Alkitab Mobile SABDA
[VER] : [NIAS]     [PL]  [PB] 
 <<  Galatia 5 >> 

1Tenga sawuyu ita iada'e, bõrõ me no I'efa'õ ita Keriso! Andrõ bõi mitehe ni'osawuyu ami, mi'a'aro'õ ami ba wangefa andrõ si no mi'okhõgõ.

2Mitõngõni, na mifaboto'õ ami, ba lõ eluahania Keriso ba khõmi. Ya'odo samõsa, Faulo, zanguma'õ da'e.

3Samuza tõ ufangelama niha somasi niboto, wa ya'ia andrõ lõ tola lõ i'o'õ huku agama ma'afefu!

4Na ba wolo'õ huku agama mi'alui wa'atulõ khõ Lowalangi, ba no mifabali ami khõ Keriso. Bõrõ zi manõ, tenga barõ wa'ahakhõ dõdõ Lowalangi so ami.

5Na ya'aga, ba madõnadõna wa bõrõ wa'awõsa Geheha Lowalangi ba famati khõ Keriso, wa tola atulõ ndra'aga khõ Lowalangi.

6Bõrõ, na khõ Keriso Yesu so ita, ba tenga sa'ae amatunõw̃a sanandrõsa ba wamoto ba fa lõ muboto. Ha famati khõ Yesu Keriso zabõlõ moguna, ba oroma da'õ ba wa'omasida niha bõ'õ.

7No si sõkhi wolo'õmi fõna! Iada'e, hana wa lõ mi'o'õ zomasi Lowalangi? Haniha zi no mondrõnisi ya'ami?

8Samalua da'õ tenga Lowalangi si no mogaoni ya'ami!

9"Ha ma'ifu danõmõ roti (ragi) ba ahori i'aisõni gombõila roti ma'afefu," law̃a'õ niha.

10Hew̃a'ae si manõ ba faduhu dõdõgu nasa khõmi wa lõ tõdõmi bõ'õ baero zi mane tõdõgu andre, bõrõ me no ha sambua ita khõ Keriso. Ba faduhu dõdõgu gõi gofu haniha zamakuyu era'erami, lõ tola lõ Ihuku ia Lowalangi dania.

11Ba ya'odo andre, ya'ami ira talifusõ, hana wa lõ mamalõ la'uduni ndra'o na u'ombakha'õ wa moguna wamoto andrõ? Na duhu u'ombakha'õ zi manõ, ba fanuriaigõgu rõfa Keriso lõ tobali amatunõw̃a.

12Abõlõ sõkhi niha samawukaisi tõdõmi andrõ laheta ira ndrotondroto Niha Keriso!

13No tekaoni ami, ena'õ tobali ami niha si tenga sawuyu. Ba bõi mi'oguna'õ wangefa andrõ ba wolulu botomi nifatõrõ wa'omasi wangisõ. Ba zi tambai da'õ, ya faoma mitolo nawõmi si fao fa'omasi.

14Me huku agama ma'afefu no te'osambua'õ ba zi sambua li andre, "Omasi'õ nawõu si mane fa'omasiu ndra'ugõ."

15Ba na faoma fasawi ami khõ nawõmi, ba mitõngõni, wa si faoma tekiko ami dania.

16Si so ba dõdõgu si mane: Mitehegõ nifatõrõ Geheha Lowalangi ami, ba bõi mi'o'õ wa'omasimi wangisõ andrõ.

17Me fa'udu wangisõ andrõ ba wa'edõna Geheha Lowalangi, ba si manõ gõi wa'edõna Geheha Lowalangi andrõ fa'udu ba wa'edõna niha. Faoma sa fa'udu zi dombua andrõ, irege tebai milau hadia zomasi ami andrõ.

18Ba na Eheha Lowalangi zondrõnia'õ ya'ami, ba tenga barõ mbawa huku agama so ami.

19Ba oroma ba ngawalõ nifalua wa'edõna niha andrõ, ya'ia wohorõ, fa'ara'ira'iõ, fohokha,

20famosumange adu ba fakelemusa; fatiusa, fasosota, fa'olohu, alio mofõnu, fa'udusa, ba faya'osa; lõ fa ha sara dõdõ ba mangoningonia,

21fa'afõkhõ dõdõ, femabumabu, femangamanga, ba hadia na ngawalõ danõ bõ'õ. Ba zanandrõsa ba da'õ fefu, ba ufangelama ami iada'e si mane famangelamagu ami fõna gõi, wa niha solau si manõ, lõ tola tobali banua Lowalangi.

22Ba zi tambai da'õ, na Eheha Lowalangi zamatõrõ, ba buania ya'ia wa'omasi, ba fa'omuso dõdõ, ba fa'ohauhau, ba fa'ebolo dõdõ, ba fa'asõkhi dõdõ, ba fa'ebua dõdõ, ba fa lõ farõi,

23ba so wangidengide'õ ba famoni. Lõ hadõi huku agama sanenaw̃a si manõ.

24Niha si no tobali tana khõ Keriso, ba no ibunu mbuambua nõsi andrõ awõ ngawalõ wangisõ.

25No Ibe'e khõda wa'auri si bohou Eheha Lowalangi; bõrõ da'õ Ya'ia zi lõ tola lõ mamatõrõ fa'aurida.

26Bõi fayaw̃a ita, bõi ta'arõ'arõ nawõda, ba bõi afõkhõ dõdõda khõ nawõda.


  Share Facebook  |  Share Twitter

Download Audio MP3 (Galatia 5):
Mobile (Low Quality) - CD (High Quality)

 <<  Galatia 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel