Dual Panel1Mibologõ dõdõmi khõgu, akha hulõ zambõ tõdõ ndra'o ma'ifu.
2No akharikhari sibai dõdõgu khõmi, si mane fa'akharikhari dõdõ Lowalangi ndra'odo. Hulõ nono alawe si lõ sangowalu ami, si no ufabu'u wa ufangowalu ba khõ nono matua, ya'ia Keriso.
3Ba mangiwa dõdõgu na elungu wangerangerami, ba wa'afarõi khõ Keriso, hulõ si mane Khawa mefõna gõi nifaelungu ba wa'onekhe gulõ.
4Bõrõ me oroma wa omasi manõ ami mitema niha si mõi khõmi, samahaõ Yesu bõ'õ -- tenga Yesu ni'ombakha'õma khõmi. Ba omasi manõ gõi ami mitema geheha ba "turia somuso dõdõ" si faehu sibai moroi ba Geheha Lowalangi ba ba Duria Somuso Dõdõ si no irai mitema moroi khõma.
5Ba dõdõgu sa, ba ma'ifu lõ ide'ide ndra'o moroi ba "zinenge" tanõ bõ'õ andrõ sebua!
6Ba he no ambõ onekhenekhe ndra'o fahuhuo, ba hiza, sanandrõsa ba wa'aboto ba dõdõ Lowalangi, ba tenga niha sambõ tõdõ ndra'o. No ma'oroma'õ khõmi da'õ ba ngawalõ hadia ia.
7Me luo u'ombakha'õ Duria Somuso Dõdõ andrõ soroi Lowalangi khõmi, ma'ifu lõ ni'andrõgu khõmi wobalazoi ya'o; ba bõrõ zi manõ no u'ide'ide'õ ndra'o khõmi. Ufalua zi manõ ba wangalaw̃a'õ ya'ami. Hadia tobali horõgu da'õ khõmi?
8Me luo mohalõw̃õ ndra'o khõmi, labe'e zoguna khõgu banua Niha Keriso bõ'õ. Tola taw̃a'õ no ubusi dõdõ mbanua Niha Keriso bõ'õ andrõ, ba wanolo ya'ami.
9Na mo'ambõta ndra'o me luo da'õ, samõsa lõ nibusigu tõdõ ba khõmi. Fefu ngawalõ ni'oguna'õgu no labõnõkhi ira talifusõ soroi Makedonia. No u'angenanõi sibai, ena'õ lõ ubusi dõdõmi ba ngawalõ hadia ia, ba omasido utohugõ zi manõ ena'õ lõ ubusi dõdõmi dania.
10Fanunogu ya'odo andre tebai mutayaigõ gofu heza ba mbanua Nakhaya misa, bõrõ me so khõgu wamahaõ Keriso sindruhu andrõ.
11Hana wa uw̃a'õ zi manõ? Hadia bõrõ me lõ omasido ami? I'ila Lowalangi u'omasi'õ ami!
12Hadia nilaugu iada'e, ba utohugõ, ena'õ "sinenge" bõ'õ andre lõ danedanera ba wa nunonuno ya'ira, ba law̃a'õ wa mohalõw̃õ ira si mane ya'aga.
13Niha si mane da'õ, ba no sinenge sofaya. Sohalõw̃õ si falimo ira, sanagõ fa'atõi zinenge Keriso.
14Ba lõ sa ahõlihõli dõdõda me lalau zi manõ, bõrõ me Afõkha samõsa gõi, ifaedogõ ia ba mala'ika haga!
15Andrõ lõ tobali sibai dõdõda, na ifaedogõ ia enoni Gafõkha khõ ndra enoni samalua somasi Lowalangi. Ba gamozuania latema zulõ si faudu ba ngawalõ nilaura.
16Samuza tõ uw̃a'õ: Bõi so niha sanguma'õ sambõ tõdõ ndra'odo. Ba na miw̃a'õ nasa tõdõmi sambõ tõdõ ndra'odo, ba mitehegõ atõ khõgu, ya'odo sambõ tõdõ andre, da usunodo gõi ma'ifu.
17Ba da uw̃a'õ zi tobali fanunogu ya'o, ba hiza tenga sa So'aya zango'ou ya'o ba wanguma'õ ya'ia. Ba zanandrõsa ba da'e, fahuhuo ndra'odo si mane sibai niha sambõ tõdõ.
18Duhu ato niha sanunonuno ngawalõ wa'a'ulidanõ, ba omasido gõi usunodo ma'ifu.
19Ba mibologõ dõdõmi ba niha sambõ tõdõ andre, bõrõ me ya'ami oi niha sagatuatua!
20No milulu manõ i'osawuyu ami niha, ma i'a gõlõmi ba ihalõ harenia khõmi, ba fayaw̃a ira khõmi, ba barani lafalisi mbawami!
21Aila ndra'odo wamaduhu'õ, wa ya'aga andre no ambõ fa'abõlõ ba wamalua si manõ. Ba hadia zi barani lasuno niha bõ'õ ba barani gõi ndra'o usuno! (Fahuhuo ndra'o hulõ niha sambõ tõdõ.)
22Niha Heberai'o ira? Ya'odo gõi niha Heberai'o. Niha Gizera'eli ira? Ya'odo gõi niha Gizera'eli. Nga'õtõ Gaberahamo ira? Ya'odo gõi si manõ!
23Enoni Keriso ira? Ba wamondrongomi hulõ zi no taya fangerangera ndra'odo, ba sindruhunia no enoni sabõlõ sõkhi ndra'o moroi ba danõ bõ'õ fefu! No abõlõ wa'erege dõdõgu wohalõw̃õ, no asese lakurudo, no oya kali labõbõzi ndra'o ba asese arakhagõ mate.
24No melima kali labõbõzi ndra'o niha Yahudi faoma bõzibõzi ue tõlu ngafulu a siw̃a kali.
25Tõlu kali labõzi ndra'o niha Roma; no irai latebu kara ndra'odo. No medõlu falukhado wa'ahõndrõ nowo ba nasi, ba sara luo ba sara mbongi alõmõ ndra'o ba nasi.
26No oya kali falukha ndra'o gameta'uõ ba wofanõfanõgu: ameta'uõ molõ, ameta'uõ sorabu, ameta'uõ moroi ba niha Yahudi, ba he gõi moroi ba zi tenga niha Yahudi, ameta'uõ bakha ba mbanua, ameta'uõ baero mbanua, ameta'uõ ba nasi, ba ameta'uõ moroi ba dalifusõ sofaya, sangotõi ya'ia Niha Keriso, ba tenga sa.
27No u'õsiagõ wa'abõlõgu ba wohalõw̃õ ba ba wa'erege dõdõ: asese lõ mõrõ, lõ si manga, lõ samadu idanõ, asese falukha wa'olofo, fa'o'afu bõrõ wa lõ nukha, ba fa lõ nahia omo.
28Baero da'õ fefu, ero ma'õkhõ u'abusi tõdõ mbanua Niha Keriso misa fefu.
29Na so zi no amomo, ba urasoi gõi wa'amomo. Ba na so zaekhu ba horõ, ba arasa bakha dõdõgu.
30Ba hiza, na lõ tola lõ usuno hadia ia, ba nisunogu ya'ia ngawalõ zangoroma'õ wa ambõ fa'abõlõgu.
31Lõ falimo ndra'odo; Lowalangi, Ama Zo'aya Yesu, Ya'ia zamaduhu'õ da'õ! Nisunosuno dõi-Nia irugi zi lõ aetu.
32Me luo so ndra'o ba Ndramaseko, ba mbanua da'õ, gubernur samatõrõ si so barõ mbawa gamatõrõw̃a Razo Areta, ifatenge zaradadu ba wanaro bawa ndruhõ mbanua, ba wondra'u ya'o.
33Ba ladada ndra'o niha mitou ba ragaraga baero gõli kara. Irege aefa ndra'o ba danga gubernur andrõ.