Dual Panel1Tahěndungko ini: Su mangạ e ěllo pangěnsueěnge ute kai sarung makahombang kasasusa l᷊awọ.
2Taumata e sarung kětạeng mẹ̌nẹ̌nuntụ pandungangu watangenge hala, mapulu měngkakalạ, měngkạobotẹ̌ dingangu papuluang měnalangu mohong. I sire puluang měhinakang taumata, dumokạ maghurang, bẹ̌gaweng makitarimakasẹ, dingangu mẹ̌bẹ̌binsị u munaram mararohkẹ̌.
3I sire e wẹ̌gaweng pẹ̌kakakěndagẹ̌ susěndinganeng tawe mapulu mẹ̌gaghaghěllị u ampung, puluang měndal᷊akisẹ̌ arengu wal᷊ine mawawětadẹ̌, mal᷊ahasa, ringangu tawẹ ěnninge su mapia.
4I sire papuluang měhinakang, mal᷊aobotẹ̌ dingangu naunge manimbu. I sire limembom papuluang su kakakoạ u dunia sul᷊ungu tụtuhụ Mawu Ruata.
5Maningbe luhude měngẹ̌ngagama kaiso kawe měmpẹ̌sẹ̌sunial᷊u timonan pěngangạgama e. Pẹ̌těngkagheako wọu anun taumata kerene.
6Piạu wọu tal᷊oaran sire e seng něnggal᷊isị nahunsuẹ̌ su apam bal᷊e, kụ měmpẹ̌mitaugẹ̌ apam manga wawine něngkanawo su rosa kụ wẹ̌bawol᷊engangu haghing ěnning.
7Manga wawine ene měngkate apa masau makịtěntiro, kai mang tawẹ u sěnsul᷊e makakiral᷊a těntiro kahěngang e wọu anun Duata.
8Kerẹewe lai i Yanes dẹ̌duan Yambres rimokạ si Musa e nạung, kerene lai i sire rụdokạ těntiron Duata. Tiněnnan sire e seng něngkagholang dingangu pěngangimang i sire e seng nasiladẹ̌.
9Kaiso i sire tawe makahombang apa-apa, batụu kawawodon sire e sarungbe kasẹ̌suiangu taumata e patikụ, kerẹewe lai seng kinahombangeng i Yanes dẹ̌duan Yambres.
10Kai i kau semben timuhụ těntiroku, kakanoaku e, ringangu timonam biahẹ̌ku e. I kau seng nakasilo hala u kai kereapa iạ kahěnga-hěngangbe mangimang su Mawu Yesus Kristus, ringangu kuměndagu sěndinganeng taumata. I kau e mal᷊aing masingkạ naungku e ringangu kakakědangku e.
11I kau e seng nakasilo si siạ tẹ̌tumbiageng dingangu iạ nasigěsạ. I kau masingkạ kěbị apan nariadi si siạ su Antiokia, su Ikonium, dingangu su Listra; ringangu i kau masingkạ apang kěbị takụ kinahombangengku! Kaiso Mawu e něngambang siạ bọu patikụ ene.
12Mambeng kerene kěbị taumata apam mapulu mẹ̌biahẹ̌ mal᷊aagama ringangu mẹ̌biahẹ̌ masěmbaụ dingangi Kristus Yesus e sarung tumbiageng,
13arawe apan taumata ral᷊akisẹ̌ e ringangu mal᷊aakal᷊ẹ̌ e ute mangkeng kạpahuntinambang akal᷊e. I sire mẹ̌ngakal᷊ẹ̌ taumata wal᷊ine kaiso i sire hala e mal᷊aing kẹ̌kaakal᷊eng.
14Kai arawe mạanung i kau, Timotius, ute kěnangko i kau pakatanạbe mạngumpaedẹ̌ těntiro kahěngang kụ seng nitěntiro si kau ringangu pạngimangengue masěgadẹ̌, u i kau masingkạ kai i sai mananěntironu.
15I kau e harusẹ̌ pẹ̌tahěndung u reng dongkeng kadọdọ i kau e seng masingkạ u Winohẹ Susi. U Winohẹ Susi ene e makạgěllịu l᷊aěnna gunang makahombang kasasal᷊amatẹ̌ su pěngangimang si Kristus Yesus.
16Kěbị apang kạbawohẹ su ral᷊ungu Winohẹ Susi, nipal᷊ohoěngben Duata ringangu piạbe pul᷊ise ipaněntirong katěngadẹ̌, baugu ipěnasa ringangu ipaněngkul᷊ẹ̌ apan nẹ̌sal᷊a e ringangu ipěmihing taumata e tadeạu mẹ̌biahẹ̌be su kapulun Duata.
17Dingangu Winohẹ Susi e i sain mẹ̌tangkiang Mawu Ruata e ipakasukụ su kěbị haghin munara mapapia.