Alkitab Mobile SABDA
[VER] : [NIAS]     [PL]  [PB] 
 <<  1 Timotius 6 >> 

1Niha Keriso si no tobali sawuyu, lõ tola lõ lafosumange zokhõ ya'ira, ena'õ lõ tola law̃a'õ si lõ sõkhi Lowalangi ba ma famahaõda niha.

2Sawuyu si so sokhõ Niha Keriso, tebai i'aohasi zokhõ ya'ia andrõ me faoma Niha Keriso ira. Abõlõ sõkhi na'i na ladou'õ wa'asõkhi wanga'ira halõw̃õra khõ zokhõ ya'ira andrõ, me no faoma samati ba ni'omasi'õ ira, he sawuyu ba he sokhõ. Fefu da'õ lõ tola lõ õfahaõ ba õ'amenesi ba niha.

3Na so zamahaõ tanõ bõ'õ moroi ba da'õ, ba si lõ fao tõdõ ba wamahaõ sindruhu soroi Zo'aya ya'ita Yesu Keriso, ba si lõ fao tõdõ gõi ba wamahaõ agamada,

4no niha si fayaw̃a da'õ si lõ mangila balõ! Fõkhõ niha si manõ, omasi fada'aw̃a ba fa'udu ba zanandrõsa ba ngawuangawua wehede nifo'eluaha, irege ifatumbu'õ wa'afõkhõ dõdõ, fa'aboto dõdõ, fasosota, ba fanahõ tõdõ si lõ sõkhi,

5ba fa'udusa si lõ aetu. No teduhõ lala wangerangera niha si manõ, ba no lõ duhu sa'ae. Law̃a'õ tõdõra tola lasõndra wa'akayo ba agama.

6Ba sindruhunia sa, ibe'e hare sebua agama andrõ, na ahono dõdõ niha ba zi no so khõnia.

7Bõrõ me sambua lõ hadia ia ni'oheda ba gulidanõ andre, ba sambua gõi lõ hadia ia si tola ta'ohe na tarõi gulidanõ andre!

8Tobali, na so mbalazo awõ nukha, no abõnõ da'õ.

9Niha somasi mokhõ, si gõna fanandraigõ ba tandraw̃a soya ngawalõ ia, si lõ hadõi gunania ba samakiko. I'ohe niha ba wa'atekiko ba ba wa'ate'ala fangisõ andrõ.

10Bõrõ moroi ba wa'omasi gefe andrõ, tumbu ngawalõ zi lõ sõkhi. So õsa niha solohi kefe, irege lõ sa'ae la'o'õ wamahaõ Keriso, ba hiza gõna ira ngawalõ wamakao si tobali fangabu dõdõ.

11Ba ya'ugõ, no okhõta Lowalangi, andrõ lõ tola lõ õ'arõu'õ ndra'ugõ ba da'õ ma'afefu. Odõdõgõ we'amõi niha satulõ ba hõrõ Lowalangi, ba solulu fa'auri khõ Lowalangi awõ ba wamati khõ Keriso, ba sangomasi'õ awõ, sebolo tõdõ ba wanandraigõ, ba sohauhau.

12Lau fasõndra sindruhundruhu ba nifatiu andrõ, ena'õ õsõndra mbuala wa'auri sindruhu andrõ ba si lõ aetu. Ba da'õ Ikaoni ndra'ugõ Lowalangi, me luo õfaduhu'õ fõna niha sato, wa mamati ndra'ugõ khõ Keriso.

13Iada'e fõna Lowalangi same'e noso ba ngawalõ zauri fefu, ba fõna Yesu Keriso same'e famaduhu'õ sindruhu fõna Wondrio Filato, da'e ni'andrõgu khõu:

14Rorogõ fefu wareta andrõ si fao fa'adõlõ ba fa lõ sinegu, irugi ba ginõtõ wangawuli Zo'aya ya'ita Yesu Keriso ba gulidanõ andre.

15Fe'aso-Nia andrõ Ihonogõi dania Lowalangi ba ginõtõ si faudu sibai. Ha Ya'ia Zamatõrõ, Ya'ia zolakhõmi, Razo yaw̃a razo ba So'aya fefu zokhõ.

16Ha Ya'ia zi tebai ifatõrõ fa'amate; ba haga so Ia, si lõ tola ifahatõ ia gofu haniha. Samõsa lõ sirai mangila Ya'ia, ba ma si tola mangila Ya'ia. Khõ-Nia zumange ba famatõrõ irugi zi lõ aetu! Yaduhu.

17Ba niha si kayo ba gulidanõ andre, ya õ'amenesi ira ena'õ bõi fayaw̃a ba bõi manõtõna ba gana'a si lõ mo'arota -- si mane fa'akayo andrõ. Lõ tola lõ ya manõtõna ira khõ Lowalangi same'e fefu hadia ia khõda irege fahõna, ena'õ ohahau dõdõda.

18Amenesi ira ba wangoroma'õ si sõkhi, ba ba wamalua ngawalõ zi sõkhi, fa'ahakhõ dõdõ ba fa'omasi mamuala.

19Da'õ lala khõra wangowuloi harato si tobali foko si sõkhi ba ginõtõ si so fõnara. Ba ba da'õ lasõndra dania wa'auri sindruhu andrõ.

20He Timoteo! Hadia zi no mufaduhusi tõdõ khõu, ba haogõ wondrorogõ. Arõu'õ huhuo si lõ boto ba fabu'asa ba ngawalõ nifotõira "Fa'atuatua".

21So sa niha sanguma'õ wa no la'okhõgõ wa'atuatua da'õ, irege fahole moroi ba wamahaõ Niha Keriso, si faduhu dõdõra fõna. Ya Ifahowu'õ ami So'aya.


  Share Facebook  |  Share Twitter

Download Audio MP3 (1 Timotius 6):
Mobile (Low Quality) - CD (High Quality)

 <<  1 Timotius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran