Alkitab Mobile SABDA
[VER] : [SANGIR]     [PL]  [PB] 
 <<  Yakobus 2 >> 

1Manga anạ u sěmbaụku! I sain mạngimang su Mawu Yesus Kristus, Mawu Kawantugange, kumbahangbe i kamene mapẹ̌dal᷊ahaen taumata kụ kai měmẹ̌mile ghati.

2U kereu piạ sěngkatau kalạ mělẹ̌luhen sinsing bul᷊aeng dingangu pakeange mal᷊ěnggihẹ̌ kụ diměnta su komol᷊ang i kamene, bọu ene riměntako l᷊ai sěngkatau kasiang něluhen pakeange naghaghonaị,

3tangu i kamene kawe limembong kaadate su tau pakeange mal᷊ěnggihẹ̌ e. I kamene kai manga mẹ̌bera si sie, "Tuang! Kaiangko su kadera mal᷊ěnggihẹ̌ ini e." Arawe su tau kasiang ute i kamene kawe měmpẹ̌berau, "Darisịko paise," arau "Kaiangko wawa su masanạ e."

4Ual᷊ingu pẹ̌kakoạ kerene tangu, i kamene seng nẹ̌koạ pẹ̌dal᷊ahaedẹ̌ sutal᷊oarang kamene ringangu měngẹ̌ngarěgan taumata e tụtuhụ tiněnnang kamene mal᷊amuhụ.

5Pěmpẹ̌tahěndungko, i kamene manga anạ u sěmbaụ ikẹ̌kěndagẹ̌! Tau kasiang su dunia ini e, nipilen Duata apakạkalạ su pěngangimang. Taumata ene sarung makoạ dal᷊ohong kawanuan Duata mẹ̌sul᷊ungu nikědon Duata su taumata apang kụkěndag'i Sie.

6Kai i kamene maal᷊ạ be měmpạnamedẹ̌ taumata kasiang e, sěmbal᷊iau kawe makakalạ e měmpạnědạ i kamene ringangu mạnuhudi kamene sol᷊ong pěnggaghutaěnge.

7Seng i sire ene měmpělẹ̌hodatẹ̌ areng mawantugẹ̌ e niraekang i kamene wọu anun Duata!

8I kamene měmpẹ̌kẹ̌koạbe katul᷊idẹ̌ e kereu i kamene mẹ̌děndal᷊engben torat'u kararatuang kụ kẹ̌kaẹ̌bakeng su ral᷊ungu Bukẹ̌ Susi ini: "Kěndagu sěndinganengu taumata e kerẹewe lai kuměndagu watangengu e."

9Kai kereu i kamene kawe mạmile ghati ute, i kamene kai měmpědẹ̌dosa, kụ torat'u Mawu e mělẹ̌lahẹu i kamene kai lụlampa tita.

10I sain lumampa piạu sěmbaụ bọu patikụ titang Mawu e ute limampa kěbị.

11U i sain něhengetang, "Kumbahang mawuang," i Sie lai něhengetang u, "Kumbahang mamate." Kụ kamagengu i kamene tawe nawuang, o kawe namate, tangu i kamene mal᷊aing rumal᷊ampa titang Mawu e.

12Pěmpẹ̌berạe ringangu pěmpẹ̌koạ e kere taumata kụ sarung gutaěng tuhụ titang Mawu e kụ makal᷊iwirẹ̌ taumata.

13U Mawu Ruata e tawe manodẹu tatal᷊ěntụ e si sain běgang tatal᷊ěntụ. Kaiso tatal᷊ěntụ e limemboweng katoghase wọu pělahukunge!

14Manga anạ u sěmbaụ! Apa wue gunane taumata mẹ̌berau, "Iạ e taumata mạngimang," kereu i sie tawe manodẹu kakanoạ e? Botonge pangangimang kerene makaambang si sie?

15Kereu sěngkatau wọu manga anạ u sěmbaụ tamba pangangimang měgẹ̌gausẹ̌ pakeang arau nikakawusangu laidopẹ̌ měllo-měllo e.

16Apạ e gunane kụ i kamene mẹ̌bera si sie: "Pěmpěluhẹ e pakeang i kamene pakatukusẹ̌ dingangu pěmpẹ̌kaěngke pakaral᷊aedẹ̌!" -- kereu i kamene tawe měmpěngonggọu apang gẹ̌gausange gunang ipẹ̌biahẹ̌ e?

17Kerene lai taumata mạngimang, kereu tawe ilahẹ su kakanoạ tangu, pangangimang ene e tawẹ gunane.

18Aramanung piạ u mẹ̌bera, "Piạben taumata mạngumbala su pangangimange ringangu piạu l᷊ai mạngumbala su kakanoạ e." Iạ e sarung sumimbang u, "Todẹko si siạ kereapa taumata makapěnaghuang pangangimang tawẹ kakanoạ e ringangu iạ e sarung mapakal᷊ahẹ dingangu kakanoạ u iạ e kai mạnaghuang pangangimang."

19I kamene mạngimang u Ruata e kětạbeng sěmbaụ arau ěng? Kụ, manga setang e mal᷊aing mạngimang hakịu i sire kụkendeng takụ!

20I kamene mambeng bodokẹ̌! Kụ apa měnsang hinong ipakal᷊ahẹ si kamene u tawẹ gunane piạ pangangimang kụ tawẹ kakanoạ e?

21Kakěllạewe si Abraham i upung i kitẹ. I sie nitarimạbe mapia kahian Duata ual᷊ingu kakanoạ e kụ su tempong i sie něnarakang i Ishak, anạ e, su Mawu Ruata su pananěmbaěng.

22Sini e nal᷊ahẹ u pangangimange harusẹ̌ ilahẹ dingangu kakanoạ tadeạu masukụ.

23Ene ute sěndal᷊engu ayetu Bukẹ̌ Susi e, "I Abraham mạngimang su Mawu Ruata, kụ ual᷊ingu pangangimange tangu Ruata e něnarimạ i sie mẹ̌sul᷊ungu taumata měkẹ̌koạ kapulun Duata." Kai ual᷊ingu ene hakịu i Abraham nisěbạ, "Hapịu Mawu Ruata".

24Kụ nal᷊ahẹ e ini, u taumata kụ nitarimạ u Ruata mapia ual᷊ingu apan nikoạ e, kụ bal᷊inewe kětạeng ual᷊ingu pangangimange samatang.

25Kakěllạe lai si Rahab, bawine tahapẹ̌sundal᷊ẹ̌ ene. I sie nitarimạ u Mawu Ruata e mapia ual᷊ingu kakanoạ e, kụ piạ i sie něnarimạ u mẹ̌kakakoto tau Israelẹ̌ e, su wal᷊ene ringangu nẹ̌tul᷊ung i sire nipatal᷊ang u watangeng i sire e wọu ral᷊eng bal᷊ine.

26Kụ kerẹewe wadang kụ tawẹ rohkẹ̌ e ute kai wadang nate, kerene lai pangangimang tawẹ kakanoạ e ute kai pangangimang nate.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Yakobus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel