Alkitab Mobile SABDA
[VER] : [SANGIR]     [PL]  [PB] 
 <<  1 Petrus 1 >> 

1Manga anạ u sěmbaụ umatẹ̌ pinilen Mawu Ruata, kụ nasawuhẹ̌ surarạganeng su wanuan Pontus, Galatia, Kapadokia, Asia ringangu Bitinia! Iạ e i Petrus, darolohang'i Yesus Kristus, měkẹ̌kahumangu mal᷊owọko Mawu Ruata e měngonggọu al᷊amatẹ̌ dingangu karal᷊unsemahẹ̌ mẹ̌dẹ̌dal᷊embo si kamene. I kamene e seng nipile nariadi ral᷊ohon jamạat'u Mawu natuhụ suhingidu Ruata i Amang. Dingangu Rohkẹ̌ u Ruata e napakariading kamene jamaatẹ̌ susi, nihae waugu Ruata, tadeạu i kamene tumuhụ si Yesus Kristus ringangu iapakasusin dahan'E.

2(1:1)

3Mahịe i kitẹ mẹ̌dalo Ruata, i Amangu Mawung kitẹ i Yesus Kristus! I Sie měngkai kụkěndagi kitẹ hakịu ene i Sie něngonggọ si kitẹ pẹ̌bawiahẹ̌ buhu, dingangu napẹ̌bangung i Yesus Kristus kapia wọu kapapohonge. Kai ini e nakatoghasẹ̌ pělaharapi kitẹ.

4I kitẹ mělẹ̌harapẹ̌ mědeạu makapěmusakạ kal᷊awọu al᷊amatẹ̌ kụ seng niriahin Duata waugu umat'E, mangal᷊ene kal᷊awọu al᷊amatẹ̌ mạdaresọ su sorga, hakịu tawe mal᷊ahenẹ, arau tamawawuhụ dingangu tạ turạ e.

5Kěbị ene kai waụgi kamene, ual᷊ingu pangangimang i kamene su Mawu Ruata e. Tangu i kamene kai rẹ̌diagatengu kawasan Duata e, tadeạu i kamene makatarimạbe kasasal᷊amatẹ̌ seng mạdariahi sarung iapakal᷊ahẹ su ěllo pangěnsueěnge.

6Ual᷊ingu ene ute, pakaral᷊uasẹ̌ko i kamene, maningbe orasẹ̌ ini e kạdodọ tempo e reng rụl᷊ahunsusa e watụ u i kamene kawe makạhombang haghin sasal᷊ukạ e.

7Timonane ute kai pělahekangu měnsangbe kahěnga-hěngang i kamene e mạngimang su Mawu arau tala. Bul᷊aeng kụ mahenẹ̌ e mal᷊aing wẹ̌banikatengu putung. Kerene pangangimang i kitẹ e kai něngalembong kaarěgane wọu wul᷊aeng, kụ mal᷊aing harusẹ̌ banikateng tadeạu matoghasẹ̌. Kụ ual᷊ingu ene i kamene e sarung daloěng dingangu lẹ̌lahunggeětang dingangu iapakarangẹ su tempọen darěntan Yesus kapia.

8I kamene e kụkěndag'i Sie, maniweng nạung kal᷊amona e i kamene e tawe nakasilo. Dingangu i kamene mạngimang si Sie maningbe orasẹ̌ ini e i kamene tawe nakasilo. Kai ene hakịu i kamene e mạhul᷊uasẹ̌, dingangu makạpěndang dal᷊iagẹ̌ masaria ta ikawera.

9Batụu timonam pangangimang i kamene e seng kinaratingang, kụ kai kasasal᷊amat'u himukudi kamene e.

10Kasasal᷊amatẹ̌ ini e kai tẹ̌titikang dingangu sẹ̌sẹ̌suiangu manga nabi e, ringangu i sire e mạněbal᷊u tatal᷊ěntụ u Ruata e sarung mawuạ si kamene e.

11I sire e mẹ̌naněsui měnsang kereapa wue ringangu angerẹ tempone hal᷊ẹ̌ ene mariadi, kere ipẹ̌sẹ̌sasěbạu Rohkẹ̌ i Kristus kụ seng ene su ral᷊ungu naungu watangeng i sire. Su tempo ene Rohkẹ̌ e nanẹ̌bal᷊u haghin sigěsạ kụ kahombangeng i Kristus ringangu mạanung kawawantuge kụ makarol᷊osẹ̌ e sarung si sire.

12Su manga nabi ene Mawu Ruata e něhabarẹ̌ u apang kinoạ i sire wal᷊inewe waugu pandungang i sire, kaiso kawe waugi kamene. Kụ kěbịewe apang kinaringih'i kamene mal᷊ahẹ bọu mělahabaru Injil'i Yesus Kristus. I sire mělẹ̌habaru ene si kamene ute kai ringangu kawasan Rohkẹ̌ u Ruata niroloh'E wọu sorga. Orelai manga malạekatẹ̌ e mal᷊aing mapulu makakasingkạu habarẹ̌ ikẹ̌keken sire ene.

13Ual᷊ingu ene, pakarariagạko i kamene. Pakaral᷊ěndị dingangu pěmpěharapẹ̌be pakatinalung su tatal᷊ěntụ sarung mawuạ si kamene su tempon i Yesus sarung duměnta.

14Pakatuhụko su Mawu Ruata, kụ kumbahang měngkai tụtuhụ kapulun biahu nạung kal᷊imona těntal᷊angbe wẹ̌gan Mawu Ruata.

15Su sěmběkane, kaiso pakasusiko su patikụ apang koatengu, kerẹewe lai Mawu Ruata e nẹ̌kui si kamene e kai susi.

16Su ral᷊ungu Winohẹ Susi kạbawohẹ u, "Pakasusiko i kamene, u Iạ e kai susi."

17I kamene mẹ̌sěbạ Duata e kai i Amang su tempong kamene mẹ̌kal᷊iomaneng si Sie. Kụ Duata ene kai něhukungu taumata tuhụewe kakanoạ u sěmbaụ-sěmbaụ tawe měmamile ghahị. Ual᷊ingu ene ute karěngụewen bẹ̌dang ene su dunia ini e, ute i kamene pěmpěmantugẹ̌ko Mawu Ruata e su ral᷊ungu pẹ̌bawiahu.

18I kamene e masingkạ u apa seng piněmaehẹ̌ baugu karal᷊iwir'i kamene wọu pẹ̌bawiahẹ̌ tạ kahumpakenge seng niẹ̌king'i upung gaghurang i kamene. Bawaehe wal᷊inewe apang mahenẹ, kere sal᷊aka arau wul᷊aeng,

19kaiso kawe sěmbaụ arětạ kaarěgaěnge; kụ kai watangeng'i Kristus sẹ̌sane nakoạ kere rumba nisarakang su Mawu Ruata e tawẹ sěngkul᷊e ringangu tawẹ turạe.

20I Kristus nipilen Duata e reng dongkeng dunia tawẹ nạdiadi. Kụ su tempo kakạdanineng manga ěllo pěhěpusangu dunia ini e, i Sie ruměnta su dunia e tadeạu i kamene maambang.

21Kai wọu anun Sie e i kamene harusẹ̌ mangimang su Mawu kụ seng napẹ̌bangung i Sie kapia wọu kapapohonge ringangu mapạkawantugẹ̌. Kụ kai Ruata e pạngimangeng i kamene ringangu kai su Mawu Ruata e lai pěmanggilangu pělaharap'i kamene.

22Ual᷊ingu i kamene kawe masatia su těntiron Mawu Ruata ute i kamene hinong mẹ̌těngkawurẹ̌sing batangeng dingangu i kamene hinong kuměndagu l᷊awọ taumata mạngimang dingangu karal᷊uasẹ̌. Ual᷊ingu ene tangu i kamene e pẹ̌kakakěndagẹ̌ko sěmbaụ dingangu wal᷊ine e ringangu kasěllahu naungu.

23Batụu limiung hengetang'u Mawu Ruata kụ biahẹ̌ dingangu kakalẹ̌ e, i kamene sen nikoạ taumata wuhu kụ bal᷊inewe piněhanạ u taumata, kaiso kawe wọu i Amang kakalẹ̌ e.

24Su ral᷊ungu Winohẹ Susi mạbawohẹ kere ini, "Patikụ taumata e tabidạu rěmpugẹ̌, dingangu kěbị kawantugẹ̌ e tabidạu wurạu rěmpugẹ̌. Děmpugẹ̌ e mạlolang, dingangu wurạe lai mạhondosẹ̌;

25arawe hengetangu Mawu e mang tatapẹ̌ sarang marěngụ-děngụ." Hengetange kai Injilẹ̌ kụ seng nihabarẹ̌ si kamene.


  Share Facebook  |  Share Twitter

 <<  1 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran