Dual Panel1Ya'ami ira talifusõ banua Niha Keriso ba Desalonika, si no tobali banua Lowalangi Ama ba So'aya ya'ita Yesu Keriso: Ya'aga, ya'ia da'õ Faulo, Sila ba Timoteo manõtõna ndra'aga wa Lowalangi zangahakhõsi tõdõ ya'ami ba same'e khõmi fa'ohahau dõdõ.
2Lõ mamalõmalõ ma'andrõ saohagõlõ khõ Lowalangi bõrõ ami fefu. Itõrõ lima ami na mangandrõ ndra'aga.
3Ba ginõtõ na mangandrõ ndra'aga khõ Lowalangi Amada, lõ mamalõmalõ itõrõ tõdõma ami. Ba no mamati sibai ami khõ Keriso, irege famati andrõ oroma ba mbuabuami. Omasi sibai ami niha bõ'õ, irege mõi ami enonira. Ba aro sibai wanõtõnami khõ Zo'aya ya'ita Yesu Keriso.
4Aboto ba dõdõma, ya'ami ira talifusõ, wa no I'omasi'õ ami Lowalangi, ba no Ifili ami tobali tana khõ-Nia ni'amoni'õ.
5Me inõtõ ma'ombakha'õ Duria Somuso Dõdõ andrõ ba khõmi, ba tenga ha ba wehede manõ, no fao gõi wa'abõlõ Geheha Lowalangi. Ba faduhu sibai dõdõma wa'aduhu Duria Somuso Dõdõ andrõ. Aboto ba dõdõmi hewisa ndra'aga ba khõmi, me luo so ndra'aga ba gotaluami.
6No tobali si mane ya'aga ami, ba si mane So'aya Yesu gõi. Hew̃a'ae abõlõ wamakaomi, ba mitema sa'atõ Duria nifa'emama khõmi andrõ; mitema si fao fa'omuso dõdõ. Ba fa'omuso dõdõ andrõ no nibe'e Geheha Lowalangi.
7Andrõ no tobali famaedo ami ba Niha Keriso fefu si so ba Makedonia ba Makhaya.
8Moroi ba khõmi ibõrõgõ terongo Duria Zo'aya andrõ si no teboloso irugi Makedonia ba Nakhaya. Ba tenga ha da'õ; no gõi teturia wamatimi andrõ khõ Lowalangi ba mbanua bõ'õ, irege lõ moguna sa'ae itõrõ lima.
9Fefu ira ba ladunõdunõ hewisa wanemami ya'aga me luo mõi ndra'aga ba khõmi. Oi ladunõdunõ hewisa wondrõimi adu andrõ ba fangondrasimi Lowalangi sauri ba sindruhu, ba wanuno awõ wangandrõ khõ-Nia.
10Ladunõdunõ gõi hewisa ami ba wodõnadõna fa'atohare Nono Lowalangi andrõ moroi ba zorugo, ya'ia Yesu, si no Isusugi Lowalangi moroi ba ngai zi mate. Ba Yesu gõi zangefa'õ ya'ita ba wõnu Lowalangi.