Onda intua ki Yesus nogamaí kon roti. Bo naonda in sinambayangan-Nya makow, binonsi-bonsing-Nya in roti tatua bo inogoi ko'i monia poḷat noguman, ["Na'adon in awak-Ku inta pinosarahkan ko'i monimu. Aidai doman in na'a, saḷaku tanda kom mo'ikow in umuran monorop ko'i-Nakoí."

20Natua doman, naonda in nopaḷut makow nonga'an, Sia nobogoi im palo pongonginuman kon anggur tatua ko'i monia poḷat noguman, "Pongonginuman tana'a in dodandian i Allah mobagu inta ain sinoliuan in duguí-Ku. Duguí inta aim pinobutak sing kopontingan monimu."]

21"Ta'e indoiai! Intau inta momangkang ko'i-Nakoí na'adon koyota-yotakin-Ku!

22Adií Intau in totu'ubií kom matoi naí inta ain sinantuí i Allah; ta'e moboditodon intau inta momangkang ko'i-Nia."

23Daí mosia mulaidon mosiliboían tobatuí bo tobatuí mongo ki ine ing kon sigad monia tua im momia natua.

24Bo nomukaídon bobayowan kon sigad im murií mita i Yesus. Mosia nobobayowan mongo ki ine in moḷobe-ḷoben kon sigad monia tua.

25Nokodongogmai kon natua, ki Yesus noguman ko'i monia, "Mongonguasa kon dunia na'a inta diaí nonota'au ko'i Allah, mondorot kon rakyatnya, bo intau mita inta mopobayak ing kakuasa'annya mita tatua sinangoian, 'Mogogoḷiung kon rakyat.'

26Ta'e mo'ikow in diaíbií mota'au natua. Mustibií nana'a, intau inta totok moḷoben kon sigad monimu im mustipabií mo'ibog mobalií naí totok mo'intok, bo itoi mustibií mo'ibog mobalií bobantung.

27Ki ine degaí im moḷobe-ḷoben: intau inta ilimituí nonga'an kom meja mongo intau inta nobantung ko'inia? Tantuí intaubií inta ilimituí tatua. Ta'e Aku'oi ing kon sigad monimu na'a in saḷakubií bobantung.

28Kom bonu in roriga inta korasaan-Ku, mo'ikow in umuran kotaki-takin-Ku.

29Naí ki Amaí ain nobogoi ko'i-Nakoí in hak momarentah, daí natua doman Aku'oi mobogoi ko'i in hak tatua ko'i monimu.

30Takin natua mo'ikow mota'au doman mobarasanang takin-Ku ko wakutu in Aku'oi mobalií Raja. Bo mo'ikow in limituí kon limonik im mopuḷuh bodoyowaí in tampat pomomarenta'an sim momarentah kom mopuḷuh bodoyowaí nosuku bangusa Israel."

31"Simon, Simon, indongogai! Ibilis aindon inogoian ing kasampatan monungkuḷ ko'i monimu; naí gandum pinoyotontanií kong kulitnya, sahingga inta mopia pinoyotontaniídon kon inta mora'at.

32Ta'e ikow Simon, aindon sinambayangan-Ku, simbaí motantuí im pirisayamu. Bo aka ikow mobuidon mangoi ko'i-Nakoí, yo mustimubií doman iropotanmu ing gina im bayongan ginaḷummu."

33Ta'e ki Petrus notubag ko'i Yesus, "Tuhan, aku'oi in diaíbií mo'ondok in tumu'ot kom ponjara andeka matoi moyotakin i Tuhan!"

34Daí ki Yesus noguman, "Pirisayadon in singog-Ku Petrus! Diaípa mokukuk im manuk singgai na'a, ikow koyongandon kotoḷu nomayow kon de'emanbií murií-Ku."

35Nopaḷut makow nosingog kon tua, Sia noguman ko'i monia, "Tungkuḷ im pinotabaí-Ku mo'ikow bo diaí-Ku inogoi nodia kon dompet, botutu andeka sapatu, yo degaí noko'imontanmai mo'ikow ing kinodaitan onu bo onu?" "Dia!" tubag monia.

36Daí ki Yesus noguman, "Yo tana'a makow im poguman-Ku, ki ine ing kodompet andeka kobotutu yo mustibií dia; bo ki ine in diaí ko pitow, yo mustibií in sia mopotaḷui in jubahnya sim potaḷui kom pitow.

37Sim pirisayadon in ayat kom Buk Mosuci inta noguman nana'a, 'Sia inanggap naíonda bo intau mora'at,' mustibií mobalií ko'i-Nakoí. Sin onu inta pinais kom Buk Mosuci soaáḷ Aku'oi, koyogot bidon mobalií in tana'a makow."

38Daí murií-Nya mita noguman, "Tuhan, indoiaikah, doyowadon pitow ing kon na'a." Daí kai Yesus doman, "Mobaliídon nion."

39Ki Yesus iḷumuai kong kotaí bo minayak in tampat inta biasamai bayaían-Nya kom buḷud in Zaitun. Murií-Nya mita minayak doman takin-Nya.

40Naonda in no'iyaputdon kon tua, Sia noguman ko'i monia nana'a, "Posambayangdon, simbaí mo'ikow diaí mo'itaḷaí aka koaíngoian in sobaan."

41Onda intua Sia iyumayuk topilik kom murií-Nya mita tatua, degaí topogaraban batu ing koyayuknya, bodongka sinumungkud bo nosambayang.

42Nana'a in sambayang-Nya, "Amaí, aka mota'au, yo poyayukdon ko'i-Nakoí in roriga tana'a inta musti korasaan-Ku. Ta'e de'emanbií podudui in ibog-Ku, poduduibií kon ibog i Amaí tontanií."

43[Tobatuí malaekat namangoi ko'i-Nia bo noginropot kong gina-Nya.

44Tantuídon mo'ondok in Sia, daí umuran bo mosambayang. Uḷat-Nya naíonda bo duguí motait kom butaí.]

45Nopaḷut makow nosambayang, nobuat in Sia bo minayak bui kom murií-Nya mita. Kinobayaan-Nyamai, mosia nosiug makow sim moaíjar totok ing gina monia.

46Bo noliboí in Sia ko'i monia, "Nongonu sim mosiugbií im mo'ikow? Pobangondon bo posambayang simbaí diaí kotugatan sobaan im mo'ikow."

47Koyogotpa ing ki Yesus monongginamai kom murií-Nya mita tatua, namangoidon in intau tokawang, inta dinia i Yudas tobatuí murií i Yesus tua. No'iyaputmai kon tua, ki Yudas baḷuí minayak ko'i Yesus bo nongayok.

48Ta'e ki Yesus noguman ko'inia, "Yudas, degaí ayokmu bidon tana'a im mobalií tanda kom posarahkanmu ko'i Adií Intau?"

49Naonda im murií mita i Yesus noko'ontong kon onu inta nobalií tatua, mosia noliboí, "Tuhan, tokosibatondon nami im pitow mosia na'a!"

50Bo tobatuí intau kon sigad monia tatua nonibat kon tobatuí bobantung i imang moḷoben, sahinggai nopongkoí im bongoḷannya.

51Ta'e ki Yesus noguman, "Dona'aidon!" Bo kinadaian-Nyadon im bongoḷan in intau tatua bo inundaman.

52Onda intua, ki Yesus noguman kon imang mita itoi bo tontara mita inta moḷoḷukad kom Baḷoi Tuhan, takin itoi mita in Yahudi inta namangoi ko'i-Nia sim modomok, kai-Nia, "Degaí kai monimu kamai Aku'oi na'a intaubií mora'at, sin sidiabií mita im pitow bo bobobak im mamangoi modomok ko'i-Nakoí?

53Pomuḷoi in singgai Aku'oi umuran kon yuaí-yuaík monimu kom bonu im Baḷoi Tuhan, ta'e diaíbií domokon monimu. Ta'e na'a in wakutudon monimu sing kinawasadon in Ibilis im mo'ikow."

54Ki Yesus dinomok monia bo dinia pinobayak im baḷoi i imang moḷoben. Ki Petrus dumuduianmai ko'i monia, ta'e nongkon moyayuk.

55Kom palas im baḷoi imang moḷoben tatua, intau mita nonontuḷu bo ilimituí ilimibu kon tuḷu tatua. Ki Petrus minayak doman bo dinumugang ko'i monia.

56Bobantung bobay noko'ontong ko'i Petrus ilimituí kom bingkií in tuḷu tatua bo umuran sinarukiranya. Onda intua bobantung tatua noguman, "Ikow doman inta umuran moyotakinmai i Yesus!"

57Ta'e binayowan i Petrus kainia, "Beresibií diaí nokanalku intau tatua!"

58Diaí no'onggot kon tua, tobatuí doman intau noko'ontong ko'i Petrus bo noguman nana'a, "Ikow doman tobatuí nongkon imonia ma!" Ta'e ki Petrus notubag, "Diaa! de'emanbií aku'oi!"

59Degaí tojammai no'idudui kon tua, tobatuí doman intau nopobaḷuí ko'i Petrus nana'a, "Totu'u ule, intau doman tanion in dumodudui i Yesus, sin sia intau doman ing Galilea!"

60Ta'e ki Petrus notubag doman nana'a, "Diaíbií komangaleanku im makusud in singogmu tanion!" Bo kon dodaipa doman tatua kowakutu ing ki Petrus nosingog kon tua, dinongogmai manuk nokukukdon.

61Ki Yesus baḷuí bo nobobui ko'i Petrus daí baḷuí bo doman kinotoropannya onu inta aim pinoguman i Yesus ko'inia nana'a, "Ko wakutu in diaípa mokukuk im manuk singgai na'a, ikow aindon koyongan kotoḷu momayow kon ikow in de'emanbií murií-Ku."

62Bo iḷumuaidon ki Petrus nongkon tua bo nongombal mopo'ina-inak.

63Intau mita inta noḷukad ko'i Yesus mopoyambaí ko'i-Nia bo polat momongkung.

64Inolingoian monia in daing mata-Nya bo pinoliboían nana'a, "Pogumankah mongo ki ine in nomongkug ko'i-Nimu?"

65Bo noyagi-yagipa doman in siningog monia inta poningkule ko'i-Nia.

66Bo naonda in doḷom-doḷomdon, nosipundon guhanga mita in lipu intau Yahudi, imang mita itoi bo mototunduí mita kon agama, bo nodia ko'i Yesus pinotayow kon sidang agama.

67Mosia noguman ko'i-Nia nana'a, "Pogumankah ko'inami mongo Ikow inta Raja Mopoposaḷamat?" Daí ki Yesus notubag, "Umpakahbií poguman-Ku ko'inimu, ta'e mo'ikow in umuranbií doman diaí mopirisaya.

68Bo umpakahbií oyuíon in libo'on-Ku ko'inimu, yo doiíbií doman mo'ikow motubag.

69Ta'e baí poguman-Kudon ko'i monimu, kon tana'a makow, ki Adií Intau in limituí bidon kon dotaí ing koḷanan i Allah Inta Mokawasa."

70Daí mosia komintan noliboí nana'a, "Aka natua yo, Ikow na'a ing ki Adií i Allah?" Ki Yesus notubag, "Mo'ikow bidon tontanií in noguman kon Aku'oi na'a ki Adií i Allah."

71Daí nosingog im mosia komintan, "Diaí bidon paraḷu ing kita motayak kon saksi ibanea, sin dinongogdon naton tontanií onu im pinoguman-Nya!"


  Share Facebook  |  Share Twitter

 <<  Lukas 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran