Dual Panel1Lẽq jaman laẽq, Allah kereng bemanik lẽq leluhurte langan nabi-nabi kadu macem-macem care.
2Laguq lẽq jaman ahir niki, Allah bemanik lẽq ite langan perantarean Bije-Ne, saq sampun tetentuang jari ahli waris selapuq saq araq. Langan Ie Allah sampun cipteang alam semeste.
3Ie saq nyugulang cahaye kemuliean Allah saq menah tandur; Ie wujut nyate Allah. Ie ẽndah saq meliharaq keselametan alam semeste niki siq manik-Ne saq bekuase. Sesampun Ie ngapus dose, Ie melinggih lẽq sedi kanan Saq Maheagung lẽq taoq saq paling atas.
4Bije saq asalne lẽman Allah nike mauq kedudukan jaoq atasan lẽman malaẽkat, dait pesẽngan saq teicanin siq Allah lẽq Ie ẽndah jaoq muliean lẽman pesẽngan saq teicanin tipaq malaẽkat.
5Allah nẽnten uwah bemanik maraq niki lẽq sopoq malaẽkat, "Deside Bije saq asalne lẽman Tiang, lẽq jelo niki Tiang sampun jariang Deside Bije Tiang." Dait, "Tiang gen jari Bapa-Ne, dait Ie gen jari Bije Tiang."
6Laguq sewaktu Allah ngutus Bije-Ne saq sengake ojok dunie niki, Allah bemanik maraq niki, "Selapuq malaẽkat Allah wajib nyembah Ie."
7Mengenai malaẽkat-malaẽkat, Allah bemanik maraq niki, "Allah miaq malaẽkat-malaẽkat-Ne jari angin, dait pelayan-pelayan-Ne jari nyale api."
8Laguq mengenai Bije-Ne, Allah bemanik, "Tahte Deside, ya Allah, gen kekel selaẽq-laẽqne! Pemrẽntahan Deside nike pemrẽntahan saq adil.
9Deside suke lẽq keadilan, dait meriq lẽq hal saq jahat, keranaq nike Allah, Allah Deside, milẽq Deside dait ngicanin Deside kehormatan saq datengang sukecite, lebihan lẽman batur-batur Deside."
10Allah bemanik ẽndah, "Deside, Tuhan, lẽq penembẽqne cipteang gumi, dait Deside mẽsaq cipteang langit.
11Selapuqne nike gen musnah, dait jari lotoh maraq kelambi; laguq Deside gen tetep araq.
12Gumi langit niki gen Deside lepit maraq kelambi, dait gen Deside gentiq siq saq lain. Laguq Deside nẽnten gen berobah, dait idup Deside nẽnten gen tutuq."
13Ndẽqne araq sopoq juaq malaẽkat saq sampun nerimaq Manik Allah saq maraq niki, "Melinggih lẽq sedi kanan Tiang, jangke Tiang miaq musuh-musuh Deside takluk lẽq Deside."
14Malaẽkat-malaẽkat nike cume roh-roh saq ngelayanin Allah, dait saq teprẽntah siq Allah jari ngelayanin dengan-dengan saq gen nerimaq keselametan.