Dual Panel1Nal᷊iung ene iạ saụewe nakahombang papasilo. Iạ e nakasilo tukadẹ̌ sěmbaụ su sorga e natope. Bọu ene kinaringihẹ̌ko l᷊ai piạ tingihẹ̌ nạung seng bọu měmẹ̌misara si siạ kere tingihu napiri. Tingihẹ̌ ene něbera, "Endaị e awị sol᷊ong ini. Iạ e mapasilo si kau apa kụ sarung mariadi."
2Iạ e apidu nilohoěngu Rohkẹ̌ u Ruata. Mase iạ nakasilọ e su sorga e kai piạ kararatuang sěmbaụ, kụ piạ sěngkatau mạiang su kal᷊aianeng e.
3Gatine su sěnnang kere paramata Yaspis dingangu paramatan Sardis. Ene piạko rěndipahẹ̌ sěmbua awạ e kamumụ něliwung kaderang kararatuang ene.
4Ene nělikụ nělimbolong kaderang kawawantugẹ̌ ene piạko l᷊ai kaderang kararatuang bal᷊ine kal᷊awọe ruam pul᷊o ěpạ su waụ e. Sene tangu nikaianengu těmbonange i sire ruam pul᷊o ěpạ su kataune měmpělẹ̌luheng pakeang i sire mawawira ringangu makotane wul᷊aeng.
5Bọu kaderang kararatuang ene e naměsị e tualagẹ̌ měkẹ̌kilạ mase piạ e tingihu rěllụ měgẹ̌gaghal᷊ẹ̌dụ. Kụ su těngong kararatuang ene e piako l᷊ai oborẹ̌ pitumbaụ kạdarikọ; kụ kai ene Rohkẹ̌ u Ruata, arěgang pitu.
6Mal᷊aing kẹ̌kaěbakeng su těngong kararatuang ene e piạ apa kakěllaěng mạngawẹ laud'u kasěnaěng, matilang kere galasẹ̌. Kạdal᷊ikụ su kaderang kararatuange, suapan sěndihange, piạ diadikang ěpạ, kụ su těngone ringangu su l᷊ikude napěpidu mata.
7Diadikang humotong, kakěllaěng kere singa. Karuane, kere sapi esẹ. Katěllune piạ gatine mẹ̌sul᷊ungu ghahịu taumata. Arawe kaěpạ e, kěllaěng kere manụ kamamaresẹ̌ kạtěllạ e.
8Kaěpạ u riadikang ene nahiạu panide pẹ̌tahạ ěnnung, mase napěpidẹ̌ dingangu su sěhaweng dal᷊unge napenẹ u mata. Ěllo hěbi manga riadikang ene hanesẹ̌ měkẹ̌kantarị tawẹ ědone, "Susi, susi, apakasusiko Mawu, Ruata Makawasa; kụ ene, ringangu seng ene, dingangu ene sěntiniạ."
9Kaěpạ u riadikang ene e měmpẹ̌kẹ̌kantarị u kakantarị daralo, adatẹ̌ dingangu tatarimakasẹ si Sie kụ mạiang su kaderang kararatuange, kụ kai i Sie kụ biahẹ̌ sarang karěngụe. Kụ su orasu manga riadikang ene měmpẹ̌kẹ̌kantarị,
10tangu i sire ruam pul᷊o ěpạ měngangahạ e němpẹ̌těngkasumagẹ̌ su těngon tau kụkaiang su kaderang kararatuange, mase němpẹ̌suba si Sie kụ biahẹ̌ sarang kakalẹ̌ e. Bọu ene i sire e němpěneledu manga makotan sire e su těngong kaderang kararatuange ringangu nẹ̌bera,
11"O Mawu, o Ruatang kami! Samatang i Kau Mawu e wotonge makatarimạ u raralo, adatẹ̌ dingangu kawasa. U kai i Kau něndiadi patikụ sabarange, ringangu kai su ral᷊ungu kapulun'U l᷊ai patikụ e seng nariadi dingangu nẹ̌biahẹ̌."