Dual Panel1Mạeng kerene, apạe ipẹ̌berang kitẹ e? Apa i kitẹ měngkate mẹ̌kẹ̌koạ dosa tadeạu Mawu Ruata měngkai kuměndag'i kitẹ?
2Tantu tala! Dosa e semben tawe lai mẹ̌kawasa si kitẹ, kụ unụe wue i kitẹ měngkai hanesẹ̌ měbẹ̌biahẹ̌ dingangu kapẹ̌kẹ̌koạe rosa?
3Masingkạ bue i kamene u su tempong i kitẹ nisahani e i kitẹ niapakasěmbaụ dingang i Kristus Yesus? Ini e mangal᷊ene i kitẹ niapakasěmbaụ dingangu papaten'E.
4Dingangu pananahani ene, i kitẹ e nilẹ̌bing dingang i Kristus dingangu sěngkakapate ringange, tadeạu kereapạewen i Kristus nipẹ̌bangung bọu papate ual᷊ingu kawasang Amang kụ mawantugẹ̌, kerene lai i kitẹ makaral᷊eng su pẹ̌bawiahẹ̌ buhu e.
5Kereu i kitẹ seng nasěmbaụ dingang i Kristus batụu i kitẹ sěngkakapate ringang i Sie, i kitẹ sarung masěmbaụ dingang i Sie lai ual᷊ingu i kitẹ niapẹ̌bangung kapia mẹ̌sul᷊ungkewen Sie.
6I kitẹ masingkạ u kakakoạ i kitẹ těbe e seng niapakapate sěngkakapate ringang i Kristus su kalu kuruisẹ̌ tadeạu kawasang kakakoạ i kitẹ marosa e seng nipakaghoghahẹ̌; kụ ual᷊ingu ene ute i kitẹ semben tawe ipẹ̌tahuěllangu rosa.
7Kereu sěngkatau e kawe nate, ute taumata ene iapakal᷊iwirẹ̌ bọu kawasan dosa.
8Kereu i kitẹ seng nate ringang i Kristus, i kitẹ mangimang u i kitẹ lai sarung mẹ̌biahẹ̌ dingang'E.
9U i kitẹ masingkạ u i Kristus seng nẹ̌bangung bọu papatene, dingangu i Sie sembeng lai tawe mate; papate e seng tawẹ kawasane su watangeng'E.
10Papate kinahombangeng i Kristus e kai papate ual᷊ingu rosa. Ene samatang mariadi sěnsul᷊e waugu sarang marěngụ-děngụ. Dingangu pẹ̌bawiahẹ̌ niral᷊engang'E ini kai pẹ̌bawiahẹ̌ baugu Ruata.
11I kamene harusẹ̌ lai mangěnna watangeng i kamene nate ual᷊ingu rosa, kaiso pẹ̌bawiahẹ̌ su ral᷊ungu pẹ̌kakauhẹ̌ matoghasẹ̌ dingangu Mawu Ruata e kai su ral᷊ung i Kristus Yesus.
12Abe lai mapakawalan dosa měngawasa pẹ̌bawiahu apan mẹ̌tate tadeạu i kamene abe kawe tumuhụ ěnning i kamene raral᷊aị.
13Kumbahang lai i kamene měnarakang'u laesu wadang i kamene su kawasan dosa baugu ipakẹ su manga timona kụ daral᷊aị. Kaiso sarakangke watangeng i kamene su Mawu Ruata kere taumata kụ seng nial᷊ing bọu papate sarang pẹ̌bawiahẹ̌. Sarakangke kạguwạu watangeng i kamene su Mawu Ruata tadeạu ipakẹ baugu mẹ̌koạ kapulun Duata.
14Dosa tawe wotonge měngawasa si kamene, ual᷊ingu i kamene tawe saụ nẹ̌biahẹ̌ su al᷊ungu torat'u Yahudi e kaiso kai su ral᷊ungu kakěndagu Mawu Ruata.
15Orasẹ̌ ini apạ e ghẹ̌sine? Botonge i kitẹ mẹ̌koạ dal᷊akị, batụu i kitẹ seng bal᷊ine su al᷊ungu kawasan torat'u Yahudi e kaiso kawe su al᷊ungu kawasan tatal᷊ěntụ u Mawu Ruata? Mamben tala!
16Masingkạ bue i kamene u kereu i kamene měmpanarakang u watangeng su sěngkatau baugu kapulune ute i kamene kai ěllangu tau kụ tẹ̌tuhukang i kamene ene -- běgạ e měnsang ěllangu rosa kụ mẹ̌bẹ̌bawa si kamene sarang papate, arau kawe ěllang tutuhụ su Mawu Ruata kụ ual᷊ingu ene saụ mẹ̌sěngkapian Duata.
17Kai tarimakasẹ su Mawu Ruata! Batụu nạung kal᷊amona i kamene nakoạ ěllangu rosa, kai ini e i kamene ringangu kạguwạu naung tụtuhụ těntirong katěngadẹ̌ kụ seng nighěllị si kamene.
18I kamene seng niliwirẹ̌ bọu rosa kụ tempo ini nakoạ ěllang baugu kapulun Duata.
19Ual᷊ingu pěngangěnnang kamene wědang lome ute iạ mẹ̌pakẹu sasihing u pẹ̌tatahuěllang tadeạu nangělembo mal᷊ighạ i kamene makaěnna. Kal᷊amona i kamene němpěnarakangu kạguwạu watangeng i kamene kere ěllang su manga hal᷊ẹ̌ maral᷊amuhụ dingangu ral᷊aị baugu karaki raral᷊aị. Kerene lai orasẹ̌ ini, mal᷊owọko i kamene měmpanarakangu kạguwạu watangeng i kamene kere ěllang baugu kapulun Duata mẹ̌tatal᷊ahinon manga timonan Duata těntani.
20Su tempong i kamene nipẹ̌tahuěllangu rosa, i kamene tawe nipẹ̌kawasaěngu karakin Duata.
21Su tempo ene kai apa untune nitarimạ i kamene wọu manga hal᷊ẹ̌ kụ orasẹ̌ ini ikẹ̌kameang kamene měmpẹ̌koạ? Manga kakanoạ ene kětạeng makawawa sarang papate!
22Arawe orasẹ̌ ini i kamene seng niliwirẹ̌ bọu rosa kụ nariadi ěllang u Ruata. Kal᷊auntungu e ute i kau makapẹ̌biahẹ̌ susi waugu Ruata kụ hal᷊ẹ̌ ene makaual᷊i wiahẹ̌ tutune ringangu kakalẹ̌.
23Batụu papate e kai wawaehẹ̌ dosa; arawe pẹ̌bawiahẹ̌ tutune ringangu kakalẹ̌ dingangkewen Kristus Yesus Mawung kitẹ e kai laonggọ kụ nionggọ u Mawu Ruata wawaehe.