Alkitab Mobile SABDA
[VER] : [NIAS]     [PL]  [PB] 
 <<  Ibrani 8 >> 

1Tuho moroi ba gamatunõw̃a andre fefu, ya'ia: wa no so khõda Gere Sebua si mane da'õ, si no dumadao ba gambõlõ dadaoma wa'asalaw̃a Lowalangi Fondrege Zebua ba zorugo.

2Ihalõ halõw̃õ si mane Ere Sebua ba Naha Fondrege Ni'amoni'õ, ya'ia ba Nose Zo'aya si lõ tebulõ nifasindro Zo'aya, ba tenga niha.

3Ero samõsa gere sebua tefataro ba wame'e ame'ela ba ma sumange khõ Lowalangi. Si manõ gõi Gere Sebua khõda; lõ tola lõ so khõ-Nia hadia ia nibe'e sumange.

4Na ba gulidanõ andre so Ia, tebai tobali Ia ere, bõrõ me no so gere same'e sumange molo'õ ba huku agama Yahudi.

5Halõw̃õ nifaluara ba wa'a'ere andrõ, sindruhunia ha famaedo ba lumõlumõ zi so ba zorugo. No I'ombakha'õ da'õ Lowalangi khõ Moze fõna, me ifasindro Moze Nose Zo'aya andrõ. Si mane niw̃a'õ Lowalangi khõ Moze, "Tõngõni! Fefu da'õ lõ tola lõ õfazõkhi molo'õ famaedo ni'oroma'õ khõu ba hili."

6Iada'e no Isõndra Yesu halõw̃õ wa'a'ere, sarõu abõlõ molakhõmi moroi ba halõw̃õ ni'ohalõw̃õgõi ndra ere. Bõrõ me fawu'usa li si no mu'a'asogõ ba gotaluara Lowalangi niha nifa'ema Yesu, no fawu'usa li sabõlõ sõkhi, me modanedane fawu'usa li ba ngawalõ zabõlõ sõkhi.

7Na lõ hadõi so'ambõta ba gamabu'ula li si fõfõna andrõ, no lõ moguna te'a'asogõ gamabu'ula li si mendrua.

8Ba no Isõndra Lowalangi golalõw̃a ba mbanua-Nia, irege Iw̃a'õ Lowalangi, "Tõngõni, so dania ginõtõnia, U'a'asogõ wawu'usa li si bohou ba soi Gizera'eli, awõ ba mado Yehuda.

9Fawu'usa li da'õ lõ faoma ira wawu'usa li si no Ufazõkhi khõ ndra amara ba ginõtõ Udõnia'õ ira wa'aheta moroi ba danõ Miserai. Farõi ira ba wawu'usa li si no Ufazõkhi khõra. Da'õ mbõrõ wa lõ ba dõdõ-Gu ira.

10Iada'e, ya'e wawu'usa li nifalua-Gu ba mbanua Gizera'eli ba ngaluo si so mifõna, Imane So'aya: Utanõgõ dania goroisa-Gu bakha ba gera'erara, ba usura bakha ba dõdõra, Lowalangira dania Ndra'o ba banua-Gu gõi ira.

11Lõ moguna sa'ae lafahaõ nawõra ono mbanua ma sangombakha khõ dalifusõnia, 'Ya'aboto ba dõdõu.' Bõrõ me fefu ira, i'otarai wondrege zide'ide irugi ba wondrege zebua, no aboto ba dõdõra Ndra'o.

12U'efa'õ dania zalara, ba lõ Utanõ ba dõdõ-Gu horõra."

13Ba me no mufa'ema gamabu'ula li si bohou andrõ, no Ibali'õ gamabu'ula li si fõfõna andrõ Lowalangi tobali atua ba lõ mufake sa'ae, ba gofu hadia zi no atua ba alio taya.


  Share Facebook  |  Share Twitter

Download Audio MP3 (Ibrani 8):
Mobile (Low Quality) - CD (High Quality)

 <<  Ibrani 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel