Alkitab Mobile SABDA
[VER] : [SANGIR]     [PL]  [PB] 
 <<  Matius 26 >> 

1Kutẹu nasuẹen těntirone kěbị hal᷊ẹ̌ ene su Mawu Yesus, i Sie něhengetang su manga murit'E,

2"I kamene masingkạu kate lai rua ěllo seng Ěllong Paskah, kụ Ahus'u Taumata e sarung isarakang tadeạu pakipaku su kalu kuruisẹ̌!"

3Su tempo ene manga imang těmbonange ringangu manga matatimad'u tau Yahudi e němpẹ̌tampung su istanang Imang Mawantugẹ̌ i Kayafas.

4I sire němpẹ̌dal᷊ahintau mědeạu měnamẹ si Yesus pakapěnisẹ̌ dingangu měngakal᷊ẹ̌ měmate si Sie.

5"Kaiso," angkuěng i sire, "kumbahang hal᷊ẹ̌ ene koateng su tempon sal᷊iwang, mạdiring makapẹ̌gonggạ kawanua."

6Piạ i Yesus nạung su Betania, su wal᷊en Simon nạung piạ sakịe su pisị makạtatakụ,

7ene piạ e tau wawine sěngkatau himaung si Yesus. I sie nẹ̌bawa wotol᷊ẹ̌ pualam sěmbua lohone lana mawěngi mal᷊ěgadẹ̌. Ene Mawu Yesus mạiang kapẹ̌sẹ̌simokol᷊e, tau wawine ene naněboheng lana mawěngi ene su těmbọu Mawu Yesus.

8Manga murit'i Yesus e nakasilọe hal᷊ẹ̌ ene kụ naral᷊akị naung i sire. "Apawe gunane kěbị ene nipẹ̌gagholọ?" angkuěng i sire.

9"Lana mawěngi ene wotonge ikawal᷊ụ mal᷊ěgadẹ̌, kụ doite rembeng ikaonggọ su taumata kasiang!"

10Mawu Yesus masingkạu tiněnnang sire, kụ i Sie něhengetang, "Kawe unụe i kamene mapakasusan tau wawine ěndaịe? I sie kai nẹ̌koạ munara mapia ringangu mawantugẹ̌ baugu Iạ.

11Tau kasiang e hanesẹ̌be ene su tal᷊oarang kamene, arawe Iạ ute wal᷊inewe sěntiniạ dingangi kamene.

12U pananěbohu l᷊ana mawěngi ene su wadang-Ku e ute, i sie kai mẹ̌děndiahi pělal᷊ěbing baug'u Iạ.

13Pangimangke! Su kaguwạu dunia e suapạeweng Injilẹ̌ ipẹ̌kẹ̌kakeke ute, kakanoạu tau wawine ene sarung ipẹ̌bawěke lai makoạ tatahěndung si sie."

14Kutẹu sěngkatau wọ'i sire mapul᷊o dua murit'u Mawu Yesus, kụ arenge i Yudas Iskariot, natamai nẹ̌sěmạu manga imang těmbonange.

15I sie nẹ̌berạe si sire, "Apa sarung ionggọ i kamene si siạ kereu iạ manarakang i Yesus si kamene?" Tangu i sire němpěndekengke roitẹ̌ sal᷊aka, těllum pul᷊o su kal᷊ěpane kụ bọu ene nangonggọeng doitẹ̌ ene si sire.

16Nanětạ bọu ene i Yudas hanesẹ̌ mědẹ̌deạ loahe mapia měnarakang u Mawu Yesus.

17Su ěllo humotong su Sal᷊iwangu Borotẹ̌ Ta Lahaesang, manga murit'u Mawu Yesus němpẹ̌haungke si Sie. I sire nakiwal᷊ọe, "Kai suapa kapulun'U sadiaěng i kami e kaěng u Paskah e waug'i Tuang?"

18Mawu Yesus simimbang, "Dakọe sol᷊ong soa pẹ̌sěmạ i anu sene kụ pẹ̌bera si sie, 'Angkuěng i Mananěntiro, tempoku e seng nịdating; kụ Iạ mapulu mẹ̌sal᷊iwang u Paskah e su wal᷊enu ringangkeweng manga muritẹ̌-Ku.'"

19Manga murit'i Yesus e němpẹ̌koạ kerẹewe nioron Mawu Yesus si sire. I sire tamai němpěnadia kaěngu Paskah ene.

20Ene nahěbịe, Mawu Yesus dingang i sire murit'E mapul᷊o dua e němpẹ̌kaiangke su meda.

21Ara i sire kạpahungkaěnge, Mawu Yesus něhengetang, "Daringihẹ̌ko: sěngkatau wọu tal᷊oarang kamene e sarung mẹ̌sunial᷊'u Iạ."

22Nakaringihẹ̌ ene, manga muritẹ̌ e měngkate něngkasusa tạ sihinge. Mase i sire nasịkiwal᷊ong kiwal᷊one su Mawu Yesus, "Bal᷊inewe iạ sutimonang Kau Mawu?"

23Mawu Yesus simimbang, "I sain nangunong borotẹ̌ su ral᷊ungu mangko ringangku ute, i sie sarung mẹ̌sunial᷊ẹ̌ u Iạ e.

24Kahěngang bue Ahus'u Taumata e sarung mapohong kere mạbawohẹ su ral᷊ungu Winohẹ Susi. Kaiso kạěngkěhang bue i sai mẹ̌sunial᷊'u Ahus'u Taumata! Tau ene mạěndokangbelai nạung tawe kadiongeng piněhanạ!"

25Mase i Yudas i anụ e nẹ̌sunial᷊ẹ̌ e nẹ̌bera, "Kụ bal᷊inewe iạ ngae itẹ̌timonang Kau Mawu?" I Yesus simimbangke, "Kerẹewe nịbaweranu!"

26Ene i sire mạhungkaěngke, Mawu Yesus nangal᷊ạe borotẹ̌, mase nẹ̌berang kakal᷊iomaneng tatarimakasẹ. Bọu e i Sie něngangempangke borotẹ̌ ene ringangu l᷊iman'E kụ nitěgone su manga murit'E apid'u něhengetang, "Pěmpangal᷊ạe, pěmpẹ̌kaěngke; ini e kai wadang-Ku."

27Bọu e i Sie nangal᷊ạe panganginumangu anggorẹ̌ e, mase nakitarimakasẹ su Mawu Ruata. Nitěgone su manga murit'E, kapẹ̌berane, "Panginumẹen kamene kěbị!

28U ini e kai rahaku ipạnahutěngadẹ̌ pẹ̌kakědon Duata -- dahạ e iapatědọ baugu l᷊awọ ipangampung dosan sire.

29Pangimangke: Iạ sembeng tawe sarung manginung anggorẹ̌ ini lai sarung tempong Iạ manginung anggorẹ̌ buhu ringangkeweng kamene su Runia Wuhung Amang-Ku e."

30Bọu e i sire němpẹ̌kantarịu kakantarị daralo sěmbua. Kụ mase i sire nakoạ sol᷊ong Bukid'u Zaitun.

31Ene i Yesus něhengetangke su manga murit'E, "Su hěbi ini e lai i kamene kěbịe ral᷊iu měmpẹ̌tal᷊ang maněntangu Iạ. U su Winohẹ Susi e mạbawohẹ: Mawu Ruata něhengetang, 'Iạ e sarung měmate mělal᷊ukadẹ̌ e, kụ gapaěngu domba e sarung měkal᷊iaesẹ̌.'

32Kai kereu Iạ seng niapẹ̌bangung kapia, Iạ e sarung měngal᷊imona si kamene sol᷊ong Galilea."

33I Petrus simimbang su Mawu Yesus u, "Manilaing i sire wal᷊ine e maněntang i Tuang, arawe iạ e mambeng tala!"

34"Tahěndunge," angkuěngu Mawu Yesus si sie, "su hěbi ini e lai těntal᷊ang manụ ta kimẹ̌kukụ, i kau e seng těllung sul᷊e nẹ̌sunial᷊'u Iạ."

35I Petrus simimbang, "Manilaing iạ pateěng sěngkapate ringangu Mawu, kai iạ e mang ta mẹ̌sunial᷊'i Kau Mawu!" Ku kěbị manga muritẹ̌ bal᷊ine e mal᷊aing němpẹ̌bera kerene.

36Nal᷊iung ene Mawu Yesus natamai ringangu manga murit'E nědeạ tampạ isěsẹ̌ba Getsemani. Sene i Sie něhengetang si sire, "Pahungkaiangko sini těntal᷊ang Iạ deng tamai mẹ̌kal᷊iomaneng."

37Mase i Sie němaringang si Petrus dingangi rẹ̌dua anạ i Zebedeus sěngkatamai ringang'E. I Sie nanětạe nasusa ringangu ghiměnggang.

38I Sie něhengetang su manga murit'E, "Naungku e nasusa tạ sihinge, pěndange mẹ̌sul᷊ungu seng mate e. Kěngkatanạko sini i kamene, kụ pěmpẹ̌dal᷊ukadẹ̌ko ringang-Ku."

39Bọu e Mawu Yesus diọ nẹ̌těngkaghea, kụ i Sie nẹ̌těngkasumagẹ̌ su ěntana kụ nẹ̌kal᷊iomaneng. "O Amang," angkuěng'E, "kereu wotonge, apakarauko wọu Iạ e kasasigěsạ takụ tal᷊udang ini. Kai wal᷊inewe kapuluku e mariadi, kaiso kawe tumuhụ kapulung Amang-Ku e sẹ̌sane."

40Bọu e Mawu Yesus nẹ̌bal᷊ịe su anum manga murit'E i sire těllu, kutẹu sěngkakakěllae i sire kawe kạpahuntikịe. I Sie něhengetangke si Petrus, "Kal᷊ingung lai sěngkaorasẹ̌ kai i kamene těllu e mang tawe nakal᷊ukadẹ̌ dingang-Ku?

41Pakaral᷊ukadẹ̌ bue ringangu pěmpẹ̌kal᷊iomanengko mạdiring i kamene kahombangengu sasal᷊ukạ. Těngadẹ̌ bue rohkẹ̌ e mapulu mẹ̌koạ hal᷊ẹ̌ mětẹ̌tahino, kaiso i kamene mang ta makatohạ, batụ u wọu sěmběkang katataumata e kai lome."

42Saụ kapia Mawu Yesus natamai nẹ̌kal᷊iomaneng, angkuěng'E, "O i Amang, kereu kasasigěsạ ini kawe hinong takụ tal᷊udang, kụ tawe ikahipe ute, walạe karariadine kapulung Amang."

43Bọu e Mawu Yesus nẹ̌sul᷊e kapia, kụ sěngkakěllane manga murit'E kawe wědang kạpahuntikịe, ual᷊ingu tikị i sire kai tumanịu mawěhạ běhạ.

44Sěnsul᷊ẹko l᷊ai Mawu Yesus naněntangken sire kụ katěllun sul᷊ene nẹ̌kal᷊iomaneng, bawerane mẹ̌sul᷊ung u kal᷊amona.

45Bọu e i Sie nẹ̌sul᷊ẹ e kapia su anum manga murit'E kụ něhengetang, "Měngkai wědang měmpẹ̌tẹ̌tikị dingangu měmpạngirul᷊e i kamene? Kakěllạe, seng nidating tempone Ahus'u Taumata isarakang su kawasang taumata waradosa.

46Pěmpẹ̌bangungke, bọe i kitẹ mahundal᷊engke. Tingangke! Taumata mẹ̌sunial᷊'u Iạ e seng ene!"

47Piạ i Yesus bẹ̌dang kạpělẹ̌hengetange i Yudas, sěngkatau wọ'i sire mapul᷊o dua murit'E ene narěntạe. Ringangi sie ute, nahunděntạe lai taumata l᷊awọ kụ piạ pedane ringangu pal᷊o-pal᷊on sire. I sire niroloh'u manga imang těmbonange ringangu manga matatimad'u tau Yahudi.

48I taha pẹ̌sunial᷊ẹ̌ e kai seng nạung něhabarẹ̌ si sire tatiala ini, "I sain takụ děnguange ute ene taumatane. Kụ samẹ e i Sie!"

49Kerene sarang nahumpạu tampạ ene i Yudas měngkatewe himaung su Mawu Yesus kụ nẹ̌bera, "Tabeạ, Tuang Guru!" mase i sie riměngu Mawu Yesus.

50I Yesus simimbang, "Anu, kai waugu apa i kau nakakarěnta sini?" Ene taumata l᷊awọe nẹ̌těngkawahanịe kụ něnamẹ si Yesus.

51Sěngkatau wọ'i sire murit'E apang ene sene ringangi Yesus, něnawụ pedane kụ namilị ěllangu imang mawantugẹ̌ sarangkewe nahěnsị tul᷊ine.

52Mawu Yesus něhengetangke su murit'E ene, "Suhịe kapia pedanu e su homane u kěbị apang měmpamateng peda e, sarung lai mateng peda.

53Arau su naungu Iạ e kai ta makarorong tul᷊ung si Amang-Ku e, kụ i Sie apid'u měndolohu malạekat'E nangělembo wọu mapul᷊o dua su ghapaěnge?

54Arawe mạeng kawe kerene ute, tawẹ kasasěhụe kereu apang kụ seng nitěbal᷊ẹ̌ su ral᷊ungu Winohẹ Susi u mambeng těngadẹ̌ mariadi kere orasẹ̌ ini e?"

55Mase Mawu Yesus něhengetang su taumata l᷊awọ ene, "Unụe Iạ e kai tahapate, hakịu i kamene ruměnta měmpẹ̌bawa warạ dingangu pal᷊o-pal᷊o mědeạu měnamẹ si Siạ? Ěllo-ěllo Iạ e kawe mạněntiro su Wal᷊em Mawu e, kai i kamene tawe měnamẹ Siạ!

56Kai mang seng harusẹ̌ kerene tadeạu misěhụ apang kụ niwohẹu manga nabi e su ral᷊ungu Winohẹ Susi." Bọu e kěbị murit'E nahuntal᷊ang němpaněntangu Mawu Yesus.

57Taumata apạen němpẹ̌namẹ Mawu Yesus němpangěntuden Sie sol᷊ong bal᷊eng Imang Mawantugẹ̌ i Kayafas. Sene manga mananěntirong agama e ringangu manga matatimad'u tau Yahudi e seng němpẹ̌tampung.

58I Petrus tụtol᷊e Mawu Yesus bọu maraune sarang dělah'u wal᷊eng imang marangẹ. Mase i Petrus simuẹ̌ e su ral᷊ungu rělahe, kụ naiangke ringangu manga měndariagạ. I sie mapulu makakasingkạ měnsang kereapa sarung ěnsuene.

59Manga imang těmbonange ringangu patikụewen dal᷊ohong Sanhedrin e mědẹ̌deạ sahidi konti, mědeạu mapakanawong hukumangu papate su Mawu Yesus.

60Kai i sire tawe nakareạ sarang sěmbaụ tatahutěngade, sěmbal᷊iau seng lawọ nial᷊ạ sahidi konti. Nadehọ piạ e ruang katau riměnta.

61I rẹ̌dua e němpẹ̌berae, "I anu ěndaịe nẹ̌bera, 'Iạ e makaghoghahẹ̌ bue Wal᷊em Mawu, kụ saụbe ikakoạ-Ku su ral᷊ungu těllu ěllo.'"

62Mase imang mawantugẹ̌ e nẹ̌buạe, kụ nẹ̌bera si Sie, "Kawe unụe i Kau e mang tawẹ sasimbangu su laěnsilẹ̌ ipangěnsilẹ̌ si Kau e?"

63Arawe Mawu Yesus měngkate tawẹ kěndịe. Nẹ̌saụ kapia imang mawantugẹ̌ e nẹ̌bera si Sie, "Su Těngon Duata Wiahẹ̌ e ute paul᷊ịko si kami měnsang kai i Kau e Ratu Mananal᷊amatẹ̌, Ahus'u Ruata?"

64Mawu Yesus simimbang, "Kere niweranu. Kai pangimangko: u manětạ bọu orasẹ̌ ini e, i kamene sarung makasilo Ahus'u Taumata mạiang su sěmběkang koanengu Mawu Ruata Makawasa, kụ duměnta su wowom binawa su l᷊angị e!"

65Tangu imang mawantugẹ̌ e měngkate naningkasẹ̌ pakeange, kụ nẹ̌berạe, "I Sie něhinakang Duata! Seng ta wahal᷊uasu piạ lai sahidine. I kamene kěbị e seng nakaringihẹ̌ hala pělahinakange su Mawu Ruata e.

66Kụ ini e kerea su tiněnnang kamene e?" I sire němpẹ̌simbang u, "I Sie nẹ̌sal᷊a kụ hinong pateěng."

67Ene i sire nangědụe ghating Yesus, kụ němpangoka si Sie. Sěnggạe wue ute němpameru si Sie,

68ringangu nẹ̌bera, "Kěnangko tikạ dingangu pěhabarẹ̌ko si kami, ei Ratu Mananal᷊amatẹ̌! I sai wue nameru si Kau e?"

69Ene i Petrus kạkaiange su l᷊ikude, su rělahẹ̌. Sěngkatau wọu tal᷊oarang ěllang bawine himaung kụ nẹ̌bera si Petrus, "Bal᷊inẹbe i kau l᷊ai ringang i Yesus tau Galilea e?"

70Kai i Petrus nẹ̌děndil᷊ẹ̌ su těngon sire kěbị. "Iạ e ta nakahěngang měnsang i kau e mạanung a," angkuěng i Petrus,

71bọu ene i sie siměbangkě wọu tukadẹ̌ e. Sěngkatau ěllang bawine wal᷊ine nakasilo si Petrus, kụ nẹ̌bera si sire sene, "Tau ěndaị ini e mang mal᷊aing dingang i Yesus bọu Nazaret e."

72Kutẹu saụe wue i Petrus nẹ̌děndilẹ̌, kapẹ̌salune, "Těnga-těngadẹ̌ iạ běgawen tau ene!" angkuěng i Petrus.

73Ta nararěnnạ wọu ene i sire apang dụdarisị sene němpẹ̌haungke si Petrus dingangu nẹ̌bera, "Mal᷊ahẹ bue, i kau e mang dingang i sire. Ene kinakiral᷊a wue wọu pẹ̌bawisaranu."

74Ene i Petrus nanětạe mẹ̌sẹ̌sasalu kụ nẹ̌bera, "Makakutụe, iạ e wẹ̌gawen tau ene!" Su orasẹ̌ ene lai manụ kimukụ.

75Kụ i Petrus nakatahěndungke u Mawu Yesus seng bọu něhengetang si sie, "Těntal᷊ang manụ deng ta kimẹ̌kukụ, i kau e seng těllun sul᷊e nẹ̌sunial᷊'u Iạ." Bọu e i Petrus simẹ̌bangke kụ simangịe ringangu pẹ̌sasasěsilẹ̌.


  Share Facebook  |  Share Twitter

 <<  Matius 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel