Dual Panel1Timotius, anạku ikẹ̌kěndagẹ̌! Iạ, i Paulus němohẹ u suratẹ̌ ini e si kau, ringangu kụkạkindoạ u karimạko Ruata i Amang dingangu Mawung kitẹ i Yesus Kristus měngonggọu al᷊amatẹ̌, tatal᷊ěntụ dingangu karal᷊unsemahẹ̌ si kau. Ual᷊ịeng kapulun Duata ute, iạ e nihengkẹ nakoạ darolohang i Kristus Yesus dingangu nirolohẹ̌ pělẹ̌habar'u pẹ̌bawiahẹ̌ kinẹ̌don Duata. Pẹ̌bawiahẹ̌ ene kai kinatarimạ i kitẹ ual᷊ingu kasasěmbaụ i kitẹ e ringangi Kristus Yesus.
2(1:1)
3Iạ makitarimakasẹ su Mawu Ruata takụ nitangkianengu naung burẹ̌si kere nạung seng nawahẹ̌ta kal᷊amona wọ'i i upung. Iạ e měngkai hanesẹ̌ makitarimakasẹ su Mawu Ruata apạeweng kasaune iạ makatahěndung si kau su ral᷊ungu kal᷊iomaneng, baẹ ěllo arau waẹbe hẹ̌bi.
4Iạ e makạtahěndung kasasusan dal᷊ungu naungu. Kai ene hakịu mang měkẹ̌kahumangu saụ mẹ̌sombang i kau tadeạu naungku e měngkai mal᷊uasẹ̌.
5Iạ e nakatahěndungke pěngangimangu masěga-sěgadẹ̌ si Kristus, kerẹewelai nạung pangangimangi nenẹ u i Lois dẹ̌duan ninangu i Eunike. Kụ iạ e mạngiral᷊ingu i kau e mal᷊aing mangimang kerene.
6Hakịu ene iạ e mapẹ̌tahěndung si kau tadeạu mapẹ̌biah'u tatal᷊ěntụ laonggọ u Mawu Ruata e si kau su tempong iạ e naněllịdu l᷊imaku e su pusigu.
7U Rohkẹ̌ u Ruata niapakawuạ u Mawu Ruata si kitẹ e, wal᷊inewe, Rohkẹ̌ kụ makạkatal᷊o si kitẹ. Kaiso kawe Rohkẹ̌ napenẹu kakěndagẹ̌ dingangu pẹ̌tatingkẹ̌dang.
8Ual᷊ingu ene tangu abe kamea mẹ̌sahiding Mawung kitẹ e ringangu abe lai kameang iạ e natahungkụ ual᷊ingu i Sie. Kaiso, kawe i kau ringangu kuat'u Mawu Ruata, měngkai pẹ̌dararag'u sunsara waug'u Injilẹ̌.
9Duata e měngambang si kitẹ dingangu mẹ̌kui si kitẹ e tadeạu makoạ taumatane sẹ̌sane. I Sie mẹ̌kẹ̌koạ kerene wal᷊inewe ual᷊ingu apan seng kinoạ i kitẹ e, kaiso kawe ual᷊ingu tingirange hala ringangu tatal᷊ěntụ'E nilahẹ'E wọ'i Kristus Yesus kal᷊amonan dunia e reng tawe nịdiadi.
10Kụ orasẹ̌ ini e, Ruata e seng nělahẹu tatal᷊ěntụ'E si kitẹ naparěntan Datu Mananal᷊amat'i kitẹ i Kristus Yesus. I Yesus e namatạ kawasan papate ringangu napakal᷊ahẹu pẹ̌bawiahẹ̌ tutune e su ral᷊ungu Injilẹ̌ ene.
11Kai waugu měhabaru Injilẹ̌ e Ruata něnduị u iạ e nakoạ darolohang dingangu mananěntiro.
12Kai ene hakịu iạ nẹ̌tatahangu kěbị ini, kaiso iạ e těbewe mạngiaking, u iạ e masingkạ-singkạbeng i sain takụ pẹ̌ngimangeng. Iạ e mangimang bue u apạeweng seng niumbalane si siạ e, i Sie mang makariagạ u ene sarang Ěllong Kiamatẹ̌.
13Tuhukeweng kasěllahu naung těntirong katěngadẹ̌ kụ seng takụ nionggọ si kau. Kụ i kau měngkai pạngumpaedẹ̌be pangangimang dingangu kakěndagẹ̌ kụ seng nakoạ tataghuaneng i kitẹ ual᷊ingu nasěmbaụ dingangi Yesus Kristus.
14Dingangu tul᷊umangu Rohkẹ̌ u Ruata e kụ seng biahẹ̌ su ral᷊ungi kitẹ e, ute měngkai pakal᷊ukare pakapia patikụ munara mal᷊aarẹ̌ga kụ seng niumbala si kau.
15I kau masingkạ u patikụ taumata su kaguwạu Asia e seng timal᷊ikudẹ̌ si siạ, su ral᷊unge i Figelius dingangi Hermogenes.
16Kai arawe ral᷊ohon bal᷊en Onesiforus seng masau mapakahaěngu naungku e. Mal᷊owọko Mawu e mělahẹu kakěndag'E si sire. Manịeng iạ e su ral᷊ungu tahungkụ kai i Onesiforus tawe mamameang kakakoạku.
17Ene iạ narěntạe su Roma e, i sie měngkatewe nědeạ dal᷊engu makapẹ̌sombangu iạ.
18Dingangu i kau masingkạ u su Efesus, i sie měngkatewe mẹ̌tẹ̌tul᷊ung siạ. Karimạko Mawu e mělahẹu kakěndag'E si sie su ěllon Mawu e mapatiral᷊ang kaadile su patikụ umatẹ̌ e.