Alkitab Mobile SABDA
[VER] : [SASAK]     [PL]  [PB] 
 <<  1 Timotius 1 >> 

1Timotius, bije tiang saq sah lẽq dalem iman! Surat niki lẽman tiang, Paulus, rasul Deside Isa Almasih siq prẽntah Allah, Juruselamette dait siq prẽntah Deside Isa Almasih, saq jari harepante. Allah Bapa dait Deside Isa Almasih Junjungante Saq Mulie ngicanin side berkah, rahmat dait damẽ sejahtere.

2(1:1)

3Tiang melẽt adẽq side tetep ndot lẽq Epesus maraq saq sampun tiang tegesang lẽq side sewaktu tiang lalo ojok Makedonia. Sẽngaq, lẽq Epesus araq pire dengan saq nyebarang pengajahan saq ndẽq kenaq, dait side harus balaq ie pade.

4Badaq ie pade adẽqne ndaq malik ngerẽpotang diriq siq dongẽng-dongẽng dait cerite-cerite asal-usul saq ndẽq araq tutuqne. Selapuqne nike cume nimbulang masalah doang, dait ndẽqne jauq dengan idup tertib lẽq dalem iman lẽq arepan Allah.

5Tujuan nasẽhat tiang nike adẽq dengan bau ngasihin siq atẽ saq suci, dait atẽ nurani saq murni serte lẽman iman saq tulus ihlas.

6Araq separo dengan saq sampun ndẽq idup maraq nike malik, dait sesat siq ucapan-ucapan saq ndẽq araq manpaatne.

7Ie pade mẽlẽ jari guru Hukum Taurat, nike hukum saq tetulis lẽq dalem Kitab Suci Taurat, padahal ie mẽsaq ndẽqne paham mengenai hal-hal saq ie pade ucapang atao hal-hal saq utame saq secare yakin ie pade sampẽang.

8Ite nenaoq bahwe Hukum Taurat nike bagus, lamun tekadu maraq berembẽ sepatutne.

9Harus teinget bahwe Hukum Taurat ndẽqne tepiaq jari dengan-dengan saq kenaq, laguq jari dengan-dengan durhake, dengan-dengan saq ndẽq adil, dengan saq ndẽq kenal Tuhan, jari dengan saq bedose, dengan-dengan saq mentingang dunie, dengan-dengan saq ndẽq bedowẽ agame, dait jari dengan saq nyematẽq amaq atao inaqne, jari selapuq tukang nyematẽq,

10jari dengan-dengan saq cabul, saq gawẽq perbuatan saq cabul kance sepade jenisne, penculik, penduste, dengan saq besumpah palsu, dait selapuq hal-hal lain saq betentangan kance pengajahan saq kenaq,

11saq tedasarang lẽman Kabar Solah saq mulie lẽman Allah Saq Tepuji, saq penyebaranne tepercayeang lẽq tiang.

12Tiang besyukur lẽq Deside Isa Almasih Junjungante Saq Mulie. Ie sampun ngicanin tiang kekuatan jari pelayan-Ne, dait saq nganggep tiang patut ngelaksaneang pelayanan nike,

13timaq laẽq tiang pitnah dait nganiaye dait menghine Ie. Laguq Allah periak lẽq tiang, sẽngaq lẽq waktu nike tiang ndẽqman percaye, jari tiang ndẽq taoq napi saq tiang laksaneang.

14Dait malahan rahmat secare melimpah teicanin tipaq tiang siq iman dait kasih lẽq dalem Deside Isa Almasih.

15Setetune kenaq ucapan niki -- keranaq nike harus teterimaq dait tepercaye sepenoqne --: "Deside Isa Almasih rauh ojok dunie niki jari nyelametang dengan bedose." Dait tiang dengan saq paling bedose.

16Laguq lantaran hal nike malahan Allah periak lẽq tiang, adẽq Deside Isa Almasih bau nyatayang selapuq kesabaran-Ne tipaq tiang, dengan saq paling bedose niki. Dait niki jari sopoq conto tipaq selapuq dengan saq ẽraq gen percaye lẽq Ie dait mauq idup saq kekel.

17Allah, Raje selapuq jaman, patut tehormatin dait tepuji selaẽq-laẽqne, sẽngaq Ie saq kekel, saq ndẽq penggitan dait saq Esa! Amin.

18Timotius, bije tiang! Tugas niki tiang percayeang tipaq side sesuai kance napi saq sampun tenubuatang mengenai diriqde, adẽq teteguqang siq nubuat nike side bejuang lẽq dalem perjuangan saq solah siq iman dait atẽ nurani saq murni.

19Pire dengan sampun nolaq atẽ nuranine saq murni nike, dait lantaran nike iman ie pade jari mandek,

20lẽq antarene Himenus dait Aleksander, saq sampun tiang serahang tipaq Belis adẽq ie pade berajah engkah menghine.


  Share Facebook  |  Share Twitter

 <<  1 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel